一夢人間四十年 — 途安人
有追看本人啲文既讀者（如有），就一定知道本人一大嗜好就係日本戰國及幕末歷史，以及去相關地點旅行。曾經有朋友問過我點解咁鍾意去日本睇「嗰啲野」，又唔去返大陸既三國景點去睇「嗰啲野」。
呢個問題我當然有答案，但回答之前，大家留意一下問題本身。無錯，係香港長大，對日本戰國歷史有興趣及了解既人，當然係少於三國。正如標題出處， Ivan Li 李聲揚 -君子馬蘭頭 話齋，「邊個陶晴賢？陶安仁我就識。」
係中華文化地區成長及接受教育，當然起碼會知道諸葛孔明、好多人拜既關二哥同埋比較少知心友既曹操。然後小學左右，就會被接入三國演義既故事。還記得小學時候，受「吞食天地」所影響，班上男同學曾經有一大規模爭論到底「馬超定魏延係五虎將之一」（同樣規模既爭論就要數聖鬥士星矢播完冰靈柩一集，舜到底是男是女）。
講到日本歷史，其實我深信大部份外國人既初接觸都係離不開動、漫、遊戲。
本人開始對日本戰國有興趣就係來自打機啦。不過並唔係名聞遐邇既《信長之野望》（雖然係有係Game書見過），而係《太閤立志傳》。大家都知（Well），太閤一代既地圖係相當有限，大概係半個本州左右，主線劇情亦基本上只去到本能寺之變後既山崎合戰。
雖然如此，遊戲性依然非堂出色，僅有既劇情如墨俁一夜城、金崎撤退戰等等都係非常令人投入，引人入勝，自然會令人想進一步了解背後既故事。
而因為係由太閤立志傳入坑，感情上難免我就係偏好豐臣家而對德川家無好感。
而幕末歷史就由浪客劍心開始。當然，果陣網上資訊就冇咁發達既，邊到會知乜野劍心原型係河上彥齋之類既野？但當年有一個名令我印象非常深刻：「新撰組」。
如果有讀者有比較細心留意筆者行文（如有），我自己一般係寫「新選組」。日語漢字中「選」同「撰」同音同義，無論你點寫都係Shinsengumi，而從新選組同會津藩往來既公文兩個字你都會見到。既然如此，我自己就鍾意用「選」，因為「新選組」本來意思就係「新近選拔出來的組織」（又，清河八郎帶令浪士隊由江戶到京都，其後返回江戶時留下既24人成為「新選組」，其餘既浪士組返到江戶後，在清河八郎遇刺後，則被改組成「新徵組」），「選」比較合乎中文既意思。但我又不得不認同，當年我係亞視睇浪客劍心，齋藤一講出「新撰組」而令我留下印象，好大原因係其讀音。
但大家都知道，新選組係佐幕派，又同我從戰國歷史產生興趣陪養既因緣而生成既「反德川情意結」有所衝突。不過其實無他，你見香港政治青都一時屌鳩、一時追捧鍾庭耀。講到尾，「果刻佢啲野啱唔啱聽」者也。
講到幕末歷史，除左聲名遠播既坂本龍馬，最受歡迎既的確要數新選組。原因？大家網上可以搵到唔同既分析。但你問我，一個字：「中二」。例如？「誠」字隊旗、山形圖案羽織隊服自以為好型、一批鄕下農夫裝腔作勢擺出武士架子、煞有介事既「局中法度書」等等⋯⋯有中二病既友一定好鍾意。
開個玩笑咁解，筆者仍然係新選組迷。
對日本呢兩時代既歷史產生興趣，唔多唔少就會研究埋其他時代，此乃必然。咁了解歷史，自必會得到學習歷史既好處，不贅。但我相信對我最明顯既影響，就係因為鍾意了解日本歷史，而變得非常喜歡一個人到日本旅遊。
本人第一次到日本，基本上就係因為2008年第一次「搭飛機去旅行」（留意，年已27，我地呢啲上一代既窮L，真係點似得而家既所謂窮等人家小朋友都一年去幾次日本）到過杭州、上海，覺得點到係時候要去京都尋找新選組，就籌劃既呢個2009年既日本京都之旅。
2009年，首先當年係連b-mobile既sim卡都未出現既，我係靠預先print好既地圖同資料。最經常拎出黎講，就當然係當年跟本冇乜中文既日本歷史資料，而我係網上既見到池田屋變左做彈珠機中心「柏青哥」⋯⋯去到三條河原搵來搵去都唔見彈珠機中心，突然望一眼旁邊間居酒屋既燈籠，「大大個字寫住池田屋」。
原來「 海鮮茶屋 池田屋 はなの舞」於池田屋原址在2009年9月開始營業，居酒屋內裝潢以池田屋事件為主題。亦即係，我係春、夏做資料搜集時，池田屋原址的的確確係自1978已經開業既彈珠機中心，但我2009年11月去到既時候，就變左居酒屋了。
但呢次新選組之旅，最特別之處，係有「新選組之墓」之稱既光緣寺（實上寺內墓所只有總長山南敬助、以及一名「與沖田有關的女性」既墓所）。當日我稍稍遲到，大約關門前10分鐘左右去到。毃門時有一位面目和藹又有少少喜感既大叔僧人開門，向我講左一堆日文，而我就只聽得明Shinsengumi啦下。
當佢問我係咪中國定邊到黎，我同佢講我係來自「香港」，佢就同我講左句廣東話「香港人」，然後就放我入去，係香油錢及資料板前同我講左一堆，大概係解釋山南總長既墓所因為某啲人物關係黎到光緣寺，又講左一句廣東話「老友記」。最後示意我「科水」時，我就一堆yen拎左出黎係到揀來揀去，佢又爆左句「乜搞成咁呀」。
戰國的話，比較有趣既一次經驗應該係2013年去關原古戰場。我係去關原既前一晚入住大垣駅前既APA Hotel，咁check-in原就去食晚飯，摸左入間壽司店，由壽司師父同幫手大叔、大嬸，全部都好驚訝點解會黎左個外國人。而師父仲特別友善，用佢同我既日文差不多水平既英文同我溝通，知道我係想去關原古戰場，仲同我講東軍對西軍添。
而第二日我去完關原古戰場後，非常愜意，返到去大垣就決定再幫襯返呢間壽司店（雖然根本都唔係好溝通到）。但呢一晚壽司師父不在，由尋晚既幫手操刀，但佢都當係「故人」一般，向我指一指另一幫客人，同我講佢係日本殿堂級高爾夫球手青木功，而佢亦向對方介紹「呢條懵炳係香港人」，呢次都應該係「我與世界冠軍最接近的距離」。
其實我有更多尋找歷史之旅既有趣經驗，例如真田鄉又一次被人當奇怪生物（而家可能還好，但當年相對少好多外國人會摸到去）、大阪城多聞櫓遇著個解說叔叔曾經住過香港好想同我傾多幾句，等等等等。
因為我鍾意睇日本「嗰啲野」，令我一年去三次日本。而亦因為我一次去三年日本，就令到我開始鍾意去旅行。初時亦俾有啲友恥笑我去日本拜山云云。Well，其實而家網路資訊發達好多，已經多左人咁做，亦令你容易發現有人咁做。子非魚，安知魚之樂？
而又因為旅行，又令我多左一門去了解日本地理以及地區發展歷史既興趣。
又講開，日本歷史我都唔敢講自己係專家，不敢自稱乜乜達人。不過，除左「最年輕參賽亞姐」陶安仁，起碼我都仲識「西國無雙侍大將」陶晴賢既。又，唔啱除卻「德川四天王」外，送多個「羽壇四天王」之一既陶菲克？
最後既最後，咁點解去日本睇戰國幕末又唔去大陸睇三國。「唏，香港又Donki、日本又Donki，你覺得去屯門爽啲定去新宿歌舞妓町爽啲？」
