至愛三寶 之 本地電視劇
我好少上網煲劇,所以好多套印象深刻嘅劇集都係香港本土嘅。今天介紹三套我最鍾意睇嘅三套香港嘅電視劇(全部都係無綫嘅)。
第一套係郭晉安做主角嘅《隔世追凶》

呢套劇係講主角郭晉安透過電話同幾十年前嘅死鬼老豆傾偈,中間會透過問老豆攞料幫自己查案咁。條橋係抄西片嘅,但係佢個劇情鋪排睇落都好有無綫本身探案劇嘅風格。
全劇最引人入勝嘅當然係郭晉安同許劭雄嗰條感人嘅父子線。另外劇情中段,郭晉安透過一句說話想改變歷史拯救殘疾嘅女朋友,結果造成整個劇情徹底大逆轉,女友失蹤,所有之前破左嘅案全部未破,嗰幾集嘅震憾效果真係好正。
同埋呢套劇首主題曲《彷如隔世》啲歌詞都好襯個劇情, 我到宜家仲記得點唱。
發現每一張臉, 似靈光一現
明明維持著都可斷線
失去是愛的伸延, 連線索都不見
你逐漸逐漸地走遠
閒話一提, “隔世追凶”大結局嗰集, 石修有個比高登仔笑足十年嘅on9橋段。
我當時好危險, 生命受到威脅。於是我停低, 望住佢同佢講: “你流緊血喎, 你睇地下, 一滴, 兩滴。。。”
跟住就催眠左佢。。。
嗰幕都堪稱無綫劇一代經典。印象畢生難忘。

第二套要講嘅係一套舊啲嘅劇集,劉青雲、鄭少秋嘅《大時代》

呢套劇最初響無綫播嗰陣我太細個冇睇, 係早幾年凌晨十二點重播嗰陣我先睇返。
以炒股票為題材嘅親族復仇劇, 劇情精彩到我晚晚追, 睇少左嘅我仲會響手機myTV app睇返。係我近年少有地投入咁睇嘅好戲。
裡面嘅演員諸如劉青雲, 林寶怡, 陶大宇, 林家棟等等, 今時今日唔係攞晒影帝視帝都已經上晒神台。睇返佢地後生嗰陣匯集一堂拍戲, 對我呢啲後生仔來講都幾得意。
我鍾意套戲其中一樣野就係夠疆同去得夠盡。第一集丁蟹掟仔落天台嗰幕, 一定收到好多好多投訴, 以至後來劇中間丁孝蟹謀殺方婷冚家嗰段都被廣管局cut左唔少戲。
但就係呢啲情節先能夠觸目驚心咁描述到丁蟹一家嘅瘋狂同霸道。而為左對付呢挺咁霸道嘅敵人, 主角劉青雲要做嘅就係同佢鬥癲鬥狂。股票巿場上面只有癲佬鬥狂人, 冇所謂正義同邪惡。
呢套無綫神劇家傳戶曉深入民心都一個點, 令香港證劵巿場出現左所謂”秋官丁蟹效應” — 只要鄭少秋有戲拍/有劇上演, 港股當日就會應聲而跌。我覺得秋官作為演員, 能夠演一個歹角演到有咁大影響力, 都算不枉此生了。
最後一套要介紹嘅係無綫電視嘅《心戰》


又一套鄭少秋主演嘅無線劇。比起之前嗰幾套大作,呢套《心戰》當年收視麻麻地,我諗冇乜人記得。
不過我真心覺得《心戰》嘅劇情勁過晒以上所講嘅神劇, 精彩程度可以講得上係我睇過嘅所有無綫劇之冠。(雖然呢套劇係抄電影《神探》橋嘅, 按規矩應該要扣返少少分。。。)
心戰嘅劇種係當年無綫最擅長嘅探案劇。劇情主要角色包括: 身為都巿連環殺人魔嘅魔術師男主角陳豪, 佢好愛錫嘅細妹樹木保育員陳茵薇, 陳豪嘅肢體殘疾女朋友邵美琪, 同埋作為主要偵探角色嘅舞台劇演員鄭少秋。
冇錯, 無論忠嘅定奸嘅, 都係同警察律師無關嘅職業。不過套劇劇情嘅峰迴路轉程度比好多警匪探案劇都有過之而無不及。
故事第一集一開始已經非常血腥: 講邵美琪被變態殺人狂禁錮, 兼切左隻手落黎。得救後仲要親眼見住殺人狂響佢面前自殺, 真係心理陰影面積無限大。
不過幾年後, 邵美琪遇到個好好先生陳豪, 佢係個紳士魔術師, 又係好錫細妹好顧家嘅阿哥, 成個形象都係大好人。
但第二集陳豪一家受到壞人威脅, 要勒索佢錢之類, 於是陳豪佢不動聲色咁就殺死左個壞人。而且將條屍帶返魔術工具用焚化爐燒毀, 完美咁不留痕跡, 出手乾淨俐落。齣劇只係第二集, 睇到我眼都凸埋。
之後陳豪再殺嘅幾個人都係完美犯罪, 不留屍不留痕, 所以警方連成立謀殺case嘅一步都未去到, 不過有邀請作為舞台劇大師嘅鄭少秋幫手協助調查部份失蹤事件。鄭少秋有種特殊能力, 就係透過方法演技代入去想象兇手響呢種情況做啲乜, 而推算到兇手下一步, 所以佢提供嘅線索可以幫警方緝破一啲唔係陳豪犯嘅案。
雖然陳豪殺人不留痕跡, 而且動機都係為左保護自己同家人, 但係殺人一定有情緒壓力。於是陳豪就將自己嘅壓力分裂成唔同嘅人格。唔同嘅人格就由黃德斌等唔同嘅演員飾演, 陳豪係響廢棄嘅酒店同其他人格溝通, 令個角色嘅戲劇立體感出晒嚟。
一啲情緒衝動嘅人格有時會唔顧陳豪嘅反對, 衝出黎犯案殺人, 然後其他人格要幫手執手尾。終於中間有一次意外, 令陳豪終於失手漏左條屍出海, 比警察發現左。為左掩飾自己殺人動機, 佢就製造左個無差別連環殺人嘅都巿殺人魔出黎, 希望混淆視聽。
不過識得用方法演技代入探案嘅鄭少秋實在太勁, 估到晒殺人魔下一步棋, 仲鎖定埋陳豪為嫌疑人。為左幫陳豪洗脫罪名, 陳豪嘅殘疾女友邵美琪都跳出黎幫手殺人。後來邵美琪為保陳豪, 仲將所有殺人罪攬晒上身, 響獄中自殺死埋。
咁本來所有殺人案都告一段落, 陳豪同陳茵薇兩兄妹終於可以逍遙法外相宿相棲happy ever after. 不過陳豪嘅人格心魔話 “唔得!” 最乞人憎嗰個鄭少秋都未死。一定要殺死埋佢先可以泄心頭之恨。於是陳豪去鄭少秋屋企埋伏, 見佢返黎就響暗角勒死佢, 今次仲唔死! 結果真係被佢殺死左, 不過殺錯左鄭少秋個friend。。。
因為陳豪復出殺人, 令佢又一次跌入萬劫不復之地。結果多行不義必遭天遣嘅陳豪, 終於響尾二嗰集, 比自己嘅親細妹陳茵薇錯手殺死左。。。
雖然陳茵薇有啲陰功豬, 但終於所有壞人死清空, 最尾一集仲唔係BBQ大結局?
就係唔係。
心戰最後一集! 鄭少秋因為演技查案太過入戲, 抽離唔到, 比佢見到陳豪心魔裡面嗰幾隻鬼(即係黃德斌佢地)! 人格分裂正式轉移左比太入戲嘅宿敵鄭少秋, 比自己同陳豪嘅執著所困擾, 仲以為自己係天才魔術師陳豪, 覺得自己識變亡命鐵箱逃脫魔術。結果鄭少秋要響被火炎包圍嘅鐵箱中, 先能夠真正面對自己嘅心魔。
心魔不死,人格永存
因為呢套劇劇情太引人入勝, 而且好可能大家都冇睇過, 所以一時興奮就變左劇情回顧。。。不過大家睇我介紹套劇介紹得咁high, 就知我有幾鍾意呢套劇啦!

