保留抗爭時嘅愛
咁快另一年嘅多事之秋又過左。Mean精亦係香港人特性，喺社交媒體特別體現到（甚至有過之而無不及）。每過一段時間，又會有專頁話有香港人對英國文化唔尊重，唔好過來英國，又或者係話一早早喺英國生活嘅係藍嘅乜乜乜。
真係唔記得幾時香港變到二元分立，非友即敵。雖然唔係話要做中間超人，但都唔係一味覺得香港人世界最差，任何外國嘅野都好。仲記唔記得2019年關心過側邊嘅陌生同路人？或者係關心過您嘅陌生人？
以前亞媽教落，好嘅學，唔好就唔學。英國人對傳統嘅重視係我地要學既，例如英國人對英文文法執着係我地無既。我地以前會話人不擇手段形容人地做事手法差，今日我地叫一切方法都做「手段」，果啲不但而且雖然但是就變晒「那怕」，更甚者，成日「含」。連返工搭車時間都改左做「通勤時間」，我覺得其實個字好用左就無所謂，無分別貪新鮮就無謂。跟台灣中文係咪叫正宗先？不如跟返香港本土日常用開嘅中文啦，今日英聯邦用啲英文都同英國唔同啦
係咪所有英國野都好啲呢？記得以前係有線睇過一套電影叫《八兩金》，男主角（係男主角，無一）去左美國生活，都離唔開華人圈，生活又唔太如意，返到自己鄉下都要話自己美國生活好過鄉下，鄉下好差下。如果你係香港都有不滿（如果無，咁之前咁多年71出來吹吹風呀？），咁去到新地方不論係咪英國，你點會完全滿意呢？英國人都會唔鐘意首相卦，有唔滿意可以係建議同改善，咁先至係真正對英國有供獻。之前喺香港時常話要忠於自己就係咁。
香港人能屈能申，點會搵唔到自己生存空間呢？唔使改口日日話我好燃鐘意英國先可以喺英國生活格。況且BNO「自古以來」都係食兩家，邊度忽然來尊一。好似尼個舊聞：個男人比政府罰左錢係因為佢蒙左面唔比人面辨識鏡頭影到佢，係香港當然人人都話唔得啦，咁係英國發生你又會唔會覺得合理？早係香港條智慧燈柱爛左之前，英國巳經係咁。係咁的，英國人對私隱無香港人咁重視。所以話，好嘅學，唔好就唔學。
香港人就係乜都有得傾先會成功，咁有無需要咁mean先。2021年可摸耳比返啲愛出來開始新生活嘅香港人？希望2021年會見到英國更多有愛嘅香港人啦
多謝各位，英國異星人多左唔少LIKE，或多或少係因為本人改左個好名（自大中……），因為今年真係太忙無寫過野咁。
