係一場賽馬比賽入面，一隻馬嘅贏面基本上由3樣野決定，分別係隻馬本身嘅質素﹑騎師嘅配合同練馬師栽培嘅能力。
香港有唔少練馬師都做過騎師，當中包括唔少世界各地嘅前冠軍騎師，例如贏咗11屆香港冠軍練馬師嘅「老摩」佐治摩亞，佢黎香港開倉練馬之前，以騎師身份係澳洲同歐洲各地馬壇贏到多場賽事。除咗「老摩」，告東尼同韋達都係當中嘅佼佼者。
告東尼由見習騎師出身，係香港賽馬會第一屆見習騎師訓練班嘅畢業生。佢係1973至74馬季開始騎師生涯，係策騎嘅第2同第3年都奪得冠軍見習騎師，另外佢都曾經6次贏到香港冠軍騎師嘅榮銜。雖然佢只係兩屆香港冠軍練馬師嘅得主，但佢至今訓練出唔少馬王。擁有香港最長連勝紀錄（17連捷）嘅「精英大師」就係黎自告東尼馬房。係啱啱過咗嘅馬季，佢以近1.28億獎金成為獎金王，由此可見佢練馬師嘅能力不容小覷。
告東尼可以話係香港賽馬嘅傳奇，而另一位傳奇，小編深信將會係韋達，雖然佢目前從練嘅資歷尚淺，佢舊年先拎到練馬師牌照，正式掛靴轉任練馬師，但個人認為佢豐富嘅策騎經驗會幫佢成為香港未來嘅冠軍練馬師。我地就期待下佢黎緊嘅馬季表現啦!
今次就講住咁多先，有興趣研究賽馬嘅朋友，不妨研究一下騎師﹑練馬師同馬匹之間嘅關係。
