填詞分粵語二五調、三六調？
呢度針對嘅，係二五調、三六調合流嘅現象。三五調合流就唔太適用嘞。
就算本身分，都唔使趕住撳上一頁嘅。不妨睇埋落去，覺得有用嘅，傳畀有需要嘅朋友睇吖。問題
話說某啲朋友反映過自己聽嗰陣有二五調、三六調不分嘅跡象，例如唔知：
- 「椅」係第二調，「耳」係第五調；
- 「意」係第三調，「義」係第六調。
留意，淨係聽嗰陣。講係會分到嘅，會好自然發出相應聲調。只係聽嘅時候，佢哋嘅困難可能在於：
- 辨認調值（箇中關鍵元素係音高），或者；
- 將音高同調類配對起嚟。
打個樂底嘅譬喻：佢哋明明有返咁上下音準，但係音感就差些少；又或者，稍為掌握到相對音準（relative pitch），了解而表達到前後音程，而未有絕對音準（absolute pitch）去直指邊粒音。
亦即係：使其然，而不知其所以然。試諗諗，呢個問題係幾咁「後設」！係關於「認知如何認知」啊。堅奇特。
一方面可以話呢個現象好奇特，而另一方面可以話合流冇咁「隨意」。一四、二五、三六，正正就係平、上、去聲，認真佮佮冚。咁樣睇，其實都分得開喎。得音高要留意。（注意：入聲呢個調類相對意義唔大，尤其喺聲調嘅音高方面。）
順便推文
咦？玩音高呀？咁不如試下換個角度，用下啲聽落都好騎呢嘅方法吖——
填詞！
唔係好複雜㗎咋！
讀友有畀面睇過呢篇嘅話……
應該都見識過「三四二零／尖亢下沉」嘅應用。今次都係一樣。
填詞將聲調配搭旋律嚟講，調值嘅「終點」重要過「起點」。一二調歸做最高嘅「三／尖」、三五調歸做次高嘅「四／亢」。咁睇嘅話，二五調係「尖亢」，三六調係「亢下」，屬於唔同層次。希望呢種分野會加強二五、三六迥異嘅觀感。
2/5
首先着手嘅係2/5，比較容易。
最頂張圖大概描述咗各個聲調嘅音高走勢。第2調可以聯想到問句嘅上升句調（rising intonation），唔只英文，咁應該係最容易認知嘅。掌握咗第2調嘅感覺未？（去到個「未」字就有問句上升句調嘞。）記住呢個升到頂嘅感覺。
跟住可以從拖長嚟讀嘅方式入手。
- 聽真啲第2調，佢嘅「終站」會聽到第1調咁款：史——詩
- 相比之下第5調冇第2調升得咁高，「終點」會聽到第3調咁款，本身起點都低過佢：坐——錯
簡單啲嚟講：
- 第2調~第1調：高（「三／尖」）
- 第5調~第3調：低至中（「四／亢」）
借「我瞓喇早唞」做例。呢句可以fit入周大文豪《六天》副歌嗰句「我慣了傷心」。
a.) 我5慣3了5／傷1心1
b.) 我5瞓3喇3／早2唞2
頭三拍係同一粒音，填到第三調同第五調。後兩拍高音啲，重覆，後兩拍高音啲。後兩拍呢，a、b分別用第一調同第二調嘅字，都填得入。
咁即係話，第二調同第五調雖然都係升調、上聲，不過第二調開首高音啲，仲會上到頂。
3/6
「亢」類嗰頭高不成，呢頭就低不就。今次就高過第六調（「下」類）。
用陳百強嘅《有了你》，或者感覺會強啲，事關「有了你」同「覺」都係屬於同一粒音d，而中間嘅「頓」就係低啲嘅t,：
c.) 有5了5你5 頓6覺3增加風趣
d.) 有5了5你5 頓6覺3輕鬆寫意
第5調嘅「有了你」同第3調「覺」都係屬於「亢」類，而第六調嘅「頓」屬於「下」類。「亢」類係高音過「下」類。
我暫時未諗到更加好嘅方式，唯有利用住呢度三五調嘅共通點，去幫手分3/6先。但係遇着三五調合流就會冇佢符，所以拙文一開頭就話呢個方法唔適用喺三五調合流度。
延伸閱讀（同拍手）
呢篇文可謂舊文嘅應用版：
（嗰陣唔知張群顯早就講過tone-melody match……）
