H Fung寫文先講一輪廢話然後先入正題是常識吧。
做過記者,或者做過公關(寫過吓press release嘅公關)就會知道,呢個世界上最悲涼嘅事情,就係要為一件唔夠料嘅人/事/物,寫一篇唔長唔短嘅嘢;悲涼程度同做鴨冇分別。
唔係咩?試想像:你對住一個五十過外、三百五十磅嘅全裸富婆,唔准走唔准嘔,仲要表現得好似見到女神色誘你咁興奮,然後仲要識得硬、有貨交;你話悲唔悲?
寫嘢其實都係咁。當你嘅米飯班主俾個冇料到嘅「題目」俾你,然後你要接落去、寫到佢有料到仲好好睇、「有貨交」;悲觀啲諗,做鴨可能會好少少,一來錢多啲,二來時間短啲。
係咁㗎喇!鬼叫你揸筆搵食咩?!
套戲都兩年㗎喇,大家當睇我發噏瘋,感覺會好過當睇影評。又:呢篇嘢嘅資料搜集同分析做咗我大半日,全部都係韓文,俾多啲掌聲吖唔該。再又:我嘅一日,喺由早上十點到午夜。
之前見有文友話「講歷史就擺明趕客」;等我又睇吓有幾趕客先。
唔好誤會,我唔係講緊德惠翁主本尊冇料到(其實佢有冇料到就真係好難稽考);事實上,我對佢嘅遭遇120%同情。相比起德惠翁主嘅故事,同樣係落難皇族嘅「末代皇帝」溥儀,只能算喜劇;因為,佢老人家起碼都仲有個人意志,同埋幾個女人(至於佢得唔得就按下不表)。
以現代醫學角度而言,德惠翁主喺佢十三歲被迫去日本「留學」嗰陣,已經患上抑鬱症。喺佢十七歲嗰年,佢嘅生母梁貴人病逝,飽受打擊嘅翁主確診患上「早發性癡呆症」(一曰精神分裂);從此,佢嘅人生就唔屬於佢自己。因為自後無論發生咩事,佢嘅個人意志都不在決策範圍之內;身如柳絮隨風飄,真真正正嘅「一生不可自決」。
基本上,德惠翁主只不過係一個任人擺佈嘅軀殼,冇任何個人意志,亦都冇任何反抗能力。再加上佢人生大部份時間都罹患精神病,發生喺佢身上嘅事情,可以話毫無故事性可言。
試問如果你係編劇,你會點寫呢隻故事?
事實上,編劇都只不過係改編權丕暎嘅暢銷同名小說《德惠翁主》。