置地記者
Aug 9 · 5 min read

頭盔:以下內容全屬賴叔個人所見所聞,保證取樣不足、以偏概全 (香港地大大話話都幾十萬個來自中國大陸嘅勞動人口, if not millions) 。內文可能引起讀者不安、反感或者心浮氣躁,建議心智未成年嘅小朋友搵大人陪同閱讀。


因為工作關係,賴叔喺職場上遇到唔少母語係普通話嘅中國人。有別於大家平時喺油尖旺見到,拖住個篋、財大氣粗嘅遊客,佢哋喺學識上、修養上以至行為舉止上,都相對地文明。即係,好似你炎炎夏日暴曬完一輪,入到商場涼冷氣咁,會不其然「吖~」一聲,感嘆重返人類文明社會嘅愜意。

我冇誇大。如果你攤開佢哋嘅履歷,哈佛牛津劍橋,儲齊一套可以召喚神龍,任職過嘅大行大摩細摩 Goldman 美林,齊章到開以槓上開花。佢哋當然唔會喺你面前吐痰或者大小便,著衫嘅品味亦相對地克制唔浮誇。

平時呢,大家都係實事求事嘅。你有你發大財,我有我奉公守法,雙方嘅目標各異,但立場可以一致。最基本嘅兩點,就係公司打開門就要做生意;以及犯法坐監嘅嘢千祈唔好做。中間嘅生存同演繹空間,其實都闊過西隧嘅 (點解唔係闊過紅隧?因為西隧來回多兩條行車線囉,冇幾可塞車架) 。

咁賴叔都有同呢啲浸過下鹹水嘅中國人同枱食飯,禮數上,如何你推我讓,互相幫大家筴餸、斟茶遞水,都不缺。喺香港,佢哋唔會郁啲就攞支茅台或者二鍋頭出嚟豪飲,比較常見嘅係煞有介事咁攞住隻高腳杯喺度 fing 啲葡萄酒。


2019 年 6 月開始,喺呢啲飯局上面,大家嘅話題好多時都圍繞住街頭抗爭。「反送中」?佢哋唔擔心,反正北京山東上海湖南都係佢哋故鄉。佢哋關注嘅,係香港嘅亂局幾時會完,唔好阻住佢哋做生意、見客、拉關係。

我唔知道大家會唔會對住佢哋有一絲盼望,覺得都叫接受過外國高度教育,或者與鬼佬共事多年,點都會有可能受到潛移默化,甚至接納西方世界嘅民主、自由價值吖?

根據我嘅了解 (Disclaimer AGAIN: sample size 好細) ,以上嘅諗法,其實係一廂情願。乜你冇聽過咩叫「先入為主」咩?除非嗰個人本身已經喺英美等西方國家長大,連父母本身都係信「普世價值」嗰套啦,否則,生於中國大陸,本身就有一套「富中國特色」嘅世界觀植根心中 更莫講話國家自小開始不遺餘力咁灌輸嘅民族意識及愛國情懷。

所以呢,最近呢個星期,當我從呢啲港漂或海歸嘅口中或社交網絡中,得知佢哋嘅立場比藍絲更藍,認定發動罷工嘅係暴徒、覺得中央政府唔係唔管,只係未到時候出手、認為香港人自我中心、自私⋯⋯

原因?佢哋嘅視點,或出發點,從來都係五星紅旗嘅中華人民共和國。香港,喺佢哋嘅眼中,只係一個畀佢哋搵食嘅地方,但講到尾都係中國「不可分割」嘅一部份。換句話講,香港人並唔應該有自由意志,應當服膺於國家、喺國家大義當前,槍口一致向外咁對抗別有用心嘅外國勢力。

又換句話講,乜嘢黑警亂掟催淚彈、元朗白衣人恐怖襲擊、林鄭特首龜縮唔見人,喺海歸同港漂嘅眼中,都只係因為香港人唔聽話,需要被教訓同管束嘅後果。「如果林鄭話『壽終正寢』你哋就收貨、唔好搞事,咪唔會搞到今日咁嘅田地囉!」

另一個常見於在港工作嘅中國人嘅諗法,係香港人因為買唔起樓、無法向上流動,所以對政府懷著怨氣,藉政治事件出嚟搗亂。佢哋會覺得,如果人人有得「上車」置業,年輕人睇到飛黃騰達嘅希望,就會專心發展事業,拼經濟、保民生⋯⋯

好簡單講,都係傳統上「衣食足而後知榮辱」嘅思想。對於香港人為咗一啲核心價值而不惜犧牲經濟,中國大陸嘅人民係無法理解嘅。


「反送中」嘅抗爭持續咗兩個月,相信去到十月一日前後,都會有個結局,有個定局。特區政府今日已經開始將視線轉移到施政報告,以及一系列旅遊、貿易等經濟數據轉壞嘅訊息。

喺警方嘅 propaganda 以外,林鄭施軟功諗派糖或者振興經濟,逐漸會將一啲中間派或立場溫和、唔堅定嘅市民拉走。咁更莫講話一啲惡名昭障、關鍵時候出嚟講啲似是而非嘅詭辯、勸香港人將命運交託畀代理人 (即係「大台」) 嘅政評人啦。

老實講,我真係唔知場仗仲可以點打,唯有堅持, make everyday count ,期望商界甚至外國嘅政要能夠發揮影響力,令香港及香港人得到一個比較好嘅結果。 But for now , we are Hong Kong ,香港人加油。

圖片來源: https://flic.kr/p/pXTLrQ by Studio Incendo

賴叔睇育

當再無事可閱,賴叔唯有睇育,睇多啲育。

置地記者

Written by

八十後,土生土長。中學志願做戰地記者,大學主修新聞與傳播,畢業後曾寫波經、跑體育新聞、通宵報新聞,方知衣不稱身。 轉工變轉行,轉咗入銀行,穿梭後勤、中場、前線,由九龍東殺返入中環。近年轉戰金融服務業,見盡港、中、外資機構職場 XO 極品人和事。 返工寫字,放工繼續寫字。相信文以載道,字以結緣。說話唔多,怕出口傷人。

賴叔睇育

當再無事可閱,賴叔唯有睇育,睇多啲育。

Welcome to a place where words matter. On Medium, smart voices and original ideas take center stage - with no ads in sight. Watch
Follow all the topics you care about, and we’ll deliver the best stories for you to your homepage and inbox. Explore
Get unlimited access to the best stories on Medium — and support writers while you’re at it. Just $5/month. Upgrade