擴闊對粵語填詞嘅想像

Published in

語絲論叢

8 min readNov 27, 2017

睇到題目，各位可能會諗：吓？噏乜呀？不嬲都有粵語流行曲㗎啦。之不過，諗深一層，一直以嚟，我哋大多數嘅廣東歌，都只係粵音合樂入文，行文依循官話白話文詞彙同語法，最多間中夾雜下啲粵語詞彙呀噉，並非名符其實嘅粵語流行曲。借用HUMA2031 — The Cantonese Language姚玉敏教授嘅例子，即係《愛得比你深》（張學友嘅歌）而唔係《愛得深過你》。

曾幾何時，粵語白話合樂填詞（合樂即係啱音，所以齋rap唔計，唔好話區區做乜唔提LMF），喺主流樂壇都幾活躍下㗎。許冠傑、黎彼得呢對黃金拍檔大大話話寫咗唔少經典名曲，渾然天成；嗰陣時都有徐小明《青春痘》等曲，再唔係，尹光啲口水歌、李秋霞啲鹹歌，你估呢咋流㗎？黃霑手詞巴閉就唔使講添啦，區區自問就填唔到《道》呢篇咁絕核嘅詞喇。區區幾歲人仔嗰陣重有錄音帶（卡式帶），嗰陣時重聽緊餅帶啲兒歌，而家都重記得首《小飛俠》都係粵語詞㗎。

可惜「世事多變，豈可盡如人意」（《要爭取快樂》），全口語唔係個個都buy，黃霑本人都曾經有諗過推動粵語流行曲全口語化，奈何聽眾反應極差[1]。去到零二年，黃偉文同伍樂城發起「新廣東歌運動」[2]，搞全口語實驗，至少有五項成品，李彩樺首《你唔愛我啦》係當中嘅代表作，亦係最為人所識，出到嚟反應又係麻麻，評價好壞參半，認真慘情。之後粵語填詞作品數量至少喺主流明顯大減，冇幾耐都重有Twins嘅《你講你愛我》，再之後有林海峰同佢成班老友嘅《男子組》，一零年鬼才林敏驄一貫無厘頭風格，同溫拿（係咪樂壇瘀血就見仁見智啦）填咗首《樂壇風雲》，零零丁丁小貓三四雙噉囉。非主流、地下嗰邊都算好過主流嘅，近年嚟有ToNick、神奇膠，Heyo有首《喜愛射毛》串爆蒲精，就連「少開你阿爸」嘅尹光都出嚟唱《你老闆》。形勢係就係悲咗啲，但都未至於要學肥媽大歎一聲「嘥氣」（《要爭取快樂》）。

其實，有咩好排拒啫？大佬啊，母語嚟㗎，嫌棄佢庸俗低俗，噉你講開廣東話係咪就會俗埋一份先？妖孽六八九份人再賤都好，喺立法會呢個公開、正式嘅場合，都係用廣東話宣讀施政報告㗎。堂堂粵語出得廳堂，又點會失禮呀？場合如是，題材亦如是。君不見《制水歌》《半斤八兩》《鬼馬雙星》《賣身契》《加價熱潮》《最佳拍檔》《尖沙咀Susie》《日本娃娃》《打雀英雄傳》《財神到》，題材多樣，包羅萬有，莊諧兼備，雅俗共賞？許冠傑嘅傑作固然係香江傳奇，而家亦都有唔少歌證明畀我哋睇：廣東話一樣有資格，一樣有本事！再者，「新廣東歌運動」未竟全功，亦都未必關粵語填詞事。譬如《你唔愛我啦》猛咁啦啦啦，有人話用字貧乏，我就話係副口吻太傳神，港女格累事。無可否認，呢首歌正如Wyman所講，係「港女始祖」。照噉講，淨係識得「嗎」到落尾，正一傻的嗎，都好唔得幾多㗎咋，噉樣何嘗唔係膚淺呢？由此可見，所謂乞人憎之處唔係在於廣東話入文。每當諗起台灣閩南歌、客家歌受當地人擁戴愛護之時，粵語填詞就重未得到主流大眾認同甚至歡迎，區區都不免唏噓。講真吖，又唔係要全盤否定或者排斥粵音入文，同埋以前常見嘅通俗文言[3]，以至蔚然成風嘅三及第，優秀作品一樣照讚照欣賞不誤。「原諒我這一生不羈放縱愛自由」、「滄海一聲笑，滔滔兩岸潮」都係「香江不朽名句」，「條條大道條條係路」（《道》），區區同好多同路人、知心友都係想「守護我的獨家村」，用最自然嘅母語暢所欲言、抒我胸臆，流露真切嘅情感，唱出心聲噉啫，何罪之有？有幾荒誕可笑、不切實際、癡人說夢？「我自求我道」（《道》）！咁多位，係時候擴闊對粵語填詞嘅想像，諗下復興粵語填詞嘅可能，延續「新廣東歌運動」嘅精神，深耕細作，令到佢超越運動嘅層次，遍地開花！

[1] 黃霑〈粵語流行曲的歌詞創作〉頁11，http://www.library.ln.edu.hk/eresou...

[2] 評論可見 http://cantonpopblog.blogspot.hk/20...

[3] 《光明頂》有一集談論過：https://www.youtube.com/watch?v=MJd...

道 https://www.youtube.com/watch?v=SGg...

小飛俠 https://www.youtube.com/watch?v=pC0...

跳飛機 https://www.youtube.com/watch?v=aR9...

水滾茶靚 https://www.youtube.com/watch?v=_Ca...

Last Christmas https://www.youtube.com/watch?v=w2T...

關心菊英 https://www.youtube.com/watch?v=F2j...

喜愛射毛 https://www.youtube.com/watch?v=zij...

起勢維穩 https://www.youtube.com/watch?v=bYD...

其實毒撚一個過平安夜更開心 https://www.youtube.com/watch?v=c1o...