學習英國文化 — 巳讀不回

我哋成日會覺得返工一定要覆電郵，就算note with thx都要覆。但係喺英國，尤其倫敦，係非常注重生活同工作平衡嘅國家，所以佢哋返工都比我哋香港人更注重時間。好多時你腥個電郵去，佢哋未必覆你。無論你係顧客，定係商業合作夥伴，甚至乎係你租屋嘅業主（或者代理），你嘅待遇係公平嘅😅。

公司唔覆顧客電郵，因為好多時英國都係鍾意用傳統方法 – 打電話。好多時我打電話問報價，尤其係每年嘅驗車，我會要求佢電郵返個報價我。好可惜，好多時都係等唔到回覆，而你又差唔多到年檢時間，最後焗住就範，最多價錢唔同就走人。我哋時時講嘅白紙黑字，喺呢度普遍係人同人之間嘅信任。大家喺好多嘢電話講完就算，佢可能冇錄音，你亦都可能冇錄音，當大家有爭拗去到法律層面，咁就大鑊啦。

如果喺香港喺複雜既公司打工既你，應該同同事收線之後，即刻收到一個電郵 – As per discussion。我自己喺英國嘅做法，通常都會咁腥個電郵，雖然好似個傻仔咁自言自語，甚至自言自語左好幾個月（英國做嘢速度係咁上下，尤其同業主傾野）。當有一日，你個電郵對象需要搵你，佢就會覆你。所以佛系抗疫係有通理既。

雖然好多老華僑會話，英國冇咁多人呃人，但係我本住寧可信其有嘅精神，成功避過左一啲意外。早前我個業主上門維修，我師傅下午6:00就話太夜要走人，第二日我就收到業主電郵話我唔俾師傅做嘢，要收我額外附加費。幾經波折之後，個師傅終於承認係自己決定走。但係業主竟然同我講：我唔會告你，亦都唔會收你錢，唔需要出電郵㗎。喂呀哥，業主之前係出電郵俾我過喎！我當然要求佢覆返我電郵啦，最後業主係喺個電郵裏面叫個師傅覆返我。同一個師傅，之後又嚟第二次屈我，如果信業主口講口倍，要去到法律層面解決都唔知點算。

就算喺香港都會遇到有啲HR，甚至job hunter 拖住你唔覆，喺英國，除非雇主用請人軟件，你可以有一份自動回覆話俾你聽衰咗。其實係正常嘅，英國文化係唔會想講壞消息，所以相對香港人直腸直肚，已讀不回係需要習慣一下。

巳續不回好似唔係咁好，但我好鐘意尼種精神，我都會巳續不回（除左另一半），非常方便；更唔駛下下怕自己出言不遜。唔知其他人有乜睇法？會唔會繼續有讀必回呢？