Wordle：一個唔識英文字都可以玩嘅遊戲
識邏輯同語言學就得喇。
唔知大家最近有冇見過身邊啲朋友成日post啲噉嘅嘢落social media：
Wordle 214 3/6
⬛⬛🟩⬛⬛
⬛🟩⬛⬛⬛
🟩🟩🟩🟩🟩
一開始我都冇為意係咩嚟，然後過咗幾日，我日日都見到有人post呢堆神秘嘅嘢出嚟，就好奇google咗下呢個「Wordle」係乜東東嚟，結果我就入埋坑一份喇。
簡單嚟講，Wordle其實係個估英文生字嘅遊戲，佢每日會出一個字俾你估，每個字都會係五個英文字母，你會有六次機會。每撞一次，系統就會同你講你今次撞啱咗幾多。
佢個教學都好清晰，大家自己睇啦XD
可能因為我身邊都比較多鍾意語言嘅朋友，所以大家每日都會分享自己嘅成果。對我嚟講呢個遊戲最成功嘅地方，係佢嘅遊戲限制set得非常好，好到一個唔識英文嘅人如我都可以每日成功都撞得啱個字。
五個字母、六次機會。
呢個遊戲set死咗係五個字母、六次機會。如果你每次都試由唔同字母組成嘅字，去到第五次嘅時候，你已經試到25個字母。即係話，就算你只係白撞，你都有辦法搵到曬嗰五個字母係咩。
所以，就算我喺第一次撞嘅時候已經出到黃色甚至綠色，我第二次撞嘅時候，都係會撞一個五個字母都完全唔一樣嘅字。因為噉樣我先可以得到更多線索——無論係搵到更多啱用嘅字母，定係排除更多唔啱用嘅字母。
「DAILY」同「HOUSE」係我每次開個新嘅生字都會第一時間試嘅字。原因有三個：首先呢兩個生字並冇任何重複嘅字母；其次佢哋包括曬英文六個響音（vowels）字母：A E I O U——仲有可以做響音嘅「Y」；最後就係剩低唔係響音嘅字——即係輔音（consonants）都係一啲常用嘅英文字母：D H S L。試完呢十個字，基本上至少都會有幾個黃色，好彩啲嘅已經會收獲到一啲綠色。
除非我頭兩round已經搵曬嗰五個字母出嚟，如果唔係我都會唔太理啲排列組合，而係試多啲唔同嘅字母，排除更多干擾。
好似上面呢題噉，我喺試過「daily」同「house」之後，之後我就視乎情況會試下啲「gr」、「br」、「pr」開頭嘅字，好好彩地我喺第三個attempt之後已經搵曬五…
