開學日
Sep 3, 2018 · 3 min read
開學日對於賴叔嚟講,曾經有唔同嘅意義。
喺對上十幾年,開學日都代表多返好多人搭地鐵巴士,等車時間以幾何倍數增加。賴叔除咗早啲出門口嘗試避免遲到之外,其實係冇咩感覺嘅。呀有,就係 Facebook 上好多朋友帶仔女開學放閃嘅相囉。但事不關己, Happy Friday ,唔好上心咯。
再數上去,即係講緊 SARS 前後幾年,賴叔風華正茂 (?!) ,開學日可以係天地堂,可以係 day-off ,意義只係喺宿舍打牌唔好打到朝早六點,兩三點好瞓喇。至於返學上咩堂、同咩人一齊返、邊個教,其實喺揀科嗰陣已經大概知道,冇咩好期待或興奮。
再早多幾年,開學日係充滿住未知嘅。要鬥早返去課室霸座位 (雖然九成都係再編過,或者老師會見到你同隔離位太好傾而故意拆散你哋) 、要爭 locker 用、要選班長、要估下邊位 Miss 或阿 Sir 做班主任。彷彿一切都重新 reboot ,上個學年有咩柒人柒事,新學年都可以盼望好似粉筆字咁抹咗佢。雖然更多時候都係畀人攞返嚟講,「佢咪上年音樂堂對住 Miss 流口水嗰個閒塞仔囉」。
又再早多六七年,開學日係畀老母鏟起身,孭住啲暑期作業、作別超任同 Gameboy 嘅受難日。都有新同學新老師嘅,但係日子不外乎等小息落小賣部買支兩個半嘅水桶形玻璃樽忌廉、六毫子嘅旺旺仙貝…


