美股大跌1000點有幾罕見？之後會點？
Facebook 專頁有更多短文: https://www.facebook.com/ivanliresearch
- 程度普通嘅可以睇上次講港股嗰兩篇先，程度夠高嘅（即係所有人）可以直接睇呢篇了
2. 上次寫完文連登仔都有相對地正面回應。咁總有人話「我買美股好過」。唏，why not both？好似我上個頭盤你就話「我食牛扒好過」。唔好咁心急。牛扒嘛，而家先上。點解而家先上？因為美股而家先插，全部有原因架。
3. 寫文時，香港時間2月25日星期二晚上九點五十分，美股未開市。
4. 昨晚（星期一）環球股市大跌，好可能係因為肺炎傳遍各地，日本韓國意大利伊朗都成為重災區，投資者忽然又再擔心。但請唔好問我點解忽然間星期一好擔心，上星期五就唔擔心，市場就有佢本身嘅道理，亦即係冇乜道理可言。
5. 最為吸睛嘅，當然係道指大跌1000點，拿，有圖，史上第三大單人跌幅了。
6. 但，咁整個圖，或者研究跌幅幾多點，咪知道唔夠專業咯。CNBC本身都OK好睇，但當然有時有啲嘢唔係咁好了，亦都就返大眾嘅水平。
7. 問題在邊？兩個。首先，道指。道指嘅好處係夠耐，夠古老，夠權威，就快150年，而恒指先得50年歷史。但你亦都估到，道指係一個過時，唔太科學嘅指數。150年前就話方便計算，而家唔需要咁了。道指有乜問題，可以自己睇文。
7.5 但，兩點短嘅。首先，得三十隻。第二，但凡指數都會有weight權重（equal weight 都係weight），但道指係計個股價．share price— 於是可以好搞笑，大價股就最大影響 — 但大價股唔一定係最大隻嘅公司。你鍾意十合一嘅，即時你在指數影響力就大十倍（雖然美股好似唔會咁易批合併同拆細）。
8. 所以呢，真係，專業投資者就睇標普500（SPX），或者其他MSCI或富時系嘅指數，基金經理表現亦都一般係benchmark呢啲。開口埋口講道指嘅，就知你唔係行家了。當然因為習用多年，咁媒體都會用嘅。同樣情況亦適用於恒指，但恒指至少冇咁老，所以冇share price weight嘅問題。但一樣，專業投資者，就睇MSCI Hong Kong啦下
9. 除咗道指有問題，你去睇個點數當然都有問題。大佬呀，家陣太古城幾錢尺，三十年前幾錢尺呀？見唔見個圖？全部單日點數跌幅最大都係呢幾年，唔通當年冇股災？非也，當年啲股價一日唔見兩三成（！），但嗰時指數幾百點。所以計點數嘅，又係外行得不能再外行，梗係計% change
10. 好，入正題。鍾意講道指跌1000點，就同你講。1000點即係3.6%。咁又係啦，問一句，有幾甘，有幾罕見？你知而家啲傳媒，跌300點都可以話暴瀉。
11. 年期，就冇搵到盤古初開啦，百幾年呀大佬。但上次連登仔都係講做乜唔包最重要嘅年份，講98,03,08。咁就由98講起（雖然98對美國唔係特別重要嘅年份）。
12. 數據，98年1月1日，到昨晚，2020年2月24日。22年多啲。
13. 5570日。記住呢個數。
14. 嚟啦喎，道指跌得多過3.6%，總共只係得42日。即係罕有過1% event．但一年有252個交易日（大約），而呢個event大約132日（5570/42）出現一次，即係一年總有兩次咁。你自己判斷算唔算好罕見了，主觀的
15. 用返之前講恒指兩篇文嘅方法，計下如果我在道指一日跌3.6%後飛入去入市，經過30日，60日，180日同360日，回報係點。
16. 有辦你睇，都係幾個結論。
17. 首先，平均都係贏嘅。但越渣得耐，平均贏得越多。同恒指情況差不多。原因都係好簡單，股票長期係升的。特別係在大跌後買。你頂得順啲波幅同埋受得住啲冷言冷語笑你低能仔就得。當然你會話，因為美股近年咩位買都升啫。係？咁但早幾年大跌時又敢唔敢買？仲有，我已經計埋科網爆破嗰時啲數。
18. 另外，贏嘅比例，都係多過一半。以30日嚟講就六四開。亦留意，個贏面係隨住你渣得越耐越大，渣360日，贏面去到八成半。
19. 但當然，兩樣嘢都重要，贏面幾多，同埋贏時贏幾多，輸時輸幾多。你見到了，如果短時期30日嘅，係可以平均跌幅大過平均升幅的 — 但因為六成機會贏，所以拉勻都正數。
20. 仲有樣嘢我想講。頭先講過，22年出現過42次呢啲大跌，大約兩年一次。但，分佈係極唔平均嘅。你大約都估到，多災多難嘅時間，例如科網爆煲，或者金融海嘯，就當然一年好多次。平時風平浪靜，就可能幾年都冇一次
20. 我地去visualize下係咩一回事，可以令你好沮喪
21. 在最初6年，1998–2003，都真係好靚，大約每年兩次咁，呢6年就12次。
22. 之後就嚟啦喎，2003年頭後，幾年都冇一次出現，直到金融海嘯。2008同2009年，兩年間，就出現咗22次，夠晒癲。
23. 想講嘅係，你2003年嗰次金融海嘯前最後一次大調整唔買，就一路錯過之後嘅牛市，等咗5年到2008年先再有咁嘅調整。咁你話，趁低買返咪得 — 但，呢22次入面，有超過一半，個指數仲係高過2003嘅 — 即係話，跌咗你都慳唔返。
24. 好，我當你勁，萬能，捉到2008年尾同2009年頭先撈底。如是這，市況開始定落嚟。去到2011年仲有4次超過3.6%嘅調整。
25. 然後，如果你錯過，話等嘅話，恭喜你，你一等就係4年。去到2015年，道指已經升咗五成。
26. 2015年都仲唔買？就更加恭喜你，又再等3年，2018年時，道指再升多五成。
27. 呢度係framing了，但，2011年8月，至到今日，道指升左三倍 — 而當中只有4日跌得多過3.6% — 你覺得你會捉到？
28. 頭先講過道指唔科學，但反正你都係講道指，所以我用道指做例。用標普呢？其實結果差不多，不再重覆，自己睇圖。
29. 唯一要補充嘅係，標普指數，在同一個時間（5570日）中，有超過昨晚（星期一）3.4%跌幅嘅，就多過道指。有51日 （道指係42日）。係咪波幅大啲 ？應該係，冇深究。其他結論都差不多，冇乜補充。渣得長就贏得多，贏面亦都更大。
30. Time is your friend．點解股票明明長遠係升，但好少人賺大錢，甚至好多人輸錢？因為畢菲特嘅名句：冇人鍾意慢慢致富。最好今日畀冧把你聽朝就升十倍然後你沽完就爆煲。La Dolce Vita
31. 最好講下，有啲唔同嘅，納指。方法一樣。納指Nasdaq昨晚（星期一路！）嘅跌幅，其實同道指標指都差不多，3.7％。但你見到做出嚟好唔同下，亦都因為納指先天大上大落。
32. 同樣呢個時間（5570日）中，納指有呢個跌幅嘅，多達99日！記住道指標普都係42/51日。明顯見到波幅大好多。22年99次，一年4次半。
33. 而呢99次當中，有30次係2000年，17次係2001年，呢度已經佔咗一半咁滯。科網爆破是也。打後其實就真係一年兩三劑咁
34. 同樣地等我快講，到2002 年嗰轉你 miss咗後，5年再見。納指升咗一個開。而之後咁多年都冇見返2002年嘅位，金融海嘯最底都冇
35. 都唔記得講，2008年金融海嘯，有呢個3.7%跌幅嘅，亦有18次。回返帶，30次係2000年，17次係2001。呢度佔咗近三份二嘅大調整。亦即係話，其他年份根本好少有得畀你咁買。
36. 打後嘅情況同道指標指差不多，2011年冇嘅，就等到2015先見，指數已升七成幾。
37. 不過最後要講一樣嘢，納指都有呢個渣得越長回報越好嘅特色。但，你睇贏面，就好似冇呢回事，呢個同其他指數唔同。個人理解應該係因為2000同2001連衰兩件，2000「飛入市」好多去到2001仲要蝕
38. 教訓？好簡單，買股票咯。上次寫港股你又唔順，今次寫埋美股，話到畀你聽，有呢啲跌幅然後飛入去，歷史上一般回報都不錯。咁你堅持太陽昨日東邊升起唔等於聽日都會嘅，就，都有你道理嘅。真係冇法保證。
39. 不過，留意多樣嘢，如果你錯，代價有幾大？都唔好講話你去反手沽空。今次呢篇文，同上兩篇講指，有個好唔同嘅地方。就係我話你知，呢啲單日大跌。分佈係極不平均嘅。有時一年十次八次，有時十年八年先一次。跌近4%你唔買，諗住等等等嘅，你睇啲數話到畀你知，一等有時就係幾年，你買貴咗七成甚至一個開 — 仲要係你第二次咁啱捉到唔係放咗假而又冇再「再等多次」喎
40. 最後，都幫朋友推廣下。華夏Nasaq100 ETF
41. 我特登做埋Nasdaq，因為波幅夠大。固然入市30日，平均回報係正數，但唔多。想倍大嘅，就用佢地隻7261，兩倍槓杆。不過留意返兩點，首先ETF 追縱嘅唔係Nasdaq，而係Nasdaq 100指數，有啲分別。另外，呢啲產品都唔建議你渣幾十日，正路都係即日鮮。當然你要日日玩都可以
42. 仲有，Nasdaq你見到，根據上面討論嘅買法，你見你企錯邊時，Nasdaq指數跌幅都可以好大。所以掉轉，包拗頸，睇跌嘅，一樣得。7331就純反向冇槓杆。7522就反向兼兩倍。
43. 朋友叫到，講下隻嘢嘅好處。其實大家都係咁上下咁玩，華夏主要係管理費平。另外，隻7261正向兩倍，全家獨有的
Facebook 專頁有更多短文: https://www.facebook.com/ivanliresearch
