
人總需要勇敢生存
我還是重新許願
例如學會 承受失戀
其實呢幾句歌詞,同呢篇文、甚至我之後嘅小說都冇乜關係(真係?)。只不過,有位讀者朋友喺《漢城》後記度,留低咗幾句《明年今日》嘅歌詞,搞到我哼咗兩日之餘,個心都慼咗兩日;所以我又擺幾句喺度,睇吓慼唔慼到你哋。
但係文字嘅嘢真係好古怪,我有feel嘅嘢唔代表其他人都有feel;呢個亦都係寫作嘅好玩之處。有人會對我嘅小說愛不惜手、有人會嗤之以鼻、有人會覺得篤眼篤鼻(我卅幾歲人連拖都未拍過,你個hihi啅完鬼妹啅韓妹,仲要寫出嚟晒命!)。一段文字、N種反應;呢種滿足感,唔係咁容易喺其他地方搵到。
所以,寫作係一個會上癮嘅玩意。
既然上癮,就會一不離二、二不離三。
講咁耐,其實我想公佈我下一輯長篇小說,名為《北角演義》。
我應該點形容《北角演義》呢?
職場、愛情、友情、喜劇、鬧劇、小甜、心計……其實係乜都有啲四不像。《北角演義》都係我講我嘅故事 — 一個冇《漢城》咁沉重嘅故事,但係人物關係同埋故事結構,都遠比《漢城》複雜。
故事講述,我從一間上市公司,轉職到一間跨國公關公司嘅「歷險記」。故事內容非常密集,由開始到完結,都只不過係一年內嘅事。話雖如此,但係一如以往,小說嘅長度仍然未有定案;視乎讀者嘅反應、進度、氣候變化、臭氧層濃度、5850位勢米高度線、LIBOR、恆指20天移動平均線、領先經濟指標同埋筆者心情而定。
故事嘅男主角當然係我;至於女主角呢……今次你哋識佢㗎!所以唔好亂講嘢,萬一你哋得罪咗女主角、佢會衝出嚟妖你㗎!
《北角演義》仍然會維持我一貫嘅作風,小小咸、多多趣。我仍然會喺一啲你哋唔為意嘅位置放少量洋蔥、揪一吓大家嘅心。唔同嘅係,今次呢隻長篇,既係真人真事、亦有創作成份 — 因為故事牽涉嘅人事物,絕大部份都仍然健在兼識睇中文,所以有好多嘢,我都要改頭換面、mask咗一啲可以識別身份嘅嘢(雖然有啲mask唔到)。
但我保證,呢類嘅「忌諱」嘢,唔會減低小說嘅可讀性。
《北角演義》嘅Prelude將會喺今個星期五(7/9),香港時間早上六點推出。之後,佢會取代《漢城》嘅檔期,逢星期二、五早上更新。
至於之前承諾大家嘅《漢城》後續故事,將會取名《都是我們的日子》。《都是我們的日子》係以我與唔同人物嘅書信、對話內容、同埋間歇性嘅實時小說形式,去講述我同Chloe喺2000年至2003年嘅故事。除咗會多咗第三者嘅視角,故事牽涉嘅人物,亦都會比《漢城》多 — 因為呢段時間,除咗我同Chloe,亦都會有其他嘅「女角」出現。
由於寫作需時,所以《都是我們的日子》會喺今年稍後嘅時間、以每週一篇嘅頻率於香港時間週日早上推出。
同時展開兩線唔同長篇小說嘅寫作,對我嚟講係一個執筆十八年都未試過嘅新嘗試;希望大家繼續捧場之餘,亦希望大家高抬貴手,將就住嚟睇。我唔係金庸、衛斯理,亦都唔係九把刀、喬靖夫,冇佢哋寫得咁好睇係必然。
我嘅渺小心願,就係繼續為大家提供少少迫車迫船、打貓煲煙如廁時候嘅娛樂;以換取少少Medium嘅稿費同埋likecoin(你哋唔係真係諗住我會無償寫稿呀)。
不厭其煩再講一次:由於Medium改變用戶條款,所以我暫時移開LikeButton,希望各位喜歡我嘅文字嘅讀者,除咗喺呢度拍手之外,亦都可以去我個WordPress Blog https://herrfung.de/ 中任何文章嘅LikeButton上面拍手。會員讀者請支持一下我嘅收費文章;謝謝!

