總有一個喺左近— 有關人類愚蠢的五大定律
Facebook 專頁有更多無聊短文: https://www.facebook.com/ivanliresearch
其實篇文都好耐，Quartz嘅文都兩年前，而「原文」本書更加差不多四十年前。但依然讀落過癮。我相信都有不少人睇過，但我太鍾意，還是破例譯一次
本書作者其實係個意大利佬，經濟史教授，UC Berkeley。成本書得十幾頁，甚至可以話只係篇長文，網上免費有得睇。不過你知而家啲人八百字嘅文都要話長文慎入，好似我呢啲寫三千字嘅真係恐龍。所以畀個簡單版你。而有啲人係睇原文都懶，所以我幫你（用我鍾意嘅方式）譯埋。
意大利佬話，人類生死存亡，最大威脅，就係嚟自蠢人（按：由意大利佬講真係特別有說服力）。
作者認為，蠢人有以下共同嘅特質：大量供應總有一個喺左近，唔理性，損人不利己，破壞社會整體福祉。作者認為人類無法對抗防備呢啲蠢人，唯一希望就係唔蠢嘅人更加努力 （睇到呢度開始覺得其實係勸世文，人人都覺得自己唔係蠢人，所以睇完就會好努力）
以下係意大利佬，關於人類愚蠢嘅五大定律：
第一．無可避免地，所有人都低估咗蠢人嘅數量。無論你估嘅數係幾多，都係低估。正所謂網上傻西何其多，問你屌得幾多個。呢個亦都因為好多人太表面，以為睇工作，教育程度或某啲特質，就可以判定啲人其實蠢極有限。原作者話聽落好廢，但諗真啲：幾咁多你以為聰明嘅人，最後都係做啲好蠢嘅事。而無論你點預防都好，蠢人蠢事總係不停出現，永遠防不勝防，好似質數咁無窮無盡。
呢個就去到第二定律：
第二．一條友係蠢人嘅機會率，同佢其他特質無關。作者認為其實任何性別，種族，國藉，收入，教育程度嘅一組人，入面都係有咁多蠢人。換言之，蠢人係完全隨機嘅結果，係自然現象，好似血型咁，係基因所為，大自然總係安排某一個比例嘅蠢人出現。但同人種同後天或者文化無關。洋腸有蠢人，大陸佬有蠢人，左膠有蠢人，本土派有蠢人，NGO有蠢人，高官有蠢人，窮人有蠢人，有錢人都有。唔好分咁細。到底有幾多蠢人？唔知，而你一想估，就留意返第一條定律。原作者話女權份子可能好開心，第三世界嘅托布可能好開心。但諗真啲其實好大鑊，即係你點向上流都好，或者去到世外桃源都好，點都係咁多蠢人 — 而永遠超過你預期（定律一）
第三．蠢人係乜？就係損人不利己嘅人。原作者認為呢條係黃金定律。有啲人就係做啲咁嘅嘢，唔知為乜，搞串PARTY但自己冇得益。
既然係黃金定律，意大利佬就講多幾句。除咗蠢人外，仲有三種人。第一種係智者，利人又利己。第二就係人渣，損人利己。第三就係冇得救嘅（聖人？），損害自己益人地。作者用漫畫說明（希望我冇理解錯）：正常買賣互利嘅，右上角，智者（Intelligent）。諗住扑人頭搶嘢嘅，損人利己，右下角，人渣（Bandit）。送嘢畀人貼埋錢嘅，左上角，無可救藥著（Helpless）。左下角就係蠢人，做啲嘢損人不利己，可能仲害埋自己。
作者認為，唔蠢嘅人，會係呢三種特質嘅混合體，有時係自私嘅仆街，有時係利人利己嘅智者，有時係畀人搵笨益咗人嘅冇得救。甚至有時會有埋少少蠢人嘅特質
例如人渣，偷你一百蚊自己拎到一百蚊嘅，係完美嘅人渣，就係下圖斜角線嘅人。咁但多數唔會咁美好，有時係偷你一百佢拎到八十（有成本嘛），或者佢隊冧你先拎到幾十蚊，咁呢個情況下佢就係B2區域嘅人渣，比較近蠢人。有時係損害你少少但佢賺到好多，可能係偷你幾百蚊但佢拎去救命救返佢老錃？咁呢啲係B1區域嘅人渣，比較接近智者，促進社會福祉。總之，在人渣區域，係有不同嘅人渣。
但蠢人呢，分佈就集中好多，在呢個圖中，作者認為大多數都係在Y軸（垂直嗰條呀！）條線上面，下半部。即係佢地造成或多或少嘅破壞，但自己係零得益。當然，仲有少量蠢人中嘅極品，係在左下角，損人損己。
蠢嘅人呢，就十分consistent，幾時都係咁蠢。正係因為佢地咁，所以先好危險。因為正常人（唔蠢嘅人）完全理解唔到啲蠢人：佢地理解到人渣嘅行為 — 雖然未必同意，但人渣做嘢畢竟有啲動機，係為利益，係有佢地理性嘅一面。人渣並唔係智者：因為佢未叻到識得幫人幫自己，咁佢為咗益自己唯有去損害你。咁當然唔好，但畢竟有蹟可尋，你可以預計到，你可以去防備。
作者話你總會遇過非蠢人嘅呢三種人，你知道佢地做嘅嘢點解。但絶大多數情況，你嘅時間金錢快樂，係畀啲友破壞咗，而你完全唔明點解，明明對方就冇得益 — 就因為嗰啲係蠢人，唯一解釋
根據呢個定律呢，蠢人係避無可避嘅，因為你完全唔知佢幾時會發作，因為佢做嘢完全唔係為自己利益，所以可以無啦啦害你，你估唔到。你估到都冇辦法用理性嘅方法應對 — 因為佢地嘅損害就唔係理性的！好似亂咁飛嘅波，轉彎嘅子彈咁，冇得避。於是就去到第四定律：
第四，正常人（非蠢人，即係智者人渣同無可救藥者）永遠低估蠢人嘅破壞力，特別係佢地成日忘記，在任何情況下同蠢人共處都係錯誤，代價好大。無可救藥者低估蠢人破壞唔出奇 — 呢個正係佢地冇得救嘅地方。但智者同人渣都低估蠢人嘅破壞，可能係佢地搞錯咗蠢人同無可救藥者，前者有害，後者（對自己）有益，儘管望落都好似咁低能。於是去到最後嘅第五定律
第五，蠢人係最危險嘅，危險過人渣。人渣只不過係做財富轉移，當然有啲係冇乜效率，有啲蠢人特質。但亦有啲可以有益社會。講到尾，智者當然最好，但有智者特質嘅人渣同無可救藥者，都對社會幸福有貢獻。相反，有蠢人特質嘅人渣同無可救藥者，就係人類禍害。而蠢人，當然係十分一致地永遠有破壞冇建設。
作者認為，蠢人無處不在，無法防備，想教好佢地或應付佢地只係嘥時間。但點解有啲社會畀蠢人累死（按：意大利？），有啲社會頂得住？作者認為唔係因為某啲社會特別多蠢人（見第二定律），而係因為非蠢人嘅結構，同埋做幾多嘢。非蠢人之中，如果人渣同無可救藥者多嘅，個社會咪玩完。如果係智者多嘅，個社會就仲可以頂住蠢人嘅破壞。又或者，人渣同無可救藥者之中，蠢人特質多嘅，社會咪玩完。
講咗咁多，其實呢篇都係遊戲文章，要駁斥應該唔係太難，純粹過下癮，唔好太認真。
Facebook 專頁有更多無聊短文: https://www.facebook.com/ivanliresearch
