剛愎自用,咪搞到車毀人亡囉(唐唐 tone)
有啲朋友,係可以一個電話就叫到我出嚟。
「你覺得,我係咪太獨立?使唔使改下?新識仔仔要求我著熱褲或者短裙出街呀!」好友如是問。
我聽到差啲畀薯條梗死。黑松露味薯條好好食㗎,阻我食飯者死。
作為一個似男人的女人,我好少嘢會上心,唔開心都係鬧兩句就冇事,好少嘢會激嬲我。好死唔死,「要求一個女仔唔做自己」呢個 request 係其中一個。
中學老師喺我中二嗰陣講過一句嘢,我到今日都記得。所以其實,似男人的女人,同似女人的女人都一樣,都唔可以得罪。我嗰日一切如常咁嘻嘻哈哈,可能係嘈親佢老人家。