上回講到,我當年有好多演唱會飛。在我結婚後甚至成人之美,送飛畀啲單身小朋友,例如律勤(假名)。但而家返返去,上一個十年,2009年先,我未結婚。

講返容祖兒,都冇留意,今年係呢個容祖兒入行廿年嘅演唱會。冇乜特別。反而想講容祖兒個花名容十年嘛。而佢真係入行十年,即係十年前,係2009年。美好的年代。雖然雷曼爆咗煲,但生命依然美好。其實我係想講嗰年嘅一個故事。

我記得嘅係,2009年,我嘅好朋友(唔係律勤(假名))唔知做乜,有兩張容祖兒嘅飛(呀朋友睇到篇文留個言丫,我早排先同佢食完飯)。嗰年只係開咗兩場,仲要係日場,文化中心。佢就讓咗畀我。留意其實2008年容祖兒已經開過演唱會,而且唔只一次,係兩次。點解會一年開兩次?「咁就要講返2008上半年最轟動嘅新聞啦」「金融海嘯?唔係,下半年的」「北京奧運?都唔係,都係下半年的。」。咁所以2008年佢已經開咗兩次演唱會,第二次係因為同唱片公司嘅你懂的開唔成,容祖兒頂埋個期。而單係呢點就睇到佢係幾咁有叫座力。結果係,2008開咗兩次啦喎,2009開到兩場都幾難得。

2009年嗰兩場容祖兒文化中心演唱會,係很好的。而且只開兩場,真係鐵粉回憶。但反正我唔係想講佢,冇乜特別。咁2009年當然我都係同女去 — 但每一次都係同女去架啦,亦冇乜特別

重點係,條女仲讀緊中學。各位觀眾,請拍手。我覺得真係巧開心。2009年我三十一歲,而我同個讀緊中學(好似未考會考添呀媽的),好似得我一半年紀嘅女仔,十五定十六歲嘅,去睇演唱會。

而更加重要嘅係,我地居然仲可以鍾意一樣嘅歌星聽一樣嘅歌!係咪好奇異恩典(鐵粉呀)A May Sing Grace 先!你諗下而家有冇可能我同個廿歲嘅女仔一齊去睇K Pop?定係寬容啲,計年紀差距,計後生我十五年嘅咁?都好似好難吧。定而家廿五歲嘅港女仲會聽容祖兒?唔知。明顯我同個社會已經脫節。

亦都係2009年,我同嗰條女(OK,嗰位妹妹)當然去食飯,食午飯,都話開日場。仲記得係海港城。其實當其時已經好多自由行,唔好唔記得《自由行》係2004年嘅歌。後沙士嘛,些爬嘛,中央大禮嘛。但當其時海港城都仲係有啲正常嘅餐廳。我甚至唔記得間嘢叫咩名,只係記得食過乜,但條女食得好開心。雖然我始終覺得佢似我個女多過條女。嗰刻我真係幾乎幻想不如第時做人老豆,但諗到自己淫人妻女笑呵呵會有報應,都係作罷

而家海港城?唔係冇正常嘅餐廳,更唔係食唔起(親,海港城有KFC的說,之前好似有大家樂添)。但就好似唔係嗰回事。又或者係邊年開始,我覺得在香港食貴價餐廳係搵撚笨實。打邊爐除外,或者粵菜都除外,其他西日韓全部都搵笨實。

我點解唔等到一年去幾次日本先食?咁當然係可以why not both,在香港咪貴食正嘢,去日本咪平食正嘢。會講搵笨實嘅人如我,就梗係窮撚。有錢人唔會講抵唔抵食。更唔會講咩「唔係坐唔起商務不過唔抵」 — 記住,講得「唔係畀唔起不過唔抵」,就即係你畀唔起,講性價比嘅全部係窮撚,幾皮嘢食餐飯唔會畀你幾百蚊好一百倍,但對人地嚟講根本冇分別。真畀得起嘅人唔會講呢句「唔係畀唔起不過唔抵」。例如我而家食方榮記唔會講「唔係畀唔起不過唔抵」。咁咪即係畀得起「不過唔係日日打咯」「喂,唔係畀唔起但唔健康…….」

講返2009場演唱會,條女應該睇得幾開心。不過容祖兒唱嘅第一首歌就出賣咗佢(條女,唔係容祖兒)嘅年紀,同埋我嘅年紀。我到而家都仲好記得容祖兒唱嘅第一首歌就係:《一首獨唱的歌》。In case 你都出賣年紀,首歌係關淑怡原唱嘅(改編日文歌啦下)。邊個關淑怡?咪成日在愉景灣煲煙耐唔耐發癲見報嗰個。關淑怡演唱會我都去過好多次,冇十次都有六七次吧。係呀,又係鐵粉。下面再講。

條女當然唔知咩係《一首獨唱的歌》,我當然係一出intro已經知。仲有,點解事隔十年我仲咁記得佢係唱呢首歌?呢啲就係鐵粉就會知。我當年已經知:因為容祖兒 當年Big Echo卡拉OK大賽就係唱呢首歌入行!鐵粉應該會知。我就算唔係鐵粉都係老粉。

不如都係講返條女。點識嘅?就梗係上網識啦,唔通搞學生咩(當時冇教書啦)。靚唔靚?梗係靚。唔通貪佢有內涵好獨立(十五定十六歲咋喎),定貪佢好好波咩(嗯,係冇嘅,況且其實真係我嘅鐵粉應該知,我係唔鍾意大胸的)。

不過始終都只係一個十五六歲嘅女仔啫。純係滿足下我嗰種 「我的青春小鳥一樣不回來」嘅借故發揮雙春悲啾(係,特登打錯的)。而家由青春小鳥變成老鳥(可惜唔係大鳥),就寫呢篇文再想當年,再天花亂墜雙春悲啾。

呀,講咁耐,你想問,重點,十一哥。有冇食到。哦,當然係冇啦。都話人地十五定十六歲,拿犯法嘅嘢我係唔會做的。況且,你由我唔記得佢係十五定十六歲,就知冇食到啦!

嚴格嚟講,我同佢有冇一齊到,都好似有啲疑問。咁即係佢都係冇拍過拖(自稱),而我同佢又好似冇做過任何嘢去確認或否認呢個一齊嘅關係。其實我當年已經好粗鄙,甚至我十五六歲時已經好粗鄙,但我仲未粗鄙到可以問個十五六歲自稱未拍過拖嘅女仔:「喂,受唔受溝呀?」(其實我好似從來冇講過呢句對白,我對你講過嘅,留個言,請你食飯,今晚再相逢)。咁唔上床,唔講受唔受溝,點確認呢?

係呀,你估到啦。初戀呀!我要初戀!

總之某次食飯後,我送咗佢返屋企,然後就好似冇再搵佢。大約係佢專心學業?定我搞上咗第條女?真係唔記得,好反高潮,或者我選擇性失憶。當事人有幸睇到不如又留個言。

但反而想講嘅係,條女呢,係某名校女生(定你以為我會泡MK妹?或者我再強調返,我係一個文青),當時住在堅道。登登。

對你嚟講,住堅道嘅名校女生冇乜特別。但然後,冇耐之後,我就識咗另一個都係住堅道,同一間名校嘅女生。

嗰個就係我老婆啦。

佢都好似冇聽過以上嘅故事。I mean佢應該知道我同某疑似未成年少女去睇容祖兒,但應該唔知係佢街坊兼師妹。

至於點解我老婆由堅道嘅名校女生,變成文成公主外嫁番邦去到大西北嫁我呢啲咁嘅下里巴人,就係另一個故事了。


雖則我應該算鍾意聽香港流行曲,特別係以學霸嚟講。但由於我比較懶又比較窮(特別係做金融之前),其實唔係睇好多演唱會。

除咗睇過十次容祖兒外,就係睇過六七次關淑怡(即係,差唔多次次睇),應該都好似有睇過十次八次李克勤。呢三個都係相當鍾意嘅歌手。張學友都鍾意,但一次都冇睇過,即使雷曼爆咗煲後都冇。譚詠麟?都鍾意架,但細細個老豆同我睇,很好。

陳奕迅?冇噃。歌當然有聽(我連黎明劉錫明溫碧霞邱淑貞葉玉卿都聽添),當然好聽巴閉流行教父。但一次演唱會都冇去過。唔止,郭富城我都一次冇去過。唔止,BEYOND都好似冇。遺憾?我何止a few,too many to mention.呢個世界大把遺憾啦。例如沙士嗰時冇買樓,十蚊冇買騰訊。古語有云,問君能有幾多愁,恰似滿倉中石油。


最後講下關淑怡,同容祖兒冇可比性,唔同年代,唯一關聯就係容祖兒唱關淑怡首《一首獨唱的歌》入行。無巧不成話,李克勤就係唱譚詠麟嘅《霧之戀》入行。然後齊齊投共。唔止,容祖兒都sort of 投埋共。就係關淑怡一個唔投共。真係傻咗先唔投共。不過我覺得冇嘢的,鍾唔鍾意同才華係兩回事(否則冇人會聽楊千嬅Stephy),而才華同政治又係兩回事,甚至同人格都係兩回事。講白啲,如果有良心要聽周柏豪,咁我寧願聽返譚詠麟。

而有一鑊嘅關淑怡演唱會,容祖兒係去咗睇的。唔止,周汶錡都去咗。關佢乜事?聽講係FANS,關淑怡版嘅《陀飛輪》MV咪佢做女主角。

下回,講關淑怡,亦講容祖兒,仲有我老豆。同埋我自己。就冇再講名校女生了,兩個都冇。



身痕文學

裝文青,文化生活。語言歷史人文科學旅遊乜都有。外國為主。歐洲,日本,韓國,東南亞,台灣。一般飲飲食食或影評請睇「瘜肉都市」

Ivan Li 李聲揚 - 華麗后台

Written by

葉念琛,張小嫻,勞蘇,小企鵝,東歐。主要都係鍾意錢。去過下切爾諾貝爾同瓦努阿圖,教過下書,撈過下投行,最愛始終係寫文。相信香港人好醜陋,相信社會需要不受歡迎的言論。相信人生如現場睇波,買平飛嘅人噓得最大聲。 Facebook page: https://www.facebook.com/ivanliresearch/

身痕文學

裝文青,文化生活。語言歷史人文科學旅遊乜都有。外國為主。歐洲,日本,韓國,東南亞,台灣。一般飲飲食食或影評請睇「瘜肉都市」

Welcome to a place where words matter. On Medium, smart voices and original ideas take center stage - with no ads in sight. Watch
Follow all the topics you care about, and we’ll deliver the best stories for you to your homepage and inbox. Explore
Get unlimited access to the best stories on Medium — and support writers while you’re at it. Just $5/month. Upgrade