技術文：足球人（ 下 ）
呢個世界有種二奶命，叫英格蘭，連續兩屆歐國盃亞軍。老實講，即使唔係英格蘭迷，我都戥佢哋可憐。
整個決賽週，全世界都努力屌鳩修夫基（ 誠實豆沙包：我都有屌過佢悶 ）。講句公道說話，佢排陣的確悶；只不過，邊個話足球一定要全攻型、踢得好睇先會贏波？費格遜名言： 「 Attack wins you games, defence wins you titles. 」有啲年資嘅球迷仲記唔記得，1990 年西德點樣贏得世界盃冠軍？
贏波還贏波，精彩還精彩，兩件事嚟。西德 90 年捧盃，都只不過靠布林美（ Andreas Brehme ）臨完場一個十二碼。
講悶，修夫基仲未係碧根鮑華嗰班波。修夫基當年踢緊英甲水晶宮、仲未入國家隊，但相信佢有睇晒 1990 年成個 tournament。上世紀 90 年代，防守足球係世界主流；即使 1994 年嗰屆都仲係咁。仲有冇人記得，94 年決賽巴西對意大利有幾悶？
最重要係，修夫基自 2016 年執教英格蘭開始（ 仲記得當日隊英格蘭有幾爛嘛？ ），八年間攞過一次世界盃殿軍、兩次歐國盃亞軍，從未試過分組賽出局。老老實實，自 1966 年以嚟，邊個教英格蘭教得好過佢，麻煩大家指點吓我。
嗰啲甚麼 「 最好嘅防守就係攻擊 」 意氣說話，鳩噏㗎咋！你估打爛仔交咩！
第二個我經常戥佢唔抵嘅係哈里簡尼（ Harry Kane ）。香港球迷基本上當佢係垃圾，好似射失一次十二碼就一世係廢人。甘賓尼接棒執教拜仁，我竟然見到有英迷出 post 「 提議 」 先賣走哈里簡尼！試問有咩咁大仇口，連成績都唔睇？
哈里簡尼係英格蘭國家隊史上入球最多嘅球員（ 66 球 ），佢踢咗一季德甲，已經成為德甲史上單一球季入球最多（ 36 球 ）嘅三甲之一，只係略少於利雲度夫斯基（ Robert Lewandowski／41 球 ）同格得梅拿（ Gerd Müller／40 球 ）。你真係肯定賣走佢拜仁會重奪德甲冠軍？
有時候，球迷同韓國男女團粉絲其實差唔多質素。
今集講嘅係前中場球員同前鋒，大家睇波鏡頭影得最多嘅球員。
過去兩集，我經常強調，現代足球進攻同防守之間嘅界線越嚟越模糊，唔同崗位球員嘅分工亦越嚟越模糊。呢種講法對前中場同前鋒尤其適合，因為兩者之間嘅分野亦越嚟越模糊。美斯本身係 9 號兼 Playmaker，因為佢經常墮後攞波，所以亦可以勝任偽 9 號（ False 9，唔係非常類似嘅 Deep Lying Forward/DLF，因為體格上同技術上嘅分別 ），同時佢亦可以打移中翼鋒（ Inverted Winger ）位置；於是幾種唔同位置集於一個球員身上。同樣例子當然仲有 C 朗。
有時候，球隊如果有足夠數量嘅優秀中場球員，甚至可以放棄前鋒 — 2010 年世界盃冠軍西班牙就多次擺出 4–6–0 無鋒陣；即使費托（ Fernando Torres ）落場亦只係偽 9 — 事實上成個決賽週佢冇入過球。
所以，前中場球員同前鋒嘅位置好多時都可以互換；有啲球員喺整個職業生涯唔同階段亦可能會踢唔同位置。有特別天賦嘅球員甚至可以自創一個位置 — 啱啱宣佈退出國家隊嘅湯馬士梅拿嘅足球生涯就創出咗個獨一無二嘅位置：Raumdeuter，英文係 「 Space Interpreter 」 。
請移玉步往 Patreon 繼續閱讀；感謝！
歡迎大家加入我嘅《IF 文章 PUSH》channel：https://t.me/ifpush、同埋 subscribe 我嘅 stories，咁樣大家就可以以最快嘅速度、獲得我嘅文章更新推送；感謝大家嘅支持。大家亦可以喺 Patreon follow 返我： https://www.patreon.com/herrfung
