近排追緊Viu TV新劇《IT狗》，故事以香港IT初創界做背景，講述主角點樣由被炒魷嘅銀行職員，憑藉信念奮鬥成為初創老闆。劇情同人物設定上雖然有啲誇張，但因為都參考咗唔少香港以至海外嘅名人奇事，盞鬼得嚟又貼地。
而我最關注嘅角色，就係珈其扮演嘅吹水佬Kenneth，明明毫無實力同技術，靠亂噏當秘笈都可以做到大學講師。佢係劇入面不乏金句，其中一句就係：「機會係比冇準備嘅人。」乍聽之下，不外乎又係一句亂講、冇內涵嘅說話。平時大家都係講「機會係比有準備嘅人」，意思係平日就要養精蓄銳、準備好自己，先可以把握機會。當冇準備嘅時候，就算機會跌落嚟，都只可以同佢擦身而過、後悔莫及。
但係呢句咁違反常理嘅說話，反而令我印象深刻，更加諗起唔少冇準備但又有機會，同埋有準備卻又冇機會嘅時刻。又例如明明只係抱住一試無妨嘅態度，係冇乜準備嘅情況下，成功獲得取錄；相反有時就算準備充足、發揮得唔錯，冇機會就係冇機會。或者明明由外到內都準備好，結果一句都冇機會講；但偏偏冇化妝街坊裝嘅狀態，就突然遇到採訪，只能夠後悔點解咁懶。
所以當聽到「機會係比冇準備嘅人」，反而令我鬆一口氣，唔再懊悔過往冇準備之下遇到機會嘅情況。因為機會始終有運氣嘅成份，係唔會理你有準備定冇準備。可以有備而來咁把握機會當然係最理想，但就算突如其來遇到機會，能夠享受機會、享受當下，做出最好嘅自己就已經足夠。只顧擔心懊惱冇準備、準備得唔夠好，只會白費手中嘅機會，應驗咗機會只係比有準備嘅人。
人生係冇可能盡善盡美，冇可能每一次都可以用最好嘅姿態去迎接機會。更多時我哋需要嘅可能係接受缺憾、見步行步，柔韌咁面對人生嘅未知。唔好比既有想像限制自己，用當下最好嘅自己去行好每一步，用每一步嘅經驗去為下一步鋪路。
如你願意支持我繼續努力，可以請我一杯咖啡☕
已開設Patreon，歡迎支持我繼續書寫香港、支援同路人
https://www.patreon.com/sarenechan14
如你願意支持我繼續寫作，不妨拍下手掌，多謝:)
