各位睇清楚少少先。係 Master ，唔係 Mister 。係，置記呢篇會講 Master Degree ，碩士課程。點解要講？因為有好多人，例如我自己咁，臨近 30 歲，先發現自己比上不足，事業進入樽頸位，然後就心思思，想讀多個 degree 傍下身咁。但係讀書係要錢嘅，唔想倒錢落海，就要諗清楚以下幾樣嘢。
首先，要問下自己係咪有所求。如果女亦無所思，女亦無所憶，咁豈不是純粹身痕想搵錢使下？嚟嚟嚟，我開個職場冥想訓練班畀你，每六秒六毫，你上夠 99 個鐘就可以獲得砂紙 (真係要嚟省嘢嗰啲) 一大張。圍返條數，十萬蚊，又有得瞓 (係冥想) 又有得拎，唔使做功課，價錢仲隨時平過你讀一個 Master ，抵諗丫。
好喇，咁你話你係有所求嘅，咁我就要問下你：你求啲咩呀？學問？可以諗諗佢。事業？有得諗嘅。純粹求個名？都冇話唔得。姻緣？你落多啲老蘭，或者做多啲義工，參與下正常社交活動好過啦，成本低好多添呀。
廿幾卅歲人，求學不是求分數就梗架啦。其實 Master degree 都總有學霸，尤其是嗰啲南下香港求學，駁腳等畢業留港就業嘅內地同學仔，佢哋本身就係力爭上游嘅代表，啲 A 呀 A+ 呀畀佢哋擸晒絕對係好正常好合理。唔好妄想同佢哋鬥高分，如果唔係盞自己唔開心。
咁讀書本身點都會幫你增長下知識嘅，問題係，呢啲知識對你嘅幫助有幾大。即係，如果你本身已經做緊會計師，無之啦啦讀個翻譯碩士返嚟，溝埋夠做瀨尿牛丸冇？雖然話為興趣而讀書係好高尚，好反映到你學海無涯嘅情操，但係讀完如果日常返工用唔著，閒時放假又唔係接 job 做相關嘅嘢，咁你學到嘅嘢又去咗邊樹？學費交咗，知識唔用就流失咗，好似唔化算喎？
雖然話大學唔係職業先修學院，但係唔做研究嘅研究院課程 (taught master degree programme) ，分明就係要嚟幫大家搵食架啦 (其實大學都係靠呢啲碩士課程 cap 水開飯) ，尤其是一系列商學院課程，由財務、統計學、資訊科技管理到風險管理，基本上都融會各個學系嘅專長，按單執藥咁滿足在職人士進修嘅需要。閒閒地十零萬學費畀大家半工讀形式玩兩年，換來一個 MSc (Master of Science) 嘅銜頭，學生同學院總算係各取所需。
講還講，大家千祈唔好高估咗讀呢啲學科帶來嘅作用。除咗可以畀你寫落 CV ，以及閒時吹水攞嚟炫耀下自己識得砌乜乜 model (統計或經濟學嗰啲，而其他朋友可能諗緊水著 cosplay 嗰啲) ，讀完一個碩士並唔代表你馬上可以喺嗰方面發展。頂多，換張入場券畀你架咋。
咁點解 MBA (Master of Business Administration) 收得特別貴呢？郁啲都講緊 30 至 50 萬不等喎！MBA 讀嘅嘢，同 BBA 其實大同小異，之不過懶係提升咗層次，就好似小學你會背熟「床前明月光，疑是地上霜」，到中學就會分析韻律、意境咁。即使 MBA 同 BBA 用返同一套教材、做同一個 case study…
