英格蘭:似是故人來

四年一度嘅世界盃殺到埋身,中環人又如何免俗?置記作為意大利球迷,今屆賽事理論上關我叉事,不過香港人接觸得最多嘅往往係英格蘭超級聯賽,對於英格蘭總有多少情意結。適逢今日深夜英格蘭出戰首場分組賽,對來自北非嘅突尼西亞,我就開筆講兩句。

英格蘭教練修夫基沿用 3–5–2 陣式,前線由哈利簡尼及史達寧領銜,中場有連加特及阿里後上,輔以佐敦軒達臣出任防中,兩邊翼衛艾殊利楊格及查比亞瞻前顧後,三中堅麥佳亞、史東斯及卡爾獲加各有分工,門將碧福特把手獨木關。

英軍一開局節奏明快,三扒兩撥就有機會策動三線快攻,由佐敦軒達臣放個長傳畀阿里喺右路傳中,中間一輪混亂之後,連加特切入中路執個死雞,奈何省中門將。連加特及後左路出波畀史達寧,可惜史達寧步韻唔啱未能近門抽入。以上幾位年輕嘅英格蘭正選早段前場緊迫對手,為英軍製造一浪接一浪嘅攻勢。

終於,首個入波喺十分鐘出現:艾殊利楊格左路開出角球,遠柱嘅麥佳亞同史東斯都無人看管,後者頭槌攻門被門將拍出,哈利簡尼伏兵門前先開紀錄。

英格蘭喺開賽頭 20 分鐘所表現出嘅靈巧、迅速、各司其職,其實好唔英格蘭。如果你對於朗尼 hold 住個波唔知想點、林柏特同謝拉特喺中路格格不入等尷尬場面仍然記憶猶新嘅話。正如先前所講,英格蘭嘅三中堅各有分工,史東斯坐鎮中路分波;麥佳亞左路與艾殊利楊格配合;有死球攻勢更加係泰山壓頂頻頻埋門;卡爾獲加不時餵長波畀查比亞或阿里右路快放,令球隊進攻相當流暢。連加特勤力跑動亦為佢帶來兩次黃金機會,可惜一次喺尾柱撻Q ,另一次推過門將但係個波撞柱彈出底線。

睇波經驗有返咁上下嘅球迷都知道,當風和日麗、事事順境嘅時候,你冇好好把握機會,風水輪流轉嘅時候就可能遭受懲罰。突尼西亞攻勢唔係話特別多、特別到肉,不過一次傳中,卡爾獲加手快快㩒低咗對方嘅球員,就咁畀判罰十二碼,突尼西亞一聲唔該就扳平。英格蘭都有哈利簡尼喺混戰中被人箍跌,但係球證同 VAR 都冇乜表示。

下半場初段局勢冇大變化,突尼西亞企穩咗陣腳,英格蘭亦再冇行雲流水嘅攻勢。如果要點名批評,外號 $terling 嘅史達寧上腳過多,但又突破唔到對方嘅防線,傳送質素亦都麻麻地,比較令人失望。 68 分鐘,修夫基將呢位曼城前鋒換走,由曼聯青訓產品華舒福入替。

喺熱刺表現係威係勢嘅阿里今場唔知係咪太掛住丹麥隊友艾歷臣,表現同球會層面有一段距離,不過中路後上嘅任務有連加特分擔 (及浪費) ,佢喺右邊同熱刺隊友查比亞配合比較多,只可惜無法輸送畀箭頭哈利簡尼。 79 分鐘,洛夫斯捷克入替阿里,呢位車路士青訓產品喺右路都有幾次落底傳中甚具威脅。

不過,三獅兵團對住全軍退守、禁區周邊有八、九人佈防嘅突尼西亞,破解之法始終係死球戰術。補時一分鐘,佐敦軒達臣右邊開出角球,麥佳亞力壓群雄頂向遠柱,哈利簡尼再次伏兵門前頂入,總算令英倫三島球迷收貨,令 Facebook Newsfeed 醒一醒。

Image for post
Image for post
來源:FIFA官網截圖

英格蘭今屆派出平均年紀僅僅過 26 歲嘅 23 人大軍,今場正選平均年齡更加只得 25 歲多啲,除咗年紀最大嘅係 32 歲嘅艾殊利楊格,其餘主力年紀介乎 23 至 27 歲, 11 名正選球員夾埋連 250 頂喼帽都冇 (根據 Wiki 及本人心算,總數係 248 ,平均每人 23 次上陣) 。如果你要一個參考數字,上一代巨星朗尼、謝拉特同林柏特代表英格蘭上陣次數係 119 、 114 及 106 次,即係而家英格蘭正選嗰班加埋先至同兩個名宿嘅經驗值差唔多。

難怪有說今屆英軍係近代星味最淡薄嘅一隊。不過隊中冇一個明顯嘅大佬,或者冇一堆性格巨星,都有好處嘅:大家都有鬥心追逐榮譽,大家都有潛質成為下一個梁朝偉,不過時間仲喺 1984 年,成班新紮師兄,其實冇咩條件耍大牌,只可以喺一代名將、踢而優則教嘅修夫基麾下服從團體指示。呢種整體戰,喺球員經歷過歐陸教練如哥迪奧拿、高普同普捷天奴嘅教導之下,基本上擺脫咗昔日英格蘭高Q 大棍、長傳急攻、一味靠快馬突破嘅悶局。

之不過,大賽經驗不足嘅初生之犢,點樣面對逆境、點樣喺國民期望甚殷之下重拾領前優勢,始終涉及心理質素問題。我唔係話有朗尼喺度會好啲,畢竟佢作為隊長,除咗唔錫力咁返中後場追波去鼓動隊友,其實領袖才能都係有限公司。但係當場上最富國際賽經驗嘅都已經係佐敦軒達臣同史達寧,而戴上隊長臂章嘅哈利簡尼本身唔係啲咩有感染力嘅領袖嘅時候,教練修夫基就有更大責任去訓詁呢班後輩,例如話攞返 1996 年歐洲國家盃自己射失十二碼嘅經驗嚟講⋯⋯ (誤)

首輪賽事過後, G 組榜首係比利時,英格蘭得失球差稍遜排第二,突尼西亞第三,榜末係巴拿馬,英格蘭要出線嘅話,其實唔難:只要嚟緊贏巴拿馬,而突尼西亞贏唔到比利時就搞掂。

又咁講,呢隊英格蘭可能志不在此,兩年之後嘅歐洲國家盃、四年之後嘅世界盃,先至係呢一代英軍大勇大熟之時,回望西班牙同德國兩隊登上世界之巔之前,同樣經過播種、栽種、收成嘅階段。修夫基如果可以繼續帶隊,頂得住國內傳媒嘅壓力,英格蘭呢班生力軍,或可再創 1966 一代嘅佳績。

賴叔睇育

當再無事可閱,賴叔唯有睇育,睇多啲育。

賴叔@職場心經

Written by

www.patreon.com/shuklai 八十後,土生土長。中學志願做戰地記者,大學主修新聞與傳播,畢業後曾寫波經、跑體育新聞、通宵報新聞,方知衣不稱身。 轉工變轉行,轉咗入銀行,穿梭後勤、中場、前線,由九龍東殺返入中環。近年轉戰金融服務業,返工寫字,放工繼續寫字。相信文以載道,字以結緣。說話唔多,怕出口傷人。

賴叔睇育

當再無事可閱,賴叔唯有睇育,睇多啲育。

賴叔@職場心經

Written by

www.patreon.com/shuklai 八十後,土生土長。中學志願做戰地記者,大學主修新聞與傳播,畢業後曾寫波經、跑體育新聞、通宵報新聞,方知衣不稱身。 轉工變轉行,轉咗入銀行,穿梭後勤、中場、前線,由九龍東殺返入中環。近年轉戰金融服務業,返工寫字,放工繼續寫字。相信文以載道,字以結緣。說話唔多,怕出口傷人。

賴叔睇育

當再無事可閱,賴叔唯有睇育,睇多啲育。

Medium is an open platform where 170 million readers come to find insightful and dynamic thinking. Here, expert and undiscovered voices alike dive into the heart of any topic and bring new ideas to the surface. Learn more

Follow the writers, publications, and topics that matter to you, and you’ll see them on your homepage and in your inbox. Explore

If you have a story to tell, knowledge to share, or a perspective to offer — welcome home. It’s easy and free to post your thinking on any topic. Write on Medium

Get the Medium app

A button that says 'Download on the App Store', and if clicked it will lead you to the iOS App store
A button that says 'Get it on, Google Play', and if clicked it will lead you to the Google Play store