技術文:足球人( 中 )
上星期講完後防,今個星期講中場球員。
要同大家講聲唔好意思,原本諗住兩集講完嘅足球人,睇嚟要開第三集,因為當中牽涉嘅資料實在太多。既然呢段時間係歐國盃四強戰期間,大家就高抬貴首唔好詐我型、俾我寫多少少啦!反正寫完呢三集,我都應該有好一段時間唔夠貨再寫足球。
講開中場球員,大家有冇睇西班牙對德國?喺 2022 年世界盃決賽週,西班牙同德國上演咗一場可能係當年成個球季最精彩嘅戰術比拼( 當然,要識睇先知咩事 )。今年歐國盃,西班牙同德國除咗戰術之外,同時亦上演咗一場中場大戰 — 當然係德國稍遜一籌。
德國隊喺今屆歐國盃嘅表現,被絕大部分德國傳媒形容為脫胎換骨。出局後,接近冇任何傳媒好似以往咁毒舌攻擊教練或者球員 —前鋒 夏維斯( Kai Havertz )係比較例外嘅一個;佢喺對西班牙嘅表現惹嚟質疑,有足球網站形容佢為 「 西班牙第五個後防球員 」 。但除此之外,德國傳媒同球迷今次都非常錫住佢哋,因為大家睇到希望 — 國家隊一洗過去六年頹氣。
今日講中場,我當然要提下中場球員。隨住德國隊八強出局,今屆德國隊嘅靈魂卻奧斯( Toni Kroos )亦完結佢嘅足球生涯。我想俾少少數字大家睇吓:呢屆歐國盃德國嘅五場賽事中,卻奧斯一共傳咗 514 球,其中只有 27 球失誤,傳球成功率達到 94.8%,接近隨心所欲;呢啲就係真正 「 中場指揮官 」 。好幾個權威足球網站都問同一個問題:佢係咪真係咁堅決要退休?C 朗回晒塘都仲踢緊喎!
中場球員係一隊波最重要嘅一群人 — 唔係話其他位置冇佢哋咁重要,但中場球員係球隊裏面嘅血管同血液。試想像當血管同血液運作唔暢順嗰陣,你身體其他部位會點。
實際上,中場亦係球賽大部分時間嘅角力場所 — 一場實力唔太懸殊嘅球賽,大約有六成幾時間會喺中場進行。得中場、得天下;文首西班牙對德國嘅賽事、甚至呢兩隊傳統勁旅大部分嘅對賽都係中場對決。
寫到呢度,原本我想寫 「 中場球員大致分為兩種:防守中場同進攻中場 」 ;但細心一諗後,我有啲猶豫 — 近年足球嘅演變,經已令到防守同進攻呢兩種策略之間嘅界線越嚟越模糊。喺球場上,好似馬基利尼( Claude Makélélé )呢種只著重防守嘅 「 中場毀滅器 」 買少見少;即使美斯同 C 朗近年亦要參與防守任務。相反,類似卻奧斯同 「 小豬 」 舒韋恩史迪加( Bastian Schweinsteiger )呢種司職防中、但經常成為中場指揮官( Deep Lying Playmaker ),甚至可以擔任全能型中場發動攻擊嘅球員已經成為主流。
事實上,防中成為 DLP 亦非常符合球場物理:傳統防中天職係第一道防線,主要負責截停對方衝緊過嚟嘅 9 號及/或 10 號位球員;有咩好得過喺佢哋奪回控球權後、順勢發動進攻?呢種策略喺德國足球非常常見。
請移玉步往 Patreon 繼續閱讀;感謝!
歡迎大家加入我嘅《IF 文章 PUSH》channel:https://t.me/ifpush、同埋 subscribe 我嘅 stories,咁樣大家就可以以最快嘅速度、獲得我嘅文章更新推送;感謝大家嘅支持。大家亦可以喺 Patreon follow 返我: https://www.patreon.com/herrfung