Google買Fitbit，有乜鮮甩治？
Facebook 專頁有更多短文: https://www.facebook.com/ivanliresearch
- 其實原本我都會寫Google買Fitbit（正如我原本都會買李斯特城拎英超，你原本都會十蚊買騰訊），結果文友（即係飛機團） Hong Lam 林奕康搶閘寫咗。
2. 咁我地呢啲良性競爭（即係，飛機）嘅，佢寫完我可以再寫，甚至佢寫完更激發我寫。唔係批判或乜，大約都同意佢寫。當然你睇完佢嗰篇睇我又得，唔睇我嗰篇睇佢亦得。實不相瞞呢篇文嘅題都係向佢致敬（即係，抄）
3. 講返，其實冇乜好講，咪就係孤高買咈咇。21億（美金，下同）。對你嚟講好似好多錢，但對孤高嚟講小菜一碟，話晒都係FAAMG寶馬山五嶽之一，9000億市值。
4. 咁你梗係以為，咈咇勁啦，唔勁點有人買。咁睇你點定義勁，即係啲小妹妹覺得校隊隊長都好勁，然後出去學界就畀人數咁。我記得睇足球小將，有集講，早田誠嘅「剃刀射球」，頂，你在日本就好勁，「人地歐洲球員個個都曉，基本功嚟咋」。咁上下回事（搵唔返漫畫）。
5. 有人買就勁？應該係，話晒股價一晚都升15%，但留意仲未去到21億。好可能市場覺得單刁未必成，話晒小股東可以反對，監管機構可以反對，孤高可能到時爆煲，或者聽日解放軍就佔領美國，你點知唔會？。而之前LVMH話Tiffany，後者股價直頭升突
6. 好簡單，埃汾金句，所有嘢都有個價。再好嘅股價去到某個位都係搵笨實，再垃圾嘅股票去到某個位都有價值。正如一張廁紙、一條底褲，都有佢本身嘅用處。得罪講句，咈咇就係去到條底褲咁。
7. 咈咇，之前都寫過了，手作仔公司，冇乜競爭力可言。
8. 我知啲tech撚又出嚟嘈。但眼光放遠少少，咈咇升15%？哦。之前跌咗幾多你唔講？講緊4年前多啲，當中冇咩雷曼海嘯，隻嘢因為孤高買大升之後先7蚊。4年前？47蚊。蕟發咗八成幾近九成。更加唔好講個市升咗幾多，太古城貴咗幾多，麥樂雞貴咗幾多，北菇雞貴咗幾多。
9. 但當然，its all about timing． 報導話，其實之前係非時卜朱生想買。不過真係一貫朱生縮骨嘅作風，出價只係孤高嘅一半。最後似乎因小失大。但我想講，之前正係今年低位，咈咇其實係3蚊咁上下。市值講緊10億美金都冇（而家都只係18億），難聽啲講句，真係底褲嚟的，大行分析員睇都唔會睇，會畀老細屌嘥時間，有幾多成交咁大把？你3蚊買到你咪叻，但嗰句「再垃圾嘅股票去到某個位都有價值」係適用嘅
10. 咈咇嘅故事，好簡單，令我諗起咩公司？就係Gopro高普。真係差不多餅印一樣．Tech撚即管慢慢數有幾唔同，但對我嚟講啲黑人都係差不多樣。又係做硬件，又係潮嘢，又係你啲網友打晒飛機嘅公司。股價表現都係差不多
11. 高普仲極端啲，90蚊跌到5億都冇，跌九成幾。正式醫返都嘥藥費。
12. 兩間公司有乜共通點？頭先講過，硬件，潮牌，網友打晒飛機。仲有就係，單一產品單一品牌。當然單一產品唔一定死，愛瑪士一樣日之出食堂，名牌中嘅名牌，一個品牌可以頂味將軍LVMH七十菜刀。麥當勞一樣一個品牌，Le Big Mac賣足咁多年（去到法國就唔賣Quarter Pounder咁咯）。蘋果好大程度上都畀人話只係靠iPhone （Yes and no，有機會再講）
13. 問題係你個品牌唔撚得嘛！點唔得？冇錢賺咯。已經講完。
14. 吾友尹思哲講Profit First，唔係最早提出，但講中重點。佢篇文開宗明儀講，冇「無利潤嘅公司 十足無性愛嘅婚姻」。冇嘢扑，結婚嚟把撚？（所以而家嘢人唔結婚）。
15. 重覆講幾廿次，啲喱文，好多時（可以理解地）忽略咗，股票市場，即係現實世界，係好殘酷的。你要追夢？哦，關我撚事。你好有創意你隻產品好勁？咁賺唔賺到錢？賺唔到？咁有幾勁？點解咁勁賺唔到錢？睇人都一樣，你咁撚勁，點解冇人請？你在森林入面做拿度尼有必要先出山打救森巴足球？
16. 以上真係極殘酷又冇品味，但你想問人拎錢，就係面對咁上下嘅問題。之前都仲有好多錢多人傻，冇錢賺都大把人投。但WeWork爆煲（都算係）已標誌一個時代嘅終結。
17. 同一般嘅喱文講，佢地（可以理解地）往往忽略咗，有利潤有幾重要。佢地往往只係知道，嘩，個品牌好勁，周圍都見到。好啲嘅，會發現，喂，好勁喎，好多人都用。
18. 但都係一句，賺唔賺到錢？
19. 以前冇咁多呢啲問題。但因為過去十幾年都係低息，錢易拎。你要品牌人人見到？錢之嘛。你要好多人用？錢之嘛。你用一次我畀十蚊你，快啲用。好戇鳩？唔好笑，UBER都係咁上下玩法，一大堆嘅外賣公司亦係咁玩法。
20. 都係一句，賺唔賺到錢？
21. 去到盡少少，美國嘅煮飯仔概念股Blue Apron固然係咁。但其實Wework， UBER， Netflix或多或少都係咁。
22. 你會話，投資者缺乏想像力，喂唔好講盈利咁短視。Fine，Amazon之前都蝕錢。一個光頭佬造就幾多神棍，話你知佢係下一個光頭佬。係架，咁你講下你有乜Roadmap可以做到亞馬遜，一統天下，「之後點玩都得」。UBER曾幾何時賣到呢個夢，Netflix大家都半信半疑，畀個benefit of doubt佢。Wework就吹得太大 ，真係信都侮辱自己智慧。以上種種，舊文都寫過。
23. 喱文嘅盲點，就係只睇隻嘢啲產品有幾受歡迎，完全低估咗背後嘅成本。就算有錢賺都好，咁好賺，點解其他人唔入場？只係你先識做？如果人人可以做，你點可能長期維持暴利？冇暴利，做乜要買你隻股票？你點生存？
24. 寫過無數次，等於 Hong Lam 林奕康篇文都有引返我
25. 補多多少少，護城河嘅嘢，不外乎幾味，買股票或做生意前，不妨睇下有冇：政府容許嘅壟斷（眾多公用股，大陸銀行），專利（藥廠），極高嘅技術門檻（Tesla，Google），用戶黏性Network Effect（Facebook），極強嘅品牌（愛馬士，蘋果，你樓卡間茶餐廳），錢多以本傷人（迪士尼，亞馬遜）。
26. 真的，可能係事後孔明，但你見做到霸王嘅，好少唔係以上幾味。最出名嘅FAAMG，Facebook, Amazon, Microsoft, Google, Apple，以上好似提過晒。最初係FANG嘛，N for Netflix，點解唔掂？因為發現其實冇你想像中咁高門檻，你識拍戲人地唔識拍？錢之嘛。你有AI知道邊個受歡迎，人地冇AI？錢之嘛。你用好多錢拍劇？錢之嘛，人地冇？而用戶忠誠，係極低嘅。我睇Friends之嘛，理得佢係Netflix定迪士尼播啦。正如你歐聯睇有線定NOW台定中東佬，其實分別不大。歐聯就有競爭力，電視台係冇乜嘅（星級講波佬就可能有，但，錢之嘛，講講下樂視可以去NOW台啫）
27. 我見好多人嘅盲點，就係高估咗啲技術有幾高門檻（同時間，忠誠度有時被低估，你樓下間雞煲都可以好高忠誠度的）。講到啲Gadget點勁點勁，點劃時代。特別係我講嗰時，就會屌我「你咁叻你整個」。係，本人係Tech盲，本人考C就拎C。但係咪要好波過美斯先可以講波？當年我話UBER技術門檻低，無數咁多tech撚嚟鬧。結果呢？你識整打車，滴滴唔識？Grab唔識？Fitbit好勁，小米就唔識整？可能冇你咁勁，但我平你一半喎。
28. 講返咈咇單刁，都話垃圾到一個位就自然有人買。但孤高畢竟唔係做善堂（你以為係？），21億美金話多梗係唔係多，但食咗佢唔好？做乜要益你？咁總有原因。買嚟做乜？
29. 最簡單嘅，咪就係睇中啲Data，健康Data．蘋果就簡單，埃瘋埃窩廚（冇人拎個埃劈去跑下話？）一站式。冇用Android機好耐，但，如果非Google自家嘅Android機（例如三星），啲資料係咪直接畀埋Google？好似唔係？就當係都好，Google冇埃窩廚嘛
30. 咁講開硬件，大家知道，Google做硬件，啲往績又其實係麻麻地嘅（HTC，Motorola，Google Glass）。同蘋果又爭好遠啦，特別係啲wearables方面 .
31. 講到蘋果，就真係順手睇埋蘋果嘅最新業績，講兩句
32. 你睇蘋果，的確係埃瘋一命救全家咁滯。但至少帶到個生態系統出嚟（屌蘋果control freak封閉系統嘅又不妨諗下)。
33. 舊文都寫過下，蘋果「服務」收入升得好快，已經可以成為新增長引擎。上季收入已經過100億（一季咋大佬)，第二大收入。當然呢啲都係由埃瘋延伸出嚟，唔使講利錢係極高，呢方面Android當然落後。
34. 另外，就對上呢次業績，見到wearables一樣上得好快，聽聞個新AirPod極之好賣，利錢相信係相當高嘅。你見收入已經直迫Mac機，應該下季會成為埃瘋同賣服務之後嘅第三大收入。
35. 偏偏，硬件就係Google較弱嘅一環，特別係wearables，落後成條街，所以想在呢個領域執快塊拼圖，好合理。照計一早應該估到Google 會買添.
36. 節目預告，不日同你講埋另一種好睇唔好食嘅股票，外賣平台。UBER Eat冇獨立上市，但急恰Grub Hub有。跌到仆街的說。
Facebook 專頁有更多短文: https://www.facebook.com/ivanliresearch
