「第一戒:別要睜開雙眼」

送畀每一個,曾經,或者而家喺所在崗位掙扎緊嘅朋友。

上文《徐徐遞上這告別信》講過,每一次離職,都可能因為了解。不過呢個世界有時比較現實,其他局外人點樣看待你嘅履歷,並唔在於你有幾了解你嘅每一位前度或前度僱主,事關另一個簡單直接嘅量化指標係你每份工做咗幾長。

時間嘅長短冇錯係一個相對嘅概念,但係當 HR 或者招聘者睇過千千萬萬份 CV 嘅時候,相對地短嘅時間都可以有一個絕對嘅定義:一般嚟講,喺一個崗位留得少過兩年,都會被視為短,除非有好合理嘅理由 (例如公司併購、架構重組,之類) ,否則一吋短,真係一吋險的。

咁掉返轉講,係咪越長就越好先?都唔係,長度嘅嘢,最好適中,三至五年為佳。太長嘅話,一來人本身會產生墮性,喺 comfort zone (舒適圈) 入面留得太耐,喪失接受轉變嘅能力;二來機會成本太大,要放棄建立咗嘅人脈、環境,重新開拓另一套,唔係人人肯制;三來請你嗰個都可能會諗,你會唔會喺呢個崗位定晒型,融入新地方同埋處理新任務有冇彈性嘅問題。

不過一如「持久力」呢個問題,大家通常只擔心唔夠持久,而唔係顧慮持久過頭 。如是者,點樣確保自己張 CV 唔會被少過兩年嘅經驗沾污呢?

咁有啲 hard-and-fast 嘅方法嘅,例如話唔好打散工或者做兩年以下嘅合約員工,唔好諗住「斜槓」 (例:體育記者/金融從業員/作者/透過爛gag緩和地球暖化嘅人肉冷氣) ,要帶眼識人,唔好返一啲信譽或往績唔好嘅公司。

但係呢度假假地都係《職場心經》,當然要講返個心法畀大家參詳下。睇返條題,係張學友同梅艷芳合唱嘅《相愛很難》嘅末段:「無論熱戀中、失戀中,都永遠記住第一戒:別要睜開雙眼。」

圖片來源:https://pixabay.com/en/cat-kitten-eyes-close-2865770/

即係點?戴眼罩返工?又話要帶眼識人嘅?

如果大家自問事業已經到頂,人生嘅焦點全盤放喺工餘時間嘅話,闔埋兩眼返工,到放工之後先擘返開對眼,理論上係可行嘅。反正無論是非或者順逆,你都志在守到完場等退休,咁咬緊牙關承受工作上嘅不如意或者大小問題,只係考驗你嘅意志力,或者靈魂出竅嘅造詣。能夠做到對外界冷感,凡事不痛不癢,咁你就真係職場人上人。

咁我都知唔係人人有福氣可以抱住賺錢買花戴嘅心態返工嘅。所以呢,另一個方法係「隻眼開、隻眼閉」,技術上都唔算睜開雙眼啦。一隻之嘛,邊度嚟一雙?

唔係講笑,能夠隻眼開,保持對周遭嘅觸覺,又能夠隻眼閉,過濾咗某啲唔應該接收嘅訊息,係有助延年益壽,同埋延長你喺現有崗位嘅壽命。

分享一個真人真事:置記有個朋友,份人都叫有啲上進心、有啲抱負。咁佢返新工之後相當拼搏,做好「打雜」呢份工,客人同老闆都相當滿意。咁得一想二,梗係想升職同埋承擔更大嘅職責啦。老闆口裡並未說不,不過身體就好誠實:職照升,權唔放。

於是,置記呢個朋友就用「高級打雜」呢個職銜,做返一啲其他「打雜」甚至「低級打雜」嘅職能。至於當初想一展拳腳,為部門創造更多價值,例如話幫手提點其他打雜、整理下打雜 folder 嘅擺位,之類,就束之高閣。

「高級打雜」一直壯志未酬,又因為唔識隻眼開隻眼閉,見到啲低級打雜工作馬虎求其而忍唔住出聲,反而被老闆視為破壞和諧嘅「分裂份子」。咁呢個循環,就梗係惡性架啦。喺「老闆永遠是對的」嘅前提下,置記嘅朋友一廂情願,就成為「做唔長」嘅主要原因。

無人會質疑呢位朋友嘅動機係咪出於善意,只不過人人價值觀唔同,你嘅善、佢嘅優,有時不盡相同。你以為可以「止於至善」?佢同你話「上善若水」、「水無常形」、「80%的完美日子都可以好完美」⋯⋯後現代到咁,邊有得拗啫?

也許相愛很難,喺同一個工作環境生存到三年,一樣可以好難。如果自問為人有啲執著,又或者有啲堅持,趁早學識第一戒,可保平安。