［感恩過郭錦恩］2019年的十份好
Facebook 專頁有更多短文: https://www.facebook.com/ivanliresearch
早排講開驛馬星動，講起2012年去咗好多地方。又結婚啦又古巴啦又出trip啦。呢句「驛馬星動」就令我諗起個識咗好耐嘅朋友（女仔嚟的，但放心，冇其他嘢），就係2012年佢同我講咗呢四個字。但我搵極whatsapp 同 Facebook messenger 都冇．是但吧，可能係在MSN或Skype，甚至可能我根本記錯。因為我搵「驛馬星動」，其實係搵咗條佬出嚟（就係同我一齊去古巴，後來一齊去北韓嗰個）。
個女仔朋友就嚟生日，當呢篇文獻畀佢（未死的）。識咗十幾年，當年我唔開心呢，都成日會搵佢傾計（網上多）。咁後來佢又結咗婚我又結咗婚，佢又有埋小朋友，自然少咗傾計。亦都唔多唔少見到，我嘅生活應該係開心咗。
當年佢有建議，我憤怒或失望嘅時侯（即係，每一日），除咗咩深呼吸呀之類。仲叫我試下寫低。就唔係寫低啲令我憤怒嘅嘢（有排都寫唔完），反而係寫低每日遇到嘅「十份好」，即係「感恩」啲friend 。小至朝早趕車坐到最後一個位（但，就成為後面嗰條友嘅每日憤怒，見到個弔詭未？你嘅快樂好多時係人地嘅痛苦），大至結咗婚都可以。
明顯見到，呢啲東西唔係我嘅風格。所似好似勉強硬著頭皮同包皮咁做咗幾日，就冇了，發現根本每日好似冇十件事值得高興，如果只係日日寫「茶餐廳阿嬸卒之記得幫我小甜」好似好公式。就作罷。
不過啦喎，因為佢就生日，又因為「驛馬星動」，就覺得，不如寫下2019，十件值得高興嘅事嘛。其實都有啲難度，但都完成咗，如下。排名分先後
1. 仲未死
都唔好話無聊，唔好低估呢樣嘢。只要不死，就是活著。亦即係有賭未為輸，留得賓周在，哪怕沒春袋。It’s ain’t over until it’s over。一日未抬出場一日仲有機會翻身。但人死咗，就咩都冇了。所以我係怕死的。
2. 仲未離婚
都真係唔好話好簡單。據說離婚率係差不多三成幾，每三對就有一對離婚。又，其實好似冇一個數，話你知 「每十段婚姻入面有幾多段離婚」。我講嘅呢個 「三成幾離婚率」，係計當年有幾多人離婚，除以當年有幾多人結婚，咁明顯係兩班唔同人嚟的。而我目測我身邊啲朋友同學，又好似唔會係十對有三對離婚， 「不過可能未離啫」。事實上我朋友嘅小朋友，目測一般都未讀中學，而我見唔少畸屎啲夫婦其實早想離婚，係因為小朋友先勉強一齊，到啲小朋友大個（讀大學？或者做嘢？）就會離了。我身邊啲朋友未到呢個階段。
咁以我咁麻煩，其實囡囡頂到我七年都未離婚，又真係都幾好的說。當然有人覺得我待薄佢，但講真，兩個人嘅嘢，外人真係點知呢？下次你評點其他情侶夫婦前都記住呢句：係咁差嘅人地走咗啦。
3. 拎咗台灣居留證
嚴格嚟講係「居留證副本」，今年就去台灣拎埋個「居留證」，咁以後就唔使用台證，但我仲未會係中華民國公民，未有護照，亦唔會有得投票，直到我去嗰邊住一年再申請。唔知前因後果嘅，我快手講一次：早幾年搞投資移民，開咗間公司，踢咗囡囡過去住一年，佢成功申請埋護照，返埋嚟香港。但我係冇任何身份嘅。拎呢個「居留證」就再進一步，我就係「台灣人」嘅合法配偶，亦即係囡囡張台灣身份證係有我個名的。拎呢舊嘢都搞一輪，囡囡又飛咗次澳洲（因為我地在澳洲結婚），我又要去差館拎良民證，另外我又要去台灣做咗次體檢，仲要打埋德國麻疹針咁。無論如何，向公民身份又進一步，就又安全啲，慎防台灣忽然改例。而家我嘅位置十拿九穩嘅，合法配遇，有居留證，唔會落閘。
4. 轉咗工
亦係舊文寫過。都十分重要的。錢就固然好重要，另外工作都算順利，同事上司整體都不錯，下屬又還算生性，壓力又唔算大，實在couldn’t ask for more．況且，我發現，我冇工返嘅日子，係唔會寫文多咗或者好咗嘅。
5. 做咗一個誠實嘅人
早兩年，寫過想做個誠實嘅人。真係的，想要自由，真係唔係咁容易。有錢就比較容易有自由，搬離香港就更自由，或者你跟大圍你咪自由。但好似我咁，睇唔過眼好多人嘅，就好難自由講嘢。不過至少，我諗過去一年，我雖然未做到 「唔使睇人面色」 「鍾意講乜就講乜」（可能永世都做唔到）。但至少我好似做到，冇人迫到我講啲我唔想講嘅嘢。所謂誠實，唔係做到 「我想講乜就照講」（後果好嚴重喎），但至少 「我講得出嘅就係我心中諗嘅嘢」。唔順超嘅，咪唔講。
6. Facebook Page有啲成績
Facebook Page突破7000人like喎．當然人地靚女求其拍輯相都幾十萬人，但，永遠只同自己比。但即使同自己比，係咪又真係好滿意？麻麻地。我理解唔多唔少都因為社運，我啲文少咗人睇。亦係好正常，邊有心情或邊有時間睇你啲仙台尋找魯迅呢？Anyway，除咗睇數字外，其他方面我都覺得做得幾好。至少朋友嘅評語好咗（但，唔通兜口兜面話你垃圾咩）。另外亦帶到些少嘅收入畀我。唔係多，但總算係個開始，況且睇住自己嘅嘢有成果，係相當開心嘅。多謝大家支持。
7. 供樓供剩兩百萬
都唔好笑，都真係成就兼且值得高興的。有一個迷思係：供樓做樓奴，幫銀行打工。係錯的，根本你個個月供緊樓，就算樓價唔升，你嘅凈資產係越嚟越多 — 因為你爭銀行嘅錢少咗。甚至就算樓跌些少，你副身家都仲係升緊 — 因為你仲要計埋你慳返租樓嘅錢
當然啦下，世事無絶對。固然租樓就真係個個月減低你凈資產，好似變相幫業主供樓。咁但，或者你拎住首期可以勁過畢菲特呢（我好多網友都講到中國爆煲樓市爆煲港紙又爆煲人民幣又爆煲，咁準冇理由未發達）。另外又唔使驚要負資產燒炭嘛。
不過又話說回頭，我要嘅，聽日就贖返層樓都仲得。當年立誓唔結婚唔買樓唔生仔，已經破咗兩樣，所以never say never。而你睇到，三樣嘢都係long term commitment，負債，綁住你嘅嘢。結果我就等到可以呼丕先買樓，明顯錯失咗唔少機會了。（費事有人問：既然可以呼丕做乜仲會爭銀行錢？答案：可以同要咁做係兩回事）
8. 一年去咗四次日本
舊文寫過，不用再多講。東京都去咗三次，東京太大，又永遠有新嘢，仲要有港人朋友，去極都唔厭。另外在四國愛媛尋找《東京愛的故事》，以及函館青森仙台之旅，都係相當正嘅。反而聖誕嘅新潟就冇乜特別，不過正如囡囡話齋，平過去澳門，而留在香港你咁嘅價錢都係食屎的。另外兩次韓國之旅同埋柬埔寨之旅都不錯，越南就麻麻地，食錯嘢，病足一日。
9. 唔少人幫咗我
舊年寫過以上嘅嘢。當年個 「人情戶口」真係凈流入，自覺幫咗唔少人。結果舊年呢，雖然我唔係好落泊，但就感受到唔少人幫咗我，都係幾好的。當然另一角度睇，可能即係我幫少咗人，又唔係好事。但唔好計到咁清楚啦。正如我亦唔會計，到底幫我嘅人係咪我原本幫過嘅人，一去計，件事就好low．
10. 用多咗錢訂嘢
亦其實未必真係好事， 「但至少比得起」。訂嘅，本地媒體又有，但鬼媒居多。我覺得應該都係好事，我睇嘅嘢多咗，識嘅嘢多咗，就更加睇唔起啲三流廢柴寫嘅嘢。況且我勁咗，亦都代表我嘅讀者都勁咗。佢勁我勁你地，大家一齊勁，係咪好勁先？不過亦真係江湖從此多事，錢事少，但時間事大。亦都代表我每日收到嘅資訊（其實係咪資訊？）多咗好多，時間上好有壓力。當然我在其他地方squeeze出返嚟，例如我已經睇少咗好多波，呢個可能冇乜損失。但我都睇少咗書，呢個就好似係損失。但冇辦法了，社會碎片化。你要我睇本書，我都係會諗，其實我可以用同樣嘅時間寫多好多篇文。
Facebook 專頁有更多短文: https://www.facebook.com/ivanliresearch
