京都好鬼多人 之 不如搵日去大津
網上報道，係新型肺炎（定武漢肺炎？）疫情持續未受控既影響下，京都旅客人數激減（用字係咪好和風呢？雖然筆者是少用日式中文的存在），有京都市民更表示見返多年前既京都，相當感動云云。
筆者第一次去日本自由行，也是去京都，2009年11月19–23日。剛好係當年既紅葉季節既開始，所以哲學之道一帶既紅葉景點：永觀堂、南禪寺亦係非常多人。「清水寺呢？」我7:45去到仁王門，當時只有幼稚園鴨仔團同我一齊到。「嵐山呢？」我目前去過京都三次，都仲未去過嵐山，所以答你唔到。但我非常有印像去哲學之道既早上，我係稍遲出門，要到10:45先去到哲學之道，朝早係京都駅上巴士係打哂蛇餅既。
當時心諗，可能係賞楓先人多啦。
最近去京都，我就感受到而家既京都係有幾咁多遊客，幾咁誇張。
本人其實都係相當怕人多。雖然未去到「旅日達人」 Ivan Li 李聲揚 — 華麗后台 咁係櫻花季節既嵐山迫到手機都冇訊號而暴躁，但去到伏見稻荷大社亦真係迫到我加快腳部離開，衰過行花巿（而我起碼廿幾年冇去迫過花巿，if not 三十年冇去過）。
旅遊地點及觀光城市代表的京都巿，長年作為日本的皇都，亦避開左二戰戰火（差啲原子彈就扔京都架喇），保留落黎既歷史及文化風情非其他日本城市可比。多少人第一次去日本老虎魚蝦蟹都要「關東+關西」，都係因為要去東京但又擺脫唔到京都既世界文化遺產古都吸引力。（aka 著和服影相再post上facebook自稱洗滌心靈之旅）
不過，因為京都旅客人數越來越多，景致建築仍在，旅程既風味就顯然變質。（即係同一間咖啡店，「坐幾檯文青討論去仙台尋找魯迅」同「迫滿保險經紀向客戶推銷保險計劃及中學雞邊溫書邊談情」，氣氛當然完全不同）
其實即係好似你係香港租寫字樓，租唔到中環咪去灣仔；又或者係台北搵屋租唔到台北巿咪去新北、桃園、基隆。
如果係想品嚐寧靜既古都風味，不如考慮一下在京都傍邊滋賀縣縣廳大津巿？
今時今日既京都府，屬於古令制國山城國，其實係公元794年天皇才遷入而成為京城，稱為「平安京」，是為「平安時代」既開始。在此之前，其實早於飛鳥時代667年，皇都就曾經座落近江國滋賀郡（即今滋賀縣大津巿），有「近江京」之稱。
從京都駅到大津巿，視乎目的地由10到25分鐘左右不等，非常快捷。而相比京都，酒店價錢亦即時平一截，「旅日達人」 Ivan Li 李聲揚 — 華麗后台亦表示佢去大津時好多台灣旅行團（你懂的）住大津。而筆者在大津時住既琵琶湖飯店，更可以話用商務酒店價錢享受4星級酒店服務，非常抵玩。
觀光方面，除左與京都相連既延曆寺以外，日吉大社、石山寺、三井寺、近江神宮都係非常有規模及各有獨特魅力既寺院神社。其餘仲有日本三大名橋「近江八景」（唔好同「琵琶湖八景」搞亂喎）之一既瀨田唐橋。
當然，仲可以係大津港坐船出游琵琶湖，或乘鐵路到今津港或彥根港再搭汽船到神明的居所竹生島。
大家睇電影或玩遊戲，睇得最多係講神明因為信眾越來越少而失去神力。而筆者遊大津時，最大既感想係，神社、寺廟越少人我越感受到神靈！（筆者的確係一個非常Spiritual既無宗教信仰閒人）
讀者遲下疫情有好轉後（唔係唔會嘛？），如果都嫌「中環」人太多，不妨亦考慮一下「灣仔」—抽一日甚至兩日去下大津體驗一下寧靜而有靈氣既古都，以洗滌一下在京都唔係好洗滌到既心靈。（咁shopping既野，自己去大阪梅田搞掂佢啦。要洗其他野既，咪自己去飛田新地打個白鴿轉，你懂的）
