「無人生哲理能急救你」

書展又嚟喇,又係大家諗下去唔去買新書、執平書或者搵作者簽名同合照嘅時候。今時今日,博客來、 Book Depository 以至 Amazon 等網上平台買書往往比喺門市平兩三成,除非書展出現跳樓價散貨,否則精打細算嘅朋友未必會專誠去會展一趟。

無論係去書展抑或係去書店,有時大家都係想去搵啲嘢。搵乜嘢?事前你未必知,事後買咗書,就當係搵到答案。生活入面有咩問題,最近有咩煩惱,行過書架見到《原來你非不快樂》七隻大字,彷彿有個人向你招手,請你聽佢細細聲講故仔畀你聽,然後你如釋重負,一天都光晒。

除咗快樂不快樂,今晚食乜餸、阿仔做乜嘢補充練習、去台北旅行散心有咩地方適合消磨時間,從功能性嚟講,一本書就似一支咳藥水、一粒 Panadol ,頭痛可以醫頭、喉嚨痕就止咳。

亦因為咁,我近年少咗買書。

如果講緊讀大學嗰陣,唔使上堂出旺角去樓上書店,基本上係指定動作。樂文、田園、榆林⋯⋯逐間打書釘、儲起樂文十蚊雞現金券,今次夾硬買夠一舊水去慳返十蚊兼且可以 keep 返張現金券,都係一時嘅回憶。講到拍拖或者同朋友出街,未夠鐘入戲院或 K 房坐低,二樓書店亦都係駐足歇腳嘅好選擇。

當年買書係容易嘅,因為思想並無既定框架,要套用女性主義觀點睇世界盃直播畫面充斥火辣美女又得;要學蔡東豪飾演嘅原復生拆解李嘉誠收購海外企業嘅「空手道」又得;要睇 Wasabi 同林一峰喺男男戀愛界別跌跌碰碰嘅經歷,亦得。當年嘅屈穎妍仍然係屈穎妍,李柱銘仍然頭頂有光環,要抱住開放嘅心態接納百家之說,真係唔難。

多得職場在職培訓,畢業之後嘅信念逐漸定型, Facebook 畀大家各自表述,仲畀大家封鎖唔 likey 嘅想法、同睇法唔同嘅朋友絕交。係嘅,生活瑣事、為口奔馳已經夠麻煩,既然最近比較煩,又何苦喺社交網絡消閒都要篤眼篤鼻?

有咗「同溫層」,要選擇性失明就變得更容易。片刻嘅愉悅同方便,代價就係慣性喺同一個方向、同一個範圍入面搵答案。原地在轉,轉不出快樂仍在轉。轉轉下,或者變成鑽,鑽牛角尖個鑽。鑽得太入,到發現自己進退維谷嗰陣,方知自己褪唔返出嚟。

喺營營役役嘅生活入面,要停低思考啲稍為複雜嘅問題已經唔容易。要思考人生就更加唔好講笑。咁要搵答案,咪搵到三分鐘叮熟嘅即食方案囉。啲咩《雞湯》呀,或者其他 self-help 嘅書籍,作用都係畀人按圖索驥,照單執藥。差在未畀埋 template 你咋。

問題係,生活嘅問題就好似紙包雞包紙包雞包紙咁,一層一層堆積而成,無話一本天書或者補充練習可以幫到你。心經之類嘅書籍畀個思維你,歷史書畀其他人嘅經驗你,科學大自然叢書畀你抽空思緒向動物學習,流行文學畀你沉溺一下代入一陣⋯⋯輾轉之間,你嘅問題就好似繞線繞到黐咗線嘅耳筒咁,慢慢慢慢搵到個出口,慢慢慢慢就解開個結、鬆返開。

但唔係一朝一夕嘅事,亦唔係三言兩語可以了事。對一本書或者一個作者抱返一個合理嘅期望,對人、對自己都公平啲。