置地記者 LM Reporter
Aug 25 · 4 min read

2019 年 8 月,香港好熱。連綿不絕嘅抗爭,由中環遮打花園,到油尖旺、黃大仙、將軍澳、荃葵青⋯⋯應該就只差南區同離島,就真係遍地開花。

記憶之中,香港人咁鍥而不捨嘅抗爭,對上一次係 2014 年、持續 79 日嘅佔領運動。如果再數上去, 2003 年嘅反政府浪潮,其實都唔係搞咗好耐,但勝在有效率,三兩下手勢就令高台問責下台。

相比之下, 2019 年嘅示威,有大有小,有和理非有勇武,但截至執筆為止,真係毛都贏唔到一條。人命就冇咗幾條,肉眼盲咗幾隻,手腳被斬嘅又唔知幾多人。凡此種種,都係實牙實齒嘅犧牲,普羅市民捐錢或者出嚟遊行集會,已經變成舉手之勞。

特首林鄭月娥講得啱架,我哋都攰喇。至少我作為一個寫作嘅人,書寫「反佔中」引發嘅爭議,都寫到有啲悶、有啲膩。我相信好多細我十幾廿年嘅朋友,都情願呢個暑假可以無憂無慮咁去消遣娛樂、打波唱 K 、坐 Cafe 打卡,而唔係身水身汗,儲埋啲錢走去買 gear 、甚至硬食催淚彈或胡椒噴霧。

但請循其本。到底呢三個月以嚟,係邊個人,或者邊一個團體、派系,令到香港亂局不止? 6 月之星當然係死都唔講「撤回」嘅林鄭月娥;而 7 月份最令人印象深刻嘅當數元朗恐襲白衣人;而到 8 月,經歷過一星期嘅和理非集會 (包括 「畫面好靚」嘅 823 手牽手) 經歷過一連串白色恐怖、秋後算帳 (國泰、機管局、港鐵⋯⋯) , 8 月 25 日,警方出動水炮車,甚至有警員拔出左輪,開出荷槍實彈嘅第一槍,並向跪求嘅市民一腳伸開。講畫面,香港警察先至係搶 fo 達人。

當林鄭月娥故技重施,嘗試擺個「溝通對話平台」去畀一啲立場溫和、形象相對地中立嘅社會賢達坐埋一枱,最低限度做個樣去諗方法排解社會怨氣嘅時候,點解警方對示威者使用嘅武力不斷升級?點解羈押示威者可以搞到最少 30 人骨折?點解可以無緣無故迫令被捕女生剝光豬?

呢個現象,抽離啲睇,係十分之精神分裂嘅。無疑,香港政府有中央撐腰,以「止暴制亂」為首要目標,並有輿論機器瘋狂抹黑示威者、動不動就將群眾同昔日泛民領袖陳方安生、李柱銘、何俊仁及黎智英扯上關係,甚至指香港示威者接受西方列強煽動及資助。但係,林鄭月娥同財政司司長陳茂波望住香港經濟及民生狀況持續惡化,睇住盤數越嚟越肉酸,或多或少都有壓力要穩住局面,免得搞死旅遊、零售等行業。

北風與太陽嘅故事,大家冇聽過十次都有八次。用常理思考,政府稍作退讓,正式宣布「撤回」 、成立獨立調查委員會、酌情處理部份被捕人士嘅控罪,可能已經足以打散、分化部份市民。乜嘢爭取雙普選,根本無關宏旨。你是但畀嚿錢鄭若驊或者盧偉聰做安家費下台、退休,又一班市民收貨、收聲。

唔用太陽去溶化冰封嘅民意,一係你就豁出去,出動解放軍同宣布戒嚴,甚至 end game 說明一國兩制已死,咁樣快狠準,先至係強勢領導、極權統治嘅表現。但係解放軍演練一直只聞樓梯響,當權者只係不斷運用現有程式或行政手段,禁制市民去機場集會、迫令港鐵停止示威一帶嘅服務,越搞越糊塗同四不像。

要解釋當局而家唔湯唔水嘅處理方法,方向似乎係當局內部都有路線嘅分歧。林鄭月娥制肘極多,例如話受制於警隊,唔能夠成立獨立調查委員會;例如話警隊已經混入咗一啲非正式編制嘅人物 (係大陸公安、武警、軍人抑或本地社團人士就不得而知) ,呢班僱傭兵易請難送,搞唔掂;例如話政府體制外有其他紅色人士號召本地有勢力人士去勇武對抗「暴徒」,呢啲派系政府本身都冇足夠政治能量去擺平、收伏。

入秋在即,香港嘅氣溫下降只係時間嘅問題。但民心喺政府一邊懷柔,警隊及親共人士另一邊鐵腕嘅招呼之下,一冷一熱,只會繼續感冒、攝親、發燒。即使數月以來被捕人士迫近一千,即使當初大家估計真正勇武或者「夠膽死」嘅示威者大約都只係呢個數,但係人心會變,原先唔敢企到最前嘅人,喺連串事件之後亦可能越走越前。今年嘅十月一日,香港社會面對呢個公眾假期嘅方式,或者都不似當局預期。

圖片來源: https://flic.kr/p/2h26REe by Studio Incendo

賴叔睇育

當再無事可閱,賴叔唯有睇育,睇多啲育。

置地記者 LM Reporter

Written by

八十後,土生土長。中學志願做戰地記者,大學主修新聞與傳播,畢業後曾寫波經、跑體育新聞、通宵報新聞,方知衣不稱身。 轉工變轉行,轉咗入銀行,穿梭後勤、中場、前線,由九龍東殺返入中環。近年轉戰金融服務業,見盡港、中、外資機構職場 XO 極品人和事。 返工寫字,放工繼續寫字。相信文以載道,字以結緣。說話唔多,怕出口傷人。

賴叔睇育

當再無事可閱,賴叔唯有睇育,睇多啲育。

Welcome to a place where words matter. On Medium, smart voices and original ideas take center stage - with no ads in sight. Watch
Follow all the topics you care about, and we’ll deliver the best stories for you to your homepage and inbox. Explore
Get unlimited access to the best stories on Medium — and support writers while you’re at it. Just $5/month. Upgrade