借戲發揮： 《 逆貧大叔 》
我決定開多個不定期欄目叫 《 借戲發揮 》 ，方便大家了解我寫劇嘅目的，並唔係為咗寫劇或者劇透，因為我覺得韓劇嘅背景同創作意念，比所謂嘅 「 觀後感 」 更有趣。最起碼，我希望 《 借戲發揮 》 係提供電視劇輔助資料、俾大家更多唔同角度同埋趣味去煲劇，而唔係 「 劇透死全家 」 呢啲阿媽係女人文章。
觀後感 — 老實講，個個睇完都會有，真係唔讚都識屌句；我冇必要浪費自己同大家時間。但背景同創作意念唔同，一來唔係咁易睇得透；二來韓國嘢好多人唔識睇 — 包括 99% 所謂 「 韓國 KOL 」 。
所以，冇比電視台或者串流網站簡報更多嘅劇透；我只係提供 「 偉哥 」 俾大家去煲劇。
講到 「 借戲發揮 」 ，《 逆貧大叔 》 呢套劇又點可以唔提迪士尼？我喺唔同地方都見過呢句 tagline： 「 講述即使在戰爭期間也總是為人們提供一日三餐的三食叔叔，遇見了想要打造人人都吃得飽、住得好的國家的一位精英青年，一起實現夢想的火熱故事。 」
首先， 「 打造 」 兩個字好撚討撚厭！我會打柒你同造鳩你，但唔會打造你。只有最冇文化嘅國度、先會將建造製造創造營造架造釀造等等等等溝埋一個 「 打造 」 。
然後，套劇劇名叫 《 逆貧大叔 》 — 究竟香港而家係咪走咗一班人去英國之後，連稍為似樣少少嘅發行部或者宣傳部員工都冇？自 2013 年、宋康昊嘅《逆權大狀》（ 原名：辯護人／변호인 ）之後，但凡佢有咩作品推出，差唔多諗都唔使諗就 「 逆權 」、 「 逆貧 」 。我差啲以為佢同卞約漢嘅角色合作喺戰後南韓開 NGO 派飯…… （ 差啲唔記得港產嘅 《 逆流大叔 》…… ）
《 逆貧大叔 》 （ 삼식이 삼촌／三食大叔 ）並唔係套賣溫情嘅暖心劇；相反，呢套係講述戰後南韓喺個微妙交界點嘅歷史政治創作劇。
之前寫 《 陽光先生 》 時寫過，最難寫嘅劇本，一定係扣入歷史而無縫嘅劇本。因為歷史早有定案，編劇要憑空創造一班人佢扣入歷史而唔犯駁，其實係好困難嘅工作 — 最起碼，佢要熟悉嗰段歷史；唔係一般熟悉，係好熟嗰隻。
而呢件事喺事事講求政治正確嘅迪士尼度做就難上加難。直到呢一刻，我仍然等待迪士尼為韓國創造韓國黑人、或者 LGBTQ+ 歷史人物；例如黑人乙支文德、同性戀申師任堂、或者變性黃真伊之類。再唔係將申潤福變做女人同金弘道玩梁祝囉！反正又唔係冇學者質疑過。
請移玉步往 Patreon 繼續閱讀；感謝！
歡迎大家加入我嘅《IF 文章 PUSH》channel：https://t.me/ifpush、同埋 subscribe 我嘅 stories，咁樣大家就可以以最快嘅速度、獲得我嘅文章更新推送；感謝大家嘅支持。大家亦可以喺 Patreon follow 返我： https://www.patreon.com/herrfung
