
找數喇!
是咁的,如果大家仲有印象的話,應該記得,三個多星期前嘅某週日早晨,我開口夾著脷,喺我老婆面前斷得好正咁舐咗鑊嘢:
其實又冇乜嘢嘅,講真,我有個大量嘅老婆嘛(留意返:量詞喺呢個位好重要,爭緊個「個」字真係會死人㗎),佢又點會因為呢啲無心之失而嬲我呢!有個咁好嘅老婆,係咪應該買返少少嘢獎勵吓佢呢?!


平時真係冇乜點留意呢啲pure女人嘢,於是喺揀夾嘅過程中,我就順便睇吓呢間嘢啲歷史。原來,Alexandre de Paris咁多年以來,都一直保持住佢哋嘅傳統 — 呢隻聞名嘅Vendôme Clip,仍然堅持喺法國本土生產、全隻以人手加熱並扭曲至出廠時嘅特定弧度。淨係呢份堅持,抵跌錢俾佢啦講真(都跌咗啦,到你話唔抵咩?)。
不過,始終呢間嘢都係法國品牌,點都沾染咗啲法式「硬膠」態度;話晒法國都係歐洲「派膠」大國之一嘛。喺我科水(Paypal)之後,佢哋差唔多十日都冇人follow up我嘅柯打,send email去追問亦冇回音。結果,我一氣之下,去Paypal file個dispute,威脅要使用buyers protection,佢哋先即刻發貨,再send email俾我道歉。
講真,住喺呢邊八年,又點會唔知歐洲啲「膠事」吖。只能講句:各有各柒,沒有誰比誰更高尚。
除咗𠱁老婆之外,間中都要𠱁吓自己嘅。呢次我買俾自己嘅小玩意係:

之前未有行貨嗰陣,各廟各菩薩;有啲網店開到成百四五歐一部!幸好,呢個世界有Amazon,佢哋開咗個價,大家都要跟(唔好講咩霸權壟斷,平成半已經超出「小店要生存」呢個話題);75.99歐免郵費(Amazon Prime),算公道啦。
其實,我恨咗呢樣嘢好耐。讀書嗰陣,由於被「充軍」嘅關係,呢啲遊戲機永遠都係同我擦身而過。後來大個,斷斷續續都有買Dreamcast、GBA、PS2、PS3、NDS同埋Wii嚟玩;但係心裏面想要嘅,始終都係一部「紅白機」、「超任」或者「N64」。
同我個妹唔同,佢永遠都係鍾意最新嘅console同game。以前兩兄妹,好鍾意一齊打GT5、Assassin’s Creed、GTA之類嘅game。但如果有得俾我選擇的話,紅白機或者超任嘅game,先係賣飛佛。太花巧嘅3D graphics,我怕頭暈;去到Rainbow Six、COD或者MOHAA之類,已經係我嘅極限。
又買嘢𠱁老婆、又買嘢𠱁自己,呢期搞邊科呢?
其實呢,我哋兩公婆下星期放假!既然放假,咁就梗係要買啲嘢玩吓開心吓啦!除咗上面嗰兩樣嘢之外,同好多香港人一樣,我哋放假都會去旅行。
去邊呢?之唔係又係布拉格囉!係㗎,我哋兩個好悶㗎!放假就淨係識去布拉格。因為要shopping換季嘛;唔去布拉格,唔通去深圳咩!廿零歐Full English Breakfast、四五十歐fine dinning(以上皆兩位計),呢啲好難抗拒喎。
點都好,所以下星期啲《北角演義》將會全程自動波。留言嘅嘢覆到就覆,覆唔到都冇計;去玩大晒嘛!
廢噏完畢,繼續打機;係咁。

