道德撚必睇！法國過江龍道德實驗哲學登陸香港⋯⋯對面嘅台灣！

《道德可以建立嗎？：在麵包香裡學哲學，法國最受歡迎的19堂道德實驗哲學練習課》讀後感

諗唔到標題寫咩好，所以求其寫咗啲嘢——原來呢個句式都幾方便。

我讀咗十幾年基督教學校。十幾歲嘅我，係個敬虔嘅基督徒——個個星期返教會、聽到人講粗口會打冷震、反對同性戀⋯⋯諗返都覺得自己似法利賽人多啲。

Year1嗰陣，有堂通識tuto嘅討論係「為甚麼我（不）是基督徒」，嗰陣我同其他同學分享「我係基督徒，因為我想要一啲生活行事嘅指標同方向」——諗返都覺得呢個答案好造作，不過「透過宗教去建立道德」的確係一樣我好在意嘅嘢。

亦都係因為呢份在意，我開始覺得其實宗教同道德都幾唔相干——強行將自己嗰套so called屬天嘅價值觀套落地上每一個人身上，挑剔人講粗口着短裙係唔聖潔，卻容許信徒食用小動物剝削性小眾。一句「神（唔）喜悅」就係一切道德爭議嘅解方。我發現呢啲唔係我想要嘅嘢，於是我決定另闢蹊徑去發掘我心目中嘅道德。

而道德哲學就係一個幾好用嘅工具。

今次講嘅呢本書，入面分享咗十九個道德相關嘅思想實驗，透過呢啲實驗，我哋可以更加清晰噉反思道德呢個議題，更加有條理噉論證自己嘅價值觀。

三條特別出名嘅道德推理規則

呢本書甫開頭介紹咗三條常用嘅規則俾我哋當做思考嘅工具，三條規則分別係：

1. 「應該」蘊涵「能夠」

當你話一個人「應該」做A時，呢個「應該」係蘊涵（entail）咗佢「能夠」做到A，例如當我話「小明應該捐一百萬出嚟支持奇啲嘅寫作事業時」，呢個論述就蘊涵咗「小明有能力捐到一百萬出嚟」。簡單嚟講，就係唔可以強人所難，逼人做一啲喺佢能力範圍以外嘅嘢。

2. 唔可以因為事情本身係點，就話佢「應該」係點

我喺睇呢本書之前，已經成日對呢啲講法覺得好厭惡——泊喺街邊嘅單車籃入面全部都係垃圾，「係噉㗎啦」；地鐵站有白衣人拎住棍無差別毆打行人，「驚就唔好出街囉」。呢啲盲目擁護既得利益者嘅講法係極度唔負責任，原來道德哲學界已經有一條規則講呢件事。以後我再遇到呢啲盲毛就可以用道德哲學撻鳩佢，開心～

3. 必須用相似嘅方法處理相似嘅事件

即係唔應該大細超、差別待遇（突然諗到某啲當權者——當我冇講過）。

義務論同後果論嘅角力