北角演義(二十四)

「辦公室政治」係職場嘅一個重大課題,亦都係大部份打工仔希望可以避免發生喺自己身上嘅事情。

雖然,我都見過有啲人返工嘅主要目的,就係玩辦公室政治。我見過,我真係見過。不過,呢啲撚人一般喺公司嘅壽命都唔會長;無他,eat or be eaten,總唔會次次都係你贏。

好明顯,Renee處心積慮,就係想用辦公室政治嚟排除異己。佢部署多時,睇嚟唔會善罷甘休;一場腥風血雨就在眼前。

我唔知佢挖我過嚟,同呢場大龍鳳有冇關係,我亦唔知佢想我喺呢場大龍鳳中,扮演咩角色。但係我好肯定,我嘅對策,就只會以自保為主。

因為,我唔會為任何人賣命;呢個係我嘅宗旨。


星期五。

捱埋呢十粒鐘又一條好漢。呢個weekend我要砌足Eunice兩日!

好多人以為,公關係一份對客人嘅工作,其實呢個講法啱就啱,但唔夠準確。公關的而且確係要對客人,但公關真正嘅頭號工作拍檔,係Microsoft Outlook。

根據我嘅非正式統計,一個正正常常手頭上有足夠account嘅consultant或以上職級公關,平均每日會收到大約二百個email。基本上,如果嗰個朝早唔使出去又冇特定嘅嘢要做的話,咁嗰朝都會要嚟招呼呢二百個email — 未必個個都要你插把嘴,但係最好個個都係咁𠵱跟一眼,否則死咗都唔知咩事。

公關行業之所以email多,並唔係完全因為多嘢要傾;講真,來來去去嗰三幅被,唔係捽plan就係捽clips,再唔係就捽report;總之走唔甩個捽字。其實,真正導致我哋個Outlook常滿嘅,係email loop。

一個AC send個weekly synopsis report俾個客,cc晒俾成team人;一個AE send個media list俾個客approve,cc晒成team人;我老頂send個PR plan俾個客,cc晒所有consultant;個客覆一句得定唔得,reply all;個客屌鳩我個AE覆得慢,reply all。上述所有email,都會cc Richard同埋Yvonne,因為,佢兩位on晒所有email list;名副其實無處不在。

喺一間公關公司,email loop唔只係communications,仲係行為藝術。一個email,to邊個from邊個cc邊個bcc邊個,全部都有學問,每一個email嘅學問都唔同。萬一是但一個sender或者recipient錯咗,輕則出醜,重則隨時有殺身之禍、飯碗不保。

所以,email亦都係公關公司最凶險嘅一環;辦公室政治漩渦四伏。

「叮噹!」唔係門鐘,係Outlook有新email嘅訊號。

Yvonne send咗個email俾晒account servicing team,叫我哋唔好立亂將自己剔出任何email loop或者email list之外,話邊個人on邊個email loop,完全係管理層嘅決定,AST同事冇權自把自為;語氣非常不善。

當我仲考量緊究竟發生咩事嘅時候,即係email落地唔夠一分鐘,我對面檯嘅Winnie拍咗一吓檯、然後氣衝衝咁走咗去後面嘅AC區域。

「你兩個,跟我嚟!」AC區傳嚟Winnie暴燥嘅聲音。

「errrr……我仲有個report趕緊喎……」其中一把女聲反抗。

「我唔係問你得唔得閒!跟我嚟!」Winnie再次咆哮、殺氣騰騰。

然後,我見到佢「的」咗Betsy同Estella兩個AC入會議室,重重嘅閂門聲表示,裏面呢個moment係臨時屠場。

「知唔知咩料呀?」喺我後面嘅Eric同側面嘅Johnny差唔多同一時間連人帶椅轆到我身邊,但係Eric問快一步。

「我點Q知呀!」我答晒兩個。

「呢個場你同佢最熟喎,」Johnny加把嘴,連我孖檯嘅Philip都引埋過嚟。「佢有冇漏少少俾你知呀?」

「我同佢熟都唔會知佢幾時姨媽到啦!」鬼知咁多咩。

大約十分鐘後,Winnie同兩個「剷後抑鬱」嘅阿妹出返嚟;我哋三個隨即挾咗佢落樓「Robatayaki」(爐端燒;煲煙之謂也)。

「咩事咁勞氣呀Winnie姐?」Johnny好識做咁買咗杯咖啡俾唔食煙嘅Winnie。「飲啖咖啡下吓火先!」

「嗰兩個死八婆、十三點!」Winnie仍然怒氣未消。「琴日,佢兩隻嘢走埋嚟同我講,既然而家我都唔再係S記嘅account servicing team嘅人,不如將我個名由email list度delete咗好唔好?我梗係話好啦!日日成兩三百個email,我梗係想睇得少啲得少啲啦!點知兩個死八婆,轉個頭就去同Yvonne講,話係我要求delete咗我個名!大佬!兩件事完全唔同喎!家陣算係陰我擺我上檯呀!?」

「原來係咁,唔怪得之你咁勞氣……」Johnny答佢。「嘩!擺明煽你喎!你得罪咗佢哋兩個呀?」

「邊有喎!都未同佢哋做過嘢……」Winnie飲住咖啡,開始下火。「喺你哋未收到個公海email之前,我已經俾Yvonne喺email度剷到上天棚喇!」

「可能未必係有心呢,兩個嘅智商加埋都唔夠一百……」我加把嘴。「從佢兩個日常喺office嘅表現,我唔認為呢兩個腦筍都未生埋、日日攬住個咕𠱸踢住對毛毛拖喺公司搵零食嘅『天真無邪』阿妹會有呢個智商去陰人。可能正正就係唔識陰人,結果咪陰到人囉。」

「我都同意,佢兩個唔似咁醒;」Eric終於出聲。「不過都係小心啲好,尤其是你哋兩嗰;」佢指一指我同Winnie,然後繼續講:

「你兩個比較新,唔知呢間公司嘅文化。喺我哋公司,AC係可以惡過AD嘅!」

我同Winnie冇答佢,不過變咗兩隻「唔撚係啩鼠熊」,難以至信表情上晒面。

「Richard好鍾意喺呢啲位扮好人扮關心基層同事,佢差唔多一頭半個月就會搵啲AC傾吓計,聽吓佢哋對工作有啲咩不滿,特別係我哋呢班所謂嘅『管理層』。你唔見班阿妹每個星期訂『私房湯』,都會幫Richard同Yvonne訂埋嘅咩?!唔好見佢哋過嚟問我哋一句?我哋係剝削階層嚟㗎!」Eric一邊扯住萬寶路、一邊講故仔。

「總之你兩個記住啦,呢班阿妹一句說話可以直達天庭㗎!好自為之啦,以後叫人做嘢客氣啲呀!」

雖然呢個故事我今日都係第一次聽,但硬係唔知係邊聽過咁嘅……呀!紅衛兵呀!

一諗起紅衛兵,我隨即諗起,幾年前同Richard做專訪嗰陣,佢曾經輕輕咁暗示過,佢好欣賞毛澤東,又話佢嘅管理哲學好適合現代企業。估唔到佢真係夠膽將老毛嗰套put on practice。

煲完煙交換完情報,我地分頭返上office。喺Winnie準備推門入大堂嗰陣,我拉住佢。

「你同Yvonne做嘢,要小心啲;」我提一提佢。「佢出晒名同女同事夾唔到,你隔籬位嗰個,當年幾乎死喺佢手下;醒定啲。」

「我今日都差啲死啦!知道喇,唔該晒。」Winnie嘆咗口氣。「係喎,你之前同佢哋好熟㗎?」

「識咗幾年咁啦。你都知,公關同傳媒呢個行頭,來來去去咪又係呢班人!」我答佢。

「咁又係!」佢突然靈機一觸。「咁我以前有冇見過你㗎?」

「我點知呀!你自己諗吓啦!」我拋低呢句後,拉門入大堂搭𨋢。

(待續)


本故事人物及情節如有雷同,實屬巧合。
希望各位喜歡我嘅文字嘅讀者,除咗喺呢度拍手之外,亦都可以去我個WordPress Blog https://herrfung.de/ 中任何文章嘅LikeButton上面拍手。會員讀者請支持一下我嘅收費文章;謝謝!