常識之死： 日本人唔食三文刺身? 震驚億幾人呀
Facebook 專頁有更多無聊短文: https://www.facebook.com/ivanliresearch/
是咁的，「日本人唔食三文魚刺身」，我懷疑係近十年其中一個最大嘅myth。 同《潛行空間》（Inception） 最後係咪夢境一樣咁受關注，遠超過咩費馬最後定理係咪真的，或者火星有冇生命。本系列兩篇文，兩樣嘢： 1.到底日本人食唔食三文魚刺身。 2. 到底點解呢樣嘢都可以拗一輪
又係利申先，而家我都仲幾鍾意食三文魚。少年時更加有一排（十八廿二時）極鍾意。煙三文魚固然好，熟食都可以。 當時食量驚人，又開始有點錢，食自助餐時遇煙三文魚同三文魚刺身直頭係狂掃 ， 而家就算有咁嘅胃口都冇咁嘅衝動 — 唔知係當年啲三文魚好食啲，酒店有良心啲，定以前垃圾口食乜都覺好食。
至於我食咁多年三文魚有冇蟲上腦？你睇埋呢篇文判斷。不過我估好多人就唔食三文魚都個腦生蟲。
「日本人食唔食三文魚刺身」呢個問題，好似三文魚產卵咁，耐唔耐就浮上面一次。 經過十九幾年同人論戰/罵戰，我覺得花少少時間搞清楚個問題，同埋啲語理分析，係有必要嘅，可以慳返更多時間。
首先，記住，討論嘅就係「日本人食唔食三文魚刺身」， quite simply，就係食，或者唔食，或者有啲食有啲唔食，有時食有時唔食，之類。 至於三文魚多唔多蟲， 食三文魚刺身係咪cheap精，不在本文討論範圍。 前者你最好問醫生，而好多醫生會話你知佢哋根本連生蠔都唔食，更加謝絶所有刺身。 細細個睇教育電視醫生去人哋屋企食飯，人哋條魚唔蒸熟晒想唔好咁鞋口，醫生都教誨佢一餐。 咁應唔應該食， 就變左價值問題。 正如我都覺得幾舊水去食部隊鍋啲友腦殘。 後者啦喎， 咩係cheap精， 一樣係價值判斷，拎舊拖羅去蒸熟佢，人生仲有冇樂趣，好主觀嘅。有人迷巴士迷到坐兩年監都係咁。
好，返返去主題，「日本人唔食三文魚刺身」。如同所有問題，講講下總有啲煩膠失晒焦。 日本人，唔使定義啦掛，唔使睇國藉咩血統，咪日本人。 唔知咩叫日本人嘅， 過隔離班啦， 你去錯地方。 三文魚刺身， 我估都唔使點定義啦可？
但「唔食」，就真係值得開多段講。 「日本人唔食三文魚刺身」， 應該理解為「普遍日本人都唔會點食三文魚刺身」，對不？ 千萬唔好咩邏輯撚上身， 個命題唔係 「所有日本人都唔食」， 所以你搵到一個日本人食，都不足以反駁個命題。 正如「香港人唔食狗屎」，你今晚走去拎住本特區護照食狗屎， 都反駁唔到呢句嘢。
日本人食唔食三文魚刺身？ 好簡單。 有圖有真相， 有片有朋友。 以前我唔敢咁高調寫文， 「因為2015年我都未去過日本」。 咁當然其實你唔使去過南極先知有冇企鵝， 但去過十次八次日本後我信心就強啲咁咯。
請睇以下嘅相， 全部都係我今年3月去日本 四國同大阪時影的。 你話日本人食唔食三文魚刺身？你可以成個album 慢慢睇
仲有呢啲，就我朋友影。奈良又有，熱海又有。
堅持唔信嘅人， 總會死雞撐飯蓋。 例如我特登搵啲大陸人開呃大陸遊客嘅店（似乎任何嘢扯上大陸就變咗有道理咁）。 好似係呀可？ 如果在日本影到，但只係大陸人食， 就反駁到啦。
但我好肯定話你知，呢堆舖頭，大部份都係日本人。 唔使拗「你點知？」「你問過晒？」 「講日文就係日本人？」。 要做呢啲無聊嘢嘅，又係， 自己收檔啦。
亦有個講法話，只有低檔超級市場先會賣，最啱啲大陸留學生（again）買。咁其實呢堆相，就只得以下幾張係超市賣。
最後一個講法，話高級料理店唔會賣三文魚刺身。 我唔知你有幾高級啦，但自問我都唔係窮撚。 的確，在高檔日本餐廳，我真係好似冇見過有三文魚刺身。 幾千蚊位嘅懷石料理，好似真係冇。
咁但，天地良心，我食呢啲，唔係高檔餐廳，但亦唔係咩窮到冇飯開先去咯。 再講一次， 有啲根本連中文英文menu 都冇， 只係得日文。 你堅持話呢啲舖頭都係昆遊客嘅， 冇嘢講。 不如睇埋以下幾段片。
都仲係唔信？咁聽下日本駐港領事講。 佢都唔夠權威， 我唔知邊個夠權威了。人哋講得好清楚（香港人真係柒出國際了）
「在我小時候，即是40年前，我從沒有在日本吃過三文魚。有些人說，三文魚可能透過法式餐廳引進日本的 — — 我不大清楚。但可以肯定的是，在今天，三文魚在壽司中已是最常用的材料之一。」
我唔係哈日族（居然有人以為我係，係我就唔會37歲先第一次去日本啦 — 而我連切爾諾貝爾核電廠古巴 阿努阿圖 緬甸 科索沃都去過）， 亦唔係咩食家食評人。 咁但，綜合各方資料， 其實真相好簡單。
N年之前，日本人的確係唔食三文魚刺身， 原因好多， 可能同魚種以及養殖技術有關， 自己搵。亦即係所以，你問啲百歲老人， 應該就真係唔食嘅 — 因為佢地成長嘅年代根本冇呢樣野。 我估亦因為差不多原因， 高級，特別係講傳統， 用返百幾兩百年餐單嘅餐廳， 就真係唔會有三文魚刺身。
咁但，比少少常識都知，以上，並不代表「日本人唔食三文魚刺身」。事實上大撚把日本人食三文魚刺身，應該多過香港人（無聊，因為日本有成億人）。
朋友的比喻做好，等於日本人唔會食炒公仔麵，因為佢地唔會知道原來可以咁樣食。正如N年前香港人都唔食豬頸肉（我細個冇呢樣東西）， 但你絶對冇可能話 「香港人唔食豬頸肉」
日本人，當然係食三文魚刺身的，討論已完。下次邊個再同你討論嘅，畀呢篇文佢睇，順手恥笑佢。
Facebook 專頁有更多無聊短文: https://www.facebook.com/ivanliresearch/
