[技術文] 各種匯率機制，「不可能的三角」，外加歷史例子數個
Facebook 專頁有更多無聊短文: https://www.facebook.com/ivanliresearch/
原本只係想抽龔生水，但越寫越長，索性變篇文。係喎，雄霸話齋，你哋見我成日寫股票，早排寫埋樓 — 但好少人知本人係做外匯出身的
講返龔生，佢又寫乜春呢？炒bitcoin輸到慒咗？人地三者兼備咁解架咩？
個Impossible trinity，不可能的三角，係話固定匯率（即係非浮動匯率），資金自由進出，同埋獨立貨幣政策，不可能三者並得，只可以揀兩樣（話時話，可唔可以只選一樣？）。至今好似都冇任何國家做得到，話經濟學係偽科學嘅不妨研究下。
一係，你就要固定匯率，同資金自由進出 — 但就唔要獨立貨幣政策。即係用人哋嘅貨幣。最簡單，就係香港。盯住美金，資金自由進出，但就冇得自己決定加息減息或印銀紙。因為有幾多美金先有幾多港紙，亦冇得自己印銀紙。歐元區亦都係一樣，德國法國就冇自己加減息嘅自由了，外判咗比歐洲央行。換黎嘅係匯率固定，同埋資本自由進出
一係，就學歐元面世之前嘅多數發達國家咁，要資金自由進出，要獨立貨幣政策 — 但就冇咗固定匯率。英國韓國日本之類而家都仲係。有得自己加息減息，資金自由進出，但當然匯價可以坐過山車。
一係，就中國咁，要獨立貨幣政策，要固定匯率（緊盯美元及其他東西） — 咁就冇左資金自由進出了。一有資金自由進出，自然會影響個匯率。
點解唔可以三者兼得？維基（百科，唔係王維基）舉咗個例。當全世界嘅息口係5厘，但貴國想行1厘息（獨立貨幣政策是也）。咁會有乜後果？咁就好似而家港紙咁，你會有貶值壓力，因為套戥者（或曰炒家，任你點叫）會借你隻貨幣，然後轉做高息嘅外幣，賺個息差，咁你就不停有貶值壓力。如果唔用外匯管制，唯一方法就係用外匯儲備頂 — 但唔會係無限子彈，所以最後都係要貶值 — 或者一係一開始你唔好堅持獨立貨幣政策，或者你行資本管制。
咁三選二，要邊兩樣好？其實好難講，唔同情況有唔同。前歐元年代自由浮動先係王道，然後歐元之父蒙代爾 Mundell提出咩「最適貨幣區」，一度成為顯學。但歐債危機爆發後，又有人話共同貨幣死路一條 — 不過歐元而家都未死得去。
中國就當然係行資本管制，傳統IMF 鬼佬Liberal當然批評 — 但其實一樣有鬼佬覺得呢種方法先最好，證據係在布列頓森林年代（Bretton Woods system）（人人同美金掛勾，美金同黃金掛勾），經濟增長先最快。到呢套嘢收皮（1974），人人自由浮動後，就增長不再。當然有人反對，認為只係咁啱個年代係咁，同套體系冇關。但又留意，一路行資本管制嘅中國，增長又係快過其他國家。
又，睇神話童話故事都知，人梗係貪心，三者想要晒會有乜後果？就多數係出事，爆大鑊。
亞州金融風暴其中一個核心問題，就係東南亞各國緊盯美元，但又唔行資本管制，但又想維持自己貨幣政策。好地地時好地地，情況逆轉時，資金又任意出去，最後要用外匯儲備守匯價 — 但因為唔係無限子彈，係守唔到的。唯有棄守，大手貶值。你見印尼南韓都係咁嘅問題。冇咁大個頭，就唔好戴咁大頂帽
值得補一筆嘅係，當年有一個國家元首就唔聽IMF勸告，認為外國人亡我之心不死，亦都唔理副手嘅勸告，忽然間宣佈外匯管制，鬼佬媽聲四起。個國家就係馬來西亞，唯一一個忽然落閘行資本管制嘅國家，個總理係馬哈蒂爾，副手係安華。鬼佬經濟學家認為馬來西亞咁做開下極壞先例，外資會冇晒信心，勁鬧馬哈蒂爾，直頭係覺得「契弟，你等仆街啦」。但結果？馬來西亞經濟極速復蘇，一年已經走出陰影，增長係咁多國之中最快，更加唔使求IMF救助喪權辱國緊縮開支行乜鬼改革。呢單亦係馬哈蒂爾政治生涯最得意之作之一。
大家至愛嘅英國，好多人都知道曾經畀人狙擊過匯率。正係「大鱷」索羅斯嘅傑作。有啲香港人係去到亞洲金融風暴先識索生，但索生一早成名，成名作正係打殘英倫銀行，迫使英國退出歐州匯率機制（European Exchange Rate Mechanism），一役賺咗10億美金，1992年嘅10億喎。索生亦被譽為「令英倫銀行破產的人」（The man who broke the Bank of England），因為英倫銀行輸咗34億英鎊。
到底發生咩事？好簡單，英國1990年加入歐州匯率機制，成員國要保持匯率對西德/德國馬克嘅匯率在一定限度 — 其實即係好似而家港紙掛美金咁。咁你睇到啦，英國要固定匯率，又要資金自由進出 -就犧牲咗自己獨立貨幣政策，變相外判畀西德/德國。後來德國經濟好，壓通脹，加息，但英國經濟唔好，頂唔順，英鎊匯價係咁跌。索羅斯睇死英國頂唔到幾耐，必定投降，大手狂沽英鎊。
結果黑色星期三1992年9月16日，英倫銀行宣佈退出機制，勁蝕一筆。更樣衰嘅係，當時英國係歐盟主席國，時任首相馬卓安John Major民望大跌。冇咁大個頭，就唔好戴咁大頂帽。英鎊半年內就跌咗30%，咁大個經濟體系喎。所見到港紙由7.75跌到7.85，一大堆人話咩「貶值影響」「港紙大跌嘅危同機」，好難唔笑出嚟
再補多筆嘅係，其實龔生，又未必錯得晒。美國其實可能就係三者兼得嘅唯一例外。資金自由進出，同埋獨立貨幣政策，十分明顯啦。但美國係咪真係匯價亂浮？又好似唔係噃。你篤USD/USD，明明就係1。 唔係搞爛gag，而係基本上美國係貨幣第一強權，任何外幣都係同美金quote。「咁美金同自己咪得」
當然你可以話匯率係一面鏡，我quote EuroYen都得的。但又諗真啲，香港嘅例子，所謂「穩定匯價」，只係指對美元之嘛，冇話對歐元日元會穩定。同樣，歐元區德國法國之類，匯價穩定，係住對返自己歐元區貨幣之嘛，冇話對美金日元穩定。
所以，又可以返返去美元霸權嘅問題，呢方面的確係「美國例外」，like it or not。亦因為美元霸權，美國先可以長期做債仔又可以長期貿易赤子但又冇貶值冇爆煲壓力。
至於美元霸權點嚟，就好長嘅故事了，但主要嚟講，因為打得。
Facebook 專頁有更多無聊短文: https://www.facebook.com/ivanliresearch/
