「讓每一次亦似初戀第一次」
Aug 31, 2018 · 3 min read
然後再為了下次開始。
打工當然唔係做人世,事業亦唔等於一切。不過返工佔咗你生活起碼三分一嘅時間,食粥食飯又係視乎份工,咁好好醜醜,都認真對待下返工呢回事。
好嘅開始係成功嘅一半,但係萬事起頭難,所以,返新工嘅第一日其實唔容易處理,要乾淨俐落冇水花,點都要做好準備。

或者你話,阿叔你都卅幾歲人,返新工嘅指數一隻手都數唔晒啦,仲唔駕輕就熟?少年,你太年輕,如果你係一個追求浪漫熱情又刺激嘅愛情嘅妙齡少女,你估下究竟係一個滑椏大叔抑或係初生之犢可以滿足到你?
冇經驗,同太多經驗,有時真係一樣咁衰。但係知道自己冇經驗嘅,尚且懂得謙卑,會緊張手震心悸潮熱小鹿亂撞你的心。喺腎上腺素高企嘅情況下,初心者會保持高度戒備,雖然額頭鑿住「新人」兩個字,但係看倌們亦都會好好體諒,細路仔唔識世界,當然有怪莫怪。


