見工記 誰大誰惡誰正確
Facebook 專頁有更多無聊短文: https://www.facebook.com/ivanliresearch/
頭盔，大家都見好多上網出舖聲討人反而畀人圍毆嘅故事，我都見唔少，都有份毆唔少。所以都諗咗好耐講唔講呢個故事。但都係意難平，痰上頸咁唔吐唔快，屙尿咁屙咗開頭邊停得到架。
都係會多口水，三千幾字。但快手講個精華你知：我便服見工，結果畀人小。以下係長版．
話說昨日獵頭女打畀我，跟進返我上星期見嘅一份工。此女我新識冇耐，但都算係OK地靠譜 — 而以往遇過好多好不靠譜的。佢嗰間亦都係大的獵頭公司，唔好開名啦。
客套話半句後，佢就問我：你嗰日係咪casual wear呀？男子漢大丈夫老爺車，做得怕乜認，直認不諱。隔住電話我都感覺到獵頭女擺出一個「希特拉：仆街！呢次我真係吹撚脹」嘅表情。
咁大家知道獵頭係咩一回事，本質同地產經紀一樣，為咗抬你上轎間公司點十九佢地都講到好有機會，甚至減人工去佢都搵到理由說服力（我試過唔止一次聽）。掉轉，對住公司，乜嘢垃圾驚跌地（例如我）佢都可以推上去話係你嘅dream man 。畢竟佢地都係靠 「促成交易」，ie 扯皮條嚟搵食。有刁有飯開，冇刁死撚開，it’s as simple as that。
唔好話我醜化獵頭，我醜化埋自己。咁我嘅情況，粗俗啲講就係個客投訴，喂媽咪你點X搞架？你條女著到鬼五馬六咁，笠件樽領衫，袖口就包過手碗，條裙就長過徐小鳳，仲戴副老虔婆眼鏡，當自己聖女貞德呀？咁你係媽咪，梗係同個客講係嘅我唔識教女，然後拉埋囡囡一二面炳佢啦。
然後劇情係乜呀？梗係啲囡囡教唔聽，「個客咁樣咁樣摸你你點忍？」。其實我感覺到媽咪唔係好想話我，但又真係因為生意is生意，唯有話我知：呀埃汾哥，我諗住你呢啲都出嚟打滾咁多年，唔係小鮮肉啦，係仙尼亞Executive (我以為十球八球人工先係噃)，冇理由仲要我次次提你嘛。個客覺得你唔係好尊重場合咯。
好啦，咁講返當日嘅事。當日我當然真係著便服。原因？巴閉咯！英雄主義，爽咯。雖則無數咁多女（是真的）話我知我著西裝比較好睇（相對啫），但我其實好憎著。原因？唔爽咯。
咁但，如果係以前在星展做，咁我係咪都恤衫西褲唔打呔架啦，西裝褸同呔就放公司，見工見客或出嚟講嘢咪著返件披咯，好多”仙尼亞Executive”都係咁。
但而冇啦嘛。加上我嗰日有其他嘢做，我為咗見佢唔知幾耐，我要全日唔舒服喎，我諗過度過都係唔好啦。對，你可以話我冇誠意，呢啲永遠都係相對啫。係高盛見我唔好話西裝，露西裝我都著（露西亞俄式西裝簡稱啫）。
咁我冇同媽咪姐講嘅，係真的，我真係唔係極之重視。上面已講咗。倒唔止係我白鴿眼或唔在乎。一來嗰間係中資公司。但別誤會，我對中資公司冇乜偏見，我只係認錢，人民幣可以係臭錢（好多菌的說）但我出港紙之嘛。但聽係中資公司我都打折扣，原因唔係我睇唔起佢，係我知佢地唔鍾意我。係我知道中資公司多數都唔請我，咁多年都好似冇乜幾多間屙化過。原因可能係個氣場唔啱，或者我普通話太屎，或者想搵個大陸仔自己友。「咁又叫我去見？」。我後來發現，可能因為我姓Li，有人誤認我係同胞。我一度諗過不如懶型咁改返做Ivan Lee，甚至扮鬼咁叫Ivan Leigh。
二來不得不承認嘅係，頂，咁我唔係等你開飯嘛。咁因為間嘢唔夠勁（其實都勁），斷估唔請我，夜晚有嘢做，我唔等飯開呢啲原因，咪便服咯。
好啦，睇到呢度你都幾有耐性，應該一早問，咁你幾便服呀？有冇著件波衫去（我念念不忘我有位朋友著件Simpson衫去米芝蓮三星），定著件疏乎蛋衫（星展同事會見過我星期五著）？咁我一一話你知。我好歹都著咗件西裝樓，入面係件Steve Jobs式嘅黑色Tee，下身就牛仔褲加波衫（唔係新把撚波鞋啦，係耐克 — 嗰晚我去睇大黃蜂，btw）．簡單嚟講我就係一個著西裝樓嘅Steve Jobs — 呀，應該話係一個著西裝褸而吹脹咗嘅Steve Jobs
咁講到尾，我唔順超啲乜？我X，見我嗰條大陸女人咪又係著運動鞋？你老母你著波鞋就得我著就唔X得？即係你著李寧就愛國我著耐克就洋奴（我作的，我冇留意佢係李連杰定利智）（身材就肯定唔利智，對，我有留意）？即是你咁樣講我唔係好順超。我都有同獵頭女講返，咁但當然佢唔會點理我，爭在未講「咁人地係客嘛」（又，technically份錢係僱主畀，但熟悉資本主義嘅你知道咪又一條數）。但我都係照講，又加句「不過算啦」（即係都係好介意）
另外，話我唔尊重場合嘅。唏，好歹我都準時到。呀大陸女就「做緊嘢」。咁一般驚跌地等煙他了華係好正常，三個字至半個鐘都正常，我以前老細（唔係星展，多年前）捉埋舖雅虎圍棋先出去見都試過（幾仆街），好彩我依牙鬚鋼咋（我識捉圍棋又話你知咩）。當年我見青衣等王維基（circa 2000）兩粒幾鐘都見過，等到我部plam捉圍棋（都話我識捉）都冇電我直頭在佢間房出面張梳化訓著咗都係咁。咁但，王維基喎。
但，呀大陸女要我等半個鐘，然後仲係搵個唔關事嘅HR入嚟戥腳，戥到四點七八個字先出現然後HR話佢知五點夠鐘。衰過時鐘酒店爆房。又有幾尊重本人呢可？我知，你Supreme Executive 啲時間就時間，我呢啲仙尼亞Executive 嘅時間就唔係時間嘛，明嘅，我個題都講咗啦。
噢仲有，你可以話都係我唔專業，我樓上講咗原因同我點解不滿佢出聲。但我最大嘅感覺係，成件事太 low了。你絶對可以質疑我嘅蝗語水平點去應付啲國企老總（都話大陸公司咯）。但，你都識講啦，我假假地都仙尼亞Executive，你去質疑我著便服（先唔好講佢自己都著波鞋，理得你李寧定李連杰）？喂，get a life 啦。你不如屌我冇提早十五分鐘到丫（我搭正四點出現），你不如屌我send 封thank you email 畀你丫。事實佢連卡片都冇帶比我，fuck that 我唔尊重場合啦，不過事實亦係我有都唔會send. Nothing Personal，十鳩廿年嚟，我一次都冇 send過，我餓死咗未？正如十鳩廿年我一次散水餅都冇派，我畀人封殺咗未？我寧願你係覺得我唔掂，求其搵個咁嘅理由咯。
講咗咁多，其實唔係想大家評理，每個人都覺得自己啱架啦。我亦唔係玩聲討，當然大家支持我我好開心，但亦唔使講到咩大陸公司就係咁煩，咩呢啲公司唔做都算（講真，間公司好撚大的）。所以我亦唔開名，只係分享畀大家一齊笑下，同埋都話屙尿屙到一半就屙埋佢（都好大篤，大篤過大尾篤）。
結語：其實我都應該get a life，話就咩畀雙方了解下，但大家都知職場從來都冇平等（世界都冇），驚跌地同煙他了牙永遠唔係同一標準。等於我極少見啲煙他了牙會五分鐘內出現（拿，我做現他了牙就搭正坐埋在間房架 — 玩手機一回事丫，上嚟面對過我嘅驚跌地可以做證），等於我好似冇撚見煙他了牙send 個thank you email畀個驚跌地，永遠只有囡囡讚「大帥哥你好勁呀」，唔會有人讚返囡囡「你啲蝗語真係蝗語過蝗語煙呀」
題講左啦，所有咩rule呀norm呀都係死嘅，我以前啲文都寫過，2007年我做驚跌地幾撚咁串form都唔撚填話起身走結果個HR幫我填埋（然後就雷曼爆煲）。幾時都係形勢比人強，
真的，唔好怨乜。我寫文第一日都講啦：唔鍾意，咪撚睇，有幾他媽的難明？唔鍾意，咪做咯。一樣之嘛。你仲有飯開嘅，咪可以寫啲咁嘅文咯。但，如果係仔細老婆嫰等供樓嘅，咪死死地氣，著李寧咪著李寧咯，我著埋柒牌男裝都仲得。最緊要大爺你高興
多謝大家收睇，希望個獵頭唔會睇到呢篇文（會唔會太高估自己嘅reach？），但都冇所謂啫，生意啫，唔柒都柒咗啦我。嫌我煩嘅下次咪搵第個place — 反正個煙他了牙都唔會識睇呢篇文架啦。
Facebook 專頁有更多無聊短文: https://www.facebook.com/ivanliresearch/
