香港人粵拼速成班
由0.5到1。
關於粵拼
粵拼嘅全名係「香港語言學學會粵語拼音方案」（又名LSHK粵拼）。粵拼係一套特定嘅拼音方案，並唔係「任意一套廣東話拼音」嘅統稱。
好多香港人雖然冇正式學過粵拼，但係生活喺香港，你或多或少可能都會接觸到人名地名、港女拼音，又唔算完全冇拼音嘅基礎。今次呢篇文係想俾上述有少少拼音底嘅人，可以點樣由自己日常有接觸嘅嘢入手，將平時相對比較熟悉、但係唔嚴謹嘅拼音轉返做粵拼。
聲母篇
將 y 轉做 j
任人魚肉 jam6 jan4 jyu4 juk6
我知，第二語言係英文嘅你，由細到大都係用開 y 字對應上面嗰四個字嘅聲母嘛，無啦啦要將用開嘅 y 轉做 j 真係會好唔慣。我明啊，我都係土生土長嘅香港人，我都經歷過呢個階段，我真係明。
但其實用 j 指涉呢個音並唔係咩新奇事。喺德語、荷蘭語、丹麥語等等嘅日耳曼語，佢哋都係用用 "ja" 去代表英文嘅 "yes"。而人造嘅世界語亦都係用 "jes" 表示 "yes"。與此同時，語言學界權威中嘅權威國際音標，亦都係用 /j/ 標示呢個音。所以，粵拼用 j 而唔用 y，可能未必係對香港人最直觀嘅拼法，但係都算係跟國際慣例吖。
將 j / ts 轉做 z
早走早着 zou2 zau2 zou2 zoek6
如果你克服到要將 y 打做 j 嘅心理障礙，粵拼嘅其他符號都相對直觀。上面講到我哋用咗 j 嚟做「任人魚肉」嘅聲母，而粵拼又希望可以盡量用一個符號代表一個音，所以就捨 ts 取 z，不過相信大家對 z 嘅熟悉程度都相對高嘅。
將 ch 轉做 c
叱吒情場 cik1 caak1 cing4 coeng4
上面都講過，粵拼希望可以用一個符號代表一個音，所以我哋將ch斬咗個h，就會變成粵拼。
圓唇舌根音：gw 同 kw
跨國鬼怪 kwaa1 gwok3 gwai2 gwaai3（唔好問我咩嚟）
gw同kw都係圓唇舌根音，可能有啲拼音會將佢哋寫成gu同ku，不過我覺得用w都夠直觀，應該難唔到天資聰慧嘅大家。
