讀《我從西藏來》
《我從西藏來》響大家都明嘅國家係禁書黎，差不多成半本都係講邱揚・創巴仁波切點樣由西藏逃亡避過共軍，帶領住僧人同難民一齊穿越中印邊境，到達印度嘅經過。其中有啲情況，我估香港人都好了解。
例如派兩個識藏文嘅共軍著僧袍去探路，又或者將一啲王族或者尊貴嘅藏人封為中央委員會代表，然後夾佢去北京之後就無哂音訊，係咪似曾相識呢？仲有工人同主人交換衫著同埋迫主人做粗重功夫，其實同我哋依傢某啲人唔駛點排就有屋住，有啲人等死等一世都無屋住嘅情況好相似傢，更莫講話乜都唔講就兜嘢開槍射死你果啲啦。再加上不停放流料話西藏好安全但係逐間寺廟被佔領，真係睇到我心有戚戚焉。
走難嘅時候，其實都唔係個個咁齊心，有啲原本話跟仁波切，跟跟吓又驚佢唔熟路又或者貪戀一時安逸想留低點知差啲舐嘢走唔到，又或者貪戀牛羊唔捨得賣到最後過河都係被強勁嘅水流沖走，唔夠信心，其實係唔掂傢。而且有啲豬隊友真係攞命，唔好生火俾敵軍發現係鐵則但係佢哋餓起上黎乜都唔理照燒柴，又或者叫住佢唔好同的村民互動驚走漏風聲但都要去同佢哋買嘢食，真係分分鐘攬炒。仲未計路程其實好崎嶇，越過一個又一個雪山、過急流，再爬上爬落百呎峽谷，絕對係心智同耐力嘅考驗。途中有人體力不支老死，有人生病要放棄行程，更有人被捉完又逃走然後再攀山涉水。但係為咗自由真係有不可思議嘅力量，無足夠食物嘅時候竟然可以靠靜坐同唱歌去保持精神，迷路又能夠靠天啟指示，除咗奇蹟同埋信念，真係無其他形容詞。
全書講仁波切嘅出生、被確認為第十一世創巴祖古的轉生，點樣細細個就去學習，同唔同師傅互動，再不停學習，跟住教書，更取得博士學位，然後以堅定嘅意志帶領大家成功到達印度，真係幾勵志吓。除咗適合對邱揚・創巴仁波切有興趣嘅人士閱讀，其實都幾適合響有適當指導嘅情況下俾小朋友閱讀。起碼教識佢哋：「嗱，你要做偉人，仲要做到幾間公司嘅主持人（仁波切係蘇曼寺系統打哂骰嘅當家），你細細個就要勤力讀書呀。」而且好潛移默化地教識佢一啲某個國家嘅手段以自保，從故事中學習無咁 hardcore，其實係好傢。我自己就當然睇得好開心吓啦，呢篇我當自己做筆記傢咋，鍾意就啪五吓啦，謝~
如果你喜歡我的文字，請幫忙按 5 次 LikeButton 化讚為賞，回饋創作；如果登記 LikeCoin ID，登入後再按 LikeButton 我會得到更多獎賞，非常感謝！
