技術文:足球人( 上 )
首先,我想同對足球冇乜興趣嘅讀者講聲唔好意思,因為我想講波 — 歐國盃期間唔講波,咁幾時講?
然後,喺大家準備問候我全家之前,我想指出,其實我已經不下 N 次詢問大家究竟想睇啲咩題材嘅文章;甚至喺 Patreon 嘅 chat 度分出唔同版位、鼓勵大家多啲交流討論,但所有努力都 fall on deaf ears。寫作遊戲好簡單,我每星期有若干版面若干字數要填,你唔俾提議的話就由我揸旗,同時亦唔接受詐型,因為我已經俾咗好多機會同渠道大家去反映;冇難度吖嘛?
不過,即使對足球冇興趣嘅讀者、特別女讀者,我都建議你睇吓。因為你睇完呢兩篇文後,你嘅足球知識,可能已經多過你另一半。冇錯,香港人睇波靠個吹字,以為識得屌人 「 唔識波 」 就代表自己好有料;好多球迷其實唔知自己睇/講緊乜,但就覺得自己比高普更了解足球。
有啲嘢吹係冇用嘅,因為喺 2024 年,足球已經係高度分工同科學化嘅運動;維園阿伯嗰種 「 一人跑多步去幫波 」 策略已經唔 work。一個球員有冇交足貨亦唔係任何人說了算,配備 Veo 或者 DJI Osmo Pocket 3 攝錄機、再加上裝咗 Nacsport 或者 Impect 嘅任何電腦,都可以計算出每個球員嘅 Packing Points、Heatmap、跑咗幾多公里等等 player stats,吹水怪無所遁形。
因為我唔想一個星期趕住推七八千字一篇 《 隨想 》 ,所以呢個題目分兩篇寫。
要講足球,首先要講吓喺球場內嗰廿二條友究竟喺度做緊乜?我知踢波,但點踢先?邊個人負責緊邊個位置、而呢啲位置要求佢哋做啲乜?
「 我知!前鋒中鋒同後衛,著 10 號球衣係最好波嗰個,其他係茄喱啡! 」 唔係講笑,我真係聽過有人咁同我講。
喺香港,中年球迷好多都中咗 《 足球小將 》 毒,覺得漫畫中所述就係真理;碰啱上世紀 80 年代係 10 號球衣橫行嘅年代,大空翼( 戴志偉 )一個人帶波扭過對家成隊人然後入波,於是就出咗上述嘅 quote。
狹義上,10 號球衣喺足球戰術中係一個位置,同地位技術無關 — 雖然出過好幾個著 10 號著到開晒巷嘅球星,如馬勒當拿、柏天尼、薛高、巴治奧、施丹等等。喺現代足球( 呢個會喺本文不斷出現嘅名詞 ),10 號同其他號碼一樣,已經冇咗當年嘅特出地位。我相信高橋陽一亦知道呢個事實,否則唔會喺後期安排勞比杜叔叔講 「 呢個世界再冇 10 號球衣 」 呢句對白。
喺球迷眼中,足球當然有明星;但喺球隊角度,一場波十一個球員,十一個都係不可或缺嘅重要成員。唔信你睇吓即使最強球隊,萬一有人領咗紅牌出場嗰種𢲡手唔成勢嘅困境就會明白。
要講球員功能,首先由守門員開始。
「 守門員咪接波守龍門嗰個囉!使撚你講咩! 」
Well,現代足球有三種唔同守門員:撲救型( Shot Stopper )、控球型( Ball Playing Goalkeeper )同清道夫型( Sweeper Keeper )。
按:本篇所有足球術語同名詞都以英文同任何外語為準,中文只係翻譯。
請移玉步往 Patreon 繼續閱讀;感謝!
歡迎大家加入我嘅《IF 文章 PUSH》channel:https://t.me/ifpush、同埋 subscribe 我嘅 stories,咁樣大家就可以以最快嘅速度、獲得我嘅文章更新推送;感謝大家嘅支持。大家亦可以喺 Patreon follow 返我: https://www.patreon.com/herrfung