Member preview

體育精神,身不由己

世界盃打到最後一輪分組賽,出現南韓贏波出局、日本輸波晉級嘅有趣情況。其中日本同塞內加爾從 (a) 得分、 (b) 得失球差、 (c) 入球、 (d) 對賽成績、 (e) 對賽得失球差、 (f) 對賽入球都一樣。結果要靠計算大家嘅公平競技分數,日本以些微點數壓過塞內加爾出線。

又,其實最後嗰三樣 (d) - (f) 喺兩隊、單循環賽制入面係多餘嘅。喺三隊同分、同得球及同失球,再秤圍內對碰嘅賽果,先至會有意義。

講返件事。開賽前,塞內加爾 (4分) 同哥倫比亞 (3分) 嘅勝方可以出線,和波的話,塞內加爾多哥倫比亞一分出線。另一邊廂,日本 (4分) 只要唔輸畀出咗局嘅波蘭至少有 5 分,同樣肯定出線。

日本今場作出六個調動,教練賽前表示球隊喺炎熱天氣下作賽,必須挑選體能狀況最好嘅球員上陣。以日本一班正選喺頭兩場分組賽搏到盡嘅情況睇落,教練輪換其實相當合理,應該唔係輕敵。畢竟體力 100% 嘅後備球員,係可能比起體力 60% 嘅球星更有用嘅。

半場四隊波都冇波入,係哥倫比亞有主力占士洛迪古斯因傷被換走。牌面睇,日本同塞內加爾仍然樂觀。不過,波蘭下半場 14 分鐘透過死球戰術攻入一球,令日本跌落第三名,瀕臨出局。日本落後之下的確有一段搶攻,但一班二線球員質素始終係有限公司,攻唔入都冇辦法。

不過生命滿希望,前路人哋創。哥倫比亞喺下半場 29 分鐘打開紀錄,假設戰果維持不變,哥倫比亞會以 6 分首名出線,日本同塞內加爾同得 4 分,得失球同樣係零,入球同樣係 4,唯有比較黃紅牌數字分高低。


問題嚟喇,塞內加爾喺餘下嘅比賽焗攻就梗嘅,但係日本呢?

日本要考慮嘅係兩個情況:

  1. 哥倫比亞保持勝局,自己嘅任務就係唔好再失波以及唔好攞牌;
  2. 哥倫比亞被追平,自己就要入返粒。

當然,你可以話我漏咗塞內加爾反勝嘅可能性,但機會太細無謂多講。

日本喺哥倫比亞入波之後嘅傳球路線圖。圖片來源: Twitter (https://twitter.com/RealSteveScores/status/1012374357975298048)

喺一個理性嘅情況下,日本嘅目標係出線 16 強,原則係唔好為非作歹、出術插水。由於公平競技係考慮嘅因素之一,日本喺道德方面都受到制肘,唔可以打茅波。結果,日本喺球賽嘅最後十分鐘但凡控球在腳就喺後場互傳。你可以話佢不思進取嘅 (事實上好多傳媒同網民都係咁諗) ,但我更傾向日本隊衡量過哥倫比亞失波嘅可能性,之於自己空群出擊而多失一球、以至為咗防守而攞牌嘅風險,從而斷定控球在腳、搓到完場係最安全嘅做法。

唔好忘記,日本場上已經有大半隊二等兵,體能喺比賽末段亦用得七七八八,進攻把握其實唔大。能夠承認自己先天不足、能力有限,先可以因時制宜、訂定策略。而日本好彩博到哥倫比亞贏波,喺一片噓聲之中慶祝出線次圈。


日本咁樣做係咪冇體育精神?少少啦。不過,究竟乜嘢係體育精神?有人話係「友誼第一、比賽第二」;有人話係「全力爭勝」;有人話係「勝不驕、敗不餒」;有人話係「守規矩」。我覺得答案係「以上皆是」,正於小學生嘅操行分係全面計算你嘅言行舉止,有叫人早晨但唔同人講多謝,終歸係美中不足。

之不過,體育精神係咪絕對嘅呢?係咪好似日本神風敢死隊咁,明知必死無疑都壓上去攻先叫有體育精神?德國門將紐亞喺對南韓一役末段企咗去中場扭失波,累球隊失第二球而回天乏術,我又冇聽到人講佢富有體育精神喎,鬧佢「扭呀」就大把。

何況日本得以後場搓波到完場,都要同場對手波蘭禮讓先得。如果波蘭係有所求嘅,係要入多兩粒嘅,晨早前場緊迫、追債咁追個波返嚟啦。但係波蘭滿足以一球贏波、愉快出局喎。波蘭嘅處境本來就冇誘因去施加壓力畀日本。


若說穿,日本稍欠體育精神嘅表現,源於賽程同埋決定排名嘅機制。如果日本場波喺塞內加爾嗰場之前開波,日本或者唔敢大安旨意寄望哥倫比亞幫手。不過有趣嘅係,賽會安排最後一輪賽事同步開賽,就係想維持賽事可觀性,唔想有人佔咗先機,其他人就 hea 踢或者打默契波。

講起默契波,又點可以唔提 2004 年歐洲國家盃嘅分組賽,瑞典同丹麥喺最後一場踢成 2:2 ,巧合地與意大利同得 5 分,因為對賽得球較多而出線。瑞典喺完場前一分鐘先至扳成平手,而根據傳媒報道,呢兩支北歐球隊嘅球員賽前同完場前都有探討過「不如我哋打和一齊出線啦」嘅可能性。

一句到尾,除非出現無懈可擊嘅 tie-breaker (例如輪流喺中圈射空門,邊個唔入就輸) ,否則喺賽制嘅規範、對賽雙方嘅誘因之下,體育精神喺成敗得失面前,有時都比較難站得住腳。


又講返南韓:佢哋喺補時階段連入兩球,淘汰德國之餘,仲一度以為自己有望晉身次圈。直至完場後,佢哋知道瑞典遙遙領先墨西哥三球,先至南韓篤定出局。佢哋嘅拼盡,係咪體育精神嘅體現?定係純粹出於一絲出線嘅希望?大家亦不妨留意返,南韓係 32 支隊伍當中,犯規次數最多嘅一隊,平均每場犯規 21 次。踢法粗野嘅球隊,算唔算有體育精神?


落筆嘅時候,正好係英格蘭對比利時、決定 G 組首次名誰屬嘅關鍵賽事。由於兩隊篤定出線,雙方都安排主力休息,派出大量副選上陣。縱使陣上球員鬥心不減,球迷又會否責怪兩隊未有派出最佳陣容,未有全力爭勝?

更複雜嘅係,首名出線嗰隊好大機會喺八強遇上大熱門巴西,衍生出「輸波走線」嘅策略問題。大家都想喺淘汰賽走得更遠,有得揀嘅話,惡啃嘅對手就梗係留返決賽一場過先見面。咁你話我聽,體育精神係咪套用喺每一場,定係要以「大局為重」,整個賽事通盤咁睇?

如果你問我,我真心覺得能夠喺道德底線之上、符合求勝精神就 okay 。原教旨地強人所難或者為咗棵樹而放棄整個森林、贏咗場戰役但係輸晒成場戰爭,我就真係唔建議喇。

Like what you read? Give 置地記者 a round of applause.

From a quick cheer to a standing ovation, clap to show how much you enjoyed this story.