中文系學生時常被問的問題與答案

如果呢篇文能夠成功說服對中文系有過多幻想嘅人放棄入中文系，哪怕只得一個，噉我都算係功德無量。

我嘅本科學位係2019年喺馬料水完成嘅。唔同時代、唔同大學嘅課程架構、學生共性都會有所不同，如果呢篇文未能夠寫中你所認知嘅中文系，還請恕我力有不逮。

大學中文系讀嘅中文同中學中文堂讀嘅中文有咩唔同？

其實基本上都冇乜地方係一樣（笑）。如果你去info day，學系官方嘅答案大概會係呢個模樣（大概啦下）：

我哋嘅課程內容涵蓋古今文學、古代文獻同語言文字，提供到唔同方面嘅研究範疇俾同學發展。

講完啲人都係唔會明。

古典文學、現代文學係絕大部分中文系同學選擇中文系嘅原因，呢個都係大家（相對地）了解得比較多嘅範疇嚟。古今文學同大家中學修讀嘅中國文學，甚至係中文科嘅範文都有相似之處嘅，例如研究嘅對象都係嗰啲詩詞歌賦散文小說，不過當然相對地都深入好多，而且真係可以俾你闡釋論述自己嘅解讀，而唔係好似高中噉樣有好生硬嘅標準答案。[1]

相比起文學，有志於研究古代文獻或者語言文字嘅同學就少得多：古代文獻主要係研究古代資訊嘅流傳－－喺流傳嘅過程中有冇嘢俾人增減改調過（定係成本嘢都係流嘅）、點樣分門別類……都會牽涉唔同嘅史哲經典，你中學讀嗰啲《左傳》、《論語》就係擺喺呢度講。

語言文字就教下六書啊、句法啊、音韻啊，係一個大部份人眼中比較悶嘅範疇。不才曾經算係比較了解語言學，通常啲人唔知我讀緊乜嘢嘅時候，我就會俾啲圖佢睇：

好耐之前畫落，冇俾人改過。有錯嘅話屌細力啲。

我諗應該冇人中學中文堂會學呢啲嘢掛。[2]

喺度想提醒返大家：除非你係範範皆精樣樣通曉嘅全才，如果你同我一樣係個有所偏好嘅學生，噉你喺中文系總會有痛苦同自我懷疑嘅時候。例如我Year 1 至 Year…