英國衛生好嗎？
尼幾個月都寫左啲野，但係都係比較「負」，所以無放過出來。早前剛剛先返香港幾星期，返到英國個世界完全唔同左，全國好驚武漢肺炎……忽發其想，想講下英國嘅衛生程度同香港有乜分別。
首先係英國人，佢哋雖然注重外表，但係唔係日日沖涼！唔係日日沖涼！唔係日日沖涼！我曾經有一位英國人室友，佢沖涼嘅原因係要返工，佢真係冇講大話，後來我發現，佢星期六日真係唔會沖涼架。唔知呢個會唔會係英國人習慣朝早沖涼嘅原因呢？題外話，我成日出街都好似聞到（尤其人多嘅時候）隱約有浸「英國味」。嗰種又唔係臭，又唔可以話香水味，有少少似木嘅味道，但又唔係咁似。呢種似是而非嘅味道唔單只係一啲人身上聞到，重喺好多英國嘅屋企係好普遍聞到嘅。
氣味未必代表唔衛生，不過原來佢地其他生活習慣都係好隨意。我時常見到歐洲人喺快餐店隨手將自己食緊嘅嘢食，放咗喺枱面（佢哋係將食物直接接觸枱面，但快餐店張枱又唔係成日有人抹）。對於有潔癖嘅我，覺得非常驚訝（真係有潔癖，我試過喺日本跌咗舊嘢食係枱面而唔理佢，個侍應竟然同我講：張枱好乾淨，我抹過，舊嘢食仲食得㗎….最後我都係唔理佢）。我開頭以為佢哋係食飽咗，唔食就放喺枱面啦，但原來佢哋一陣又攞返戲再食過。甚至我見過歐洲人粒糖喺街邊跌咗落地，都可以即刻執返擺落口繼續食。
英國人我又未見過咁誇張。英國嘅全民運動就係飲酒，就算凍到震，佢哋都會喺戶外飲酒。咁啲枱凳坐滿嘅時候，佢哋會點呢？企喺度飲，所以有啲人會放杯酒喺地下，等一陣又攞番來飲。雖然啲嘢有冇污糟到，但係由異星嘅異星人，總會係覺得怪怪地。
返到屋企就會有啲鄰居嘅衛生情況同自己唔同啦。異星人住緊嘅地方係一座大廈，倒垃圾係自己拎落去地下垃圾房嘅。每日見到唔同嘅隔籬鄰舍，佢哋係徒手將個垃圾桶蓋（係公屋垃圾桶嗰隻Size）打開，放低舊垃圾，跟住就走。完全冇洗手！ 完全冇洗手！完全冇洗手！我每次倒完垃圾，都定必喺隔離淋花水喉度洗手，或者直接返返屋企洗手先再出去。當然我住嘅地方係乜嘢人都有啦，有亞洲人，又有歐洲人，仲有英國人。
另一樣野我覺得好特別嘅係英國人似乎特別怕人咳，申請過英國簽證嘅人應該會知道，其中一項申請條件係證明自己冇肺癆。肺癆係香港人眼中，根本喺歷史書先見到咁滯，反而爆肺就聽過。可能係咁，佢哋會比較關心人哋咳，打乞嗤就冇乜理，或者只係見你打乞嗤就同你講句bless you咁。
英國人完全冇香港人嗰種潔癖，但係我覺得香港人嘅潔癖都係正常嘅，至少我哋曾經經歷過沙士果種人人有潔癖嘅情況。我喺日本同美國都見過人要攞張紙巾用嚟開閂廁所門，而唔直接掂個門柄。反而英國未見過，甚至可以喺廁所一路食嘢，一路留喺廁所排隊準備做大事，西人真係可以睇得好開下🤣。
對於新型致命疾病，英國人同全球人類一樣咁驚嘅，但係又要保持英國人優雅嘅文化：表現出人與人之間嘅風度。雖然我自己就未遇過，亦都未見過，但係有唔少亞洲人都遭遇過俾人白眼。咁又難怪，病菌由中國輸出，佢哋又唔識分乜嘢人種係邊度黎，所以只能夠得作出好似「愛滋病係有基佬出現，所以要防備基佬」呢種古老嘅諗法來防備亞洲人。不過，大部份英國成年人都係比較注重規則，佢哋會覺得歧視係唔啱嘅，所以就算你係喺武漢來，佢哋最多驚到避免同你講嘢咁啫。
喺歐洲，大部份人對於口罩嘅睇法：係病人嘅專利，你有罩就係有病。引致到今時今日，你係英國同歐洲，戴口罩係奇怪嘅。最近甚至有啲新聞，有亞洲人因為戴口罩而俾人打。並冇好似亞洲咁，有理冇理都會戴口罩，甚至係因為空氣污染而戴口罩。歐洲人同香港人都經歷過瘟疫，好得意嘅係對衛生嘅執着唔同，我開始諗緊其實黑死病係咪真係爆發過嘅呢，定還是亞洲人過分有潔癖🤣。
世事真係奇妙，細個從來未諗過自己會經歷歷史書上面所寫嘅嘢：革命，瘟疫，戰爭等等。世事無常，正如我從來未諗過我會係英國生活一樣。
