［綠茶加威士忌，紅酒溝雪碧］人生苦短，乜都試下。葡萄酒加冰，why not？
Facebook 專頁有更多短文: https://www.facebook.com/ivanliresearch/
葡萄酒當然有飲凍的，最入門嘅講法紅酒室溫飲，白酒凍飲。當然亦有品酒人覺得低能，「人地室溫講法國室溫，唔係香港呢啲熱能死人嘅地方」。但即係一般嚟講啲冇乜品味又唔想出醜嘅（例如我）就係咁上下。
正如細細個睇梅艷芳同周潤發套《公子多情》，呀梅姐改做大陸仔發哥都係教佢紅酒配紅肉白酒配白肉，發哥就問佢咁老虎肉係紅肉的白肉（而我當年仲未賤到識得回一句：白虎咪白肉）。
咁但，後來，再大個啲，又土豪啲，不愁溝唔到女時，就fuck that 啦。The first rule is forget all rule．應該同我食過下西餐（有時中餐都得）嘅都知我其實唔多飲紅酒，偏好白酒，Riesling或者Sauvignon blanc。再唔係都Rosé得。當然亦有個偏見（定只係我嘅偏見）話女人先飲Rosé，正如聽講女人先會食卡碧，女人先會食薄荷煙 — 而好似冇乜見女人食 Camel或者總督煙。
咁所以，變成厚顏無恥後，我就試過無數咁多次（其實差不多次次）食牛扒飲白酒，從冇見過有侍應有白眼（人哋背後笑你咋低能仔），亦都唔見得有女覺得呢條友不知所謂（人哋唔出聲咋低能仔）
講返，以上如有大錯都請見諒，其實酒色財氣呢啲嘢我都唔啱。我主要都係睇下書睇下文譯下嘢推廣下閱讀風氣咁。唔係咩？
萄葡酒加冰，就梗係落地獄啦，我應該冇見過有人做咁嘅嘢，大陸都冇見過。（至於咩雪裡紅嘅紅酒溝雪碧七喜就見得多，正如綠茶威士忌都仲好常見）。應稍有常識都知一係雪凍支酒佢，一係冰桶，巴閉啲嘅咪酒櫃。就真係冇人整兩粒冰落杯葡萄酒度的，白酒都唔會，紅酒更唔會。威士忌係反而會的（雖然我都唔興）
原因好簡單啫，正統講法就係威士忌加冰OK，因為冰會令到個味更加有層次（唔識形容，你飲一次就知），但葡萄酒冇呢回事。而當然啦，你朋友會覺得你完全係暴殄天物，特別如果係法國佬直頭會叫你落地獄。
不過本文作者就話，有何不可呢？啲咩葡萄酒規矩是低能的。生命苦短，自己鍾意做咪做咯，理撚得人丫（按：下次記住食西餐搵把牛油刀劏開個麵包兩邊然後塞舊牛油落去，或者拎去浸羅宋湯食，我成日都留意有冇人做呢啲嘢）
作者話當你試過後，發現其實幾多好處。首先係你可以飲耐啲，因為一路有補充水份唔會脫水。特別係當你在戶外（例如婚禮）時，杯酒亦都清涼好飲啲。而啲冰塊塔利班都開始要收皮：而家連「毛澤東」Moet and Chandon都推出啲特別for畀你加冰飲嘅香檳（係喎，頭先都唔記得講香檳，香檳當然凍飲，但亦冇人加冰的，況且個杯……你想好似凍奶茶咁加？）。
總之，自己過癮就得，我有我自由，理Q你感受。飲酒係為自己開心，唔係討好其他人。
不過作者不忘提醒，如果係做客人嘅，就梗係問咗主人家先啦。即係人地拎支82 Lafite 出嚟你加冰飲嘅，就唔好怪主人家搵酒樽扑你。
Facebook 專頁有更多短文: https://www.facebook.com/ivanliresearch/
