Member preview

「Move on 不 Move on」

每次我啲標題有引號,多數都係引用緊歌詞,差在有冇改編。今次呢句本身就多過一個可能性嘅,睇你咩年代啦。

「Move on 不 Move on 天天盼再會面」

如果係千禧年代嘅樂迷,應該記得起陳奕迅呢首《十面埋伏》。當年仲同容祖兒合作拍 Siemens 手機廣告添 (係,容祖兒嗰首叫《想得太遠》) 。

(我成日都覺得容祖兒呢個角度戴埋頭盔都算幾靚 ) 圖片來源:https://player.vimeo.com/video/5758310

我想講嘅係,返咗咁多年工,累積咗一大班舊同事,真正可以維繫或者保持聯絡嘅,真係有限數。如果 Farewell lunch 係 90 分鐘吹完場雞,咁轉工 settle down 之後嘅 catch up lunch/drinks 就係加時互射 12 碼。

一般嘅職場同事關係,通常都有起承轉合。由一開始互不相識,你扮鵪鶉佢扮死蠢計起,到合作一段時間之後大家建立互信、流露真性情,波幅可以相當之大。不過,當同事要跳槽,呢段「你與我同坐這條船」同舟共濟嘅關係就要畫上休止符。

昔日嘅飯腳,好難再透過公司內部 instant messaging (IM) 召集外出;講起同事間嘅變化,或者老細點樣發老脾/發白日夢,已經 move on 嘅人聽落亦已經隔重山。再者,新公司嘅事,我講你又未必明,有啲嘢亦唔方便講到你明。講太多,仲隨時有炫耀嘅嫌疑,無謂啦。

至於講飲食旅遊家庭子女呢,坦白講,以前成日對住就為講而講啫,而家生疏咗,仲講啲私人嘢?有咩留返同朋友講唔好?

丫,有個位係例外嘅:就係內部轉職。畢竟大家仲喺同一屋簷下,仍然有共同話題/敵人/花生位,不過應唔應該 internal transfer ,又係另一個足以寫千鳩幾字嘅題裁。


「Move on 不 Move on 誰長情 哪個不捨不棄」

九十年代,許志安算係四大天王 (及李克勤) 以外另一個當紅嘅男歌手。《真心真意》呢首歌,擺明係娘架喇,不過而家安仔 (安佬?) 開演唱會大家咪又係識唱嘅一齊跟住唱?

由九十年代坐上管理層嘅人,到家下應該都差唔多退休。佢哋或者係大家眼中嘅老屎忽,但係正如教師可以桃李滿門,肯做人師傅 (而又做得好) 嘅老細經過幾許風雨,入門弟子可以多到坐幾圍。由於大家曾經喺某部門共事,年代未必相同,但係都曾經為呢位老闆賣命嘅關係,一個圈子就此形成。

咁呢位老闆當然不能太仆街啦,要有親和力,亦師亦友咁嘅格局就最 perfect 。置記見證住呢班念舊嘅同事每隔半年左右就出嚟敘舊,圍繞嘅核心都係呢位老闆同佢嘅左右手。當阿老闆正式宣布收山歎世界,各朝弟子出於由衷嘅敬意同埋昔日情誼 (寫出嚟都覺得肉麻),真係搞咗個榮休晚宴畀阿老闆。仲訂造咗啲禮物畀老闆留個記念。

好似好超現實咁,但你唔好理,喺傳統華資公司、老闆現今接近退休年齡嘅圈子,真係會有呢啲老友記聚會。 Move on 與否無礙大家 chit chat ,因為條 team 比起一般家庭,更加似一個大家庭。


置記久唔久就會引用昔日高官施祖祥 (都係聽聞啦,近代嘅任志剛都有咁講過) 嘅名言:「鐵打嘅衙門,流水嘅官」。職場悲歡離合都不過遊戲一場,上市公司向股東交功課,私人公司成就老闆闔家富貴。轉工,可以人去茶涼徹底 Move On ,亦有人情常在、可一可再嘅長久手足情。被珍惜嘅,不妨念舊;不足惜嘅,就無謂念念不忘,畢竟好似 Stalker 咁嘅瞥伯,好容易畀差人叔叔逗嘅。

作為一個叔叔,置記感激曾經遇上值得念記嘅好老闆、好同事。當遇上要栽培嘅 intern / 新人,我都盡可能將前人施予我嘅,贈返畀後人。正所謂「己所筆育,必施於人」,能唔能夠儲夠一副啤牌咁多徒弟,他朝慶賀自己榮休都係其次,至少,我對得住自己、對得住以前啲師父丫。