上星期五係近期少有嘅極端黑仔日子，除咗收到朋友嘅死訊之外，嗰日我好多年冇發作嘅胃痛突然返嚟探我。以為食咗藥會好啲，點知完全唔止痛不特止，痛痛吓仲變成胃抽筋……
我好怕臨近週末先嚟病，除咗因為 weekend 冇醫生睇、我又唔想打 116117 叫醫生上門打止痛針之外，最大嘅原因，係我一星期只有星期五六先會食「正常餐」（其餘時間我食高蛋白冇乜澱粉嘅「齋餐」），咁啱呢個 weekend Winnie 買咗一打 KFC……我睇住佢同隻貓食家鄉雞、自己一個聞住滿屋雞味痛到典地……
我個人嘅最大弱點，係病痛 — 我唔係好忍得身體疼痛嘅人，一旦病痛發作、特別係痛症，我正常嘅忍耐力同耐性就會冇晒，脾氣會變得一發不可收拾。其實唔係我專登發少爺脾氣，只係每次身體出現痛症都會係咁，好似自然現象。
呢啲嘢，身邊嘅人當然會首當其衝受影響。第一個係 Winnie，第二個係同我有頻密接觸（每日半公半私 KaTalk 溝通）嘅四次元韓國朋友。
「你今日唔舒服呀？」敏感嘅韓國朋友，可能已經感覺到有啲唔妥。
「我胃痛得好犀利，」我有氣冇力咁答佢。「痛到有啲想嘔咁……」
「係咪食滯咗？」佢問我。「篤中指得唔得？」（韓國秘方，同穴位有關，但唔係我呢個 case）
「唔係食滯，中指留返你自己篤……」我答佢。其實好人好姐嗰陣，我對佢會 nice 啲。
「有冇藥喺屋企？」佢再問我。
「有，但食咗都唔覺有效……」我望住排藥丸，完全唔知點解會咁。之前呢隻藥萬應萬靈，呢次連少少感覺都冇。
「呀！你有冇呢啲藥喺度？」佢講咗啲韓國成藥名。「XXX? YYY? ZZZ? 有冇呢類嘢喺屋企睇門口？」
「冇……」我垂死掙扎。「我十幾年冇返韓國，德國又點會有呢啲嘢……」
「咁呀……」佢突然靈機一觸。「不如我叫助手幫你買，然後寄俾你？」
「韓國寄嘢過嚟，就算 EMS 都要一個星期；」我冇佢咁好氣。「寄得嚟一係好返、一係死咗……」
「咁……」佢仲未肯放棄。「不如你試吓飲杯暖水，可能可以鎮痛喎！」
「你當我經痛咩……」我其實痛到唔想同佢再糾纏。
「咩呀，都係嗰度附近，隔籬左右可能都得呢……」幸好佢係演員唔係醫生，否則死得人多。「你試咗先啦！」
