先講個爛笑話。
是咁的，喺某年某月，我幫某商會，喺一個海港得一個嘅商場搞咗個launch event。當日event嘅其中一個環節叫「Blog Blog齋」；顧名思義，係請咗班blogger分享blogging心得嘅環節。
喺寫MC稿嗰陣，同事們已經盡量避重就輕，唔將個「blog」字同個「扑」字扯埋一齊。Event當日，個女MC介紹呢個環節嗰陣，佢第一句就同我爆肚直出：
「跟住落嚟呢個環節叫做『Blog Blog齋』，唔係扑嘢個扑喎！」
佢講完後，我從來未見過呢個商場，可以靜成咁；之前一晚凌晨一點set場嗰陣都冇咁靜。
鳩噏完畢；入正題。
作為一個揸筆搵食十八年嘅old seafood，咁多年嚟，我唔係冇諗過，自己寫啲嘢，然後一夜成名，以後唔使寫啲自己唔想寫嘅嘢，專寫啲自己鍾意寫嘅嘢。然後稿費源源不絕，我就炒吓股、攬吓女、撚吓雀（或者俾啲女撚吓雀）、舒舒服服咁過埋下半世。
每當諗到「自己寫啲嘢，然後一夜成名」呢個位，真係興奮到瞓唔著。然後我真係瞓唔著，因為醒起仲有兩隻稿到期未交；我可以選擇通頂寫起佢，或者通頂睇Job Market搵過份工；點都好，都係冇得瞓。
一夜成名，仲難聽過粗口。
最初接觸Blogging，係2004年，我開咗個Xanga。開呢個Xanga嘅原因，同想寫嘢成名完全無關。當年我寫blog嘅原因，係因為正值人生嘅一個災難期；我同一個拍拖唔夠一年嘅女人閃婚，然後閃離婚。由簽紙結婚到簽分居協議，前後啱啱半年。
情感的風光
無限人在看
難到處細訴只好說謊
喺香港，呢啲私人嘢你唔會同同事講，因為你一講，好快就連公司memo都會寫埋出嚟。我喺香港冇乜知己（冇乜，唔係冇），亦唔想晚晚攬住個長途電話煩Colette；寫blog係唯一舒發途徑。
當年我眼中嘅Xanga，係一個𡃁仔𡃁妹同MK精嘅集中營。琳瑯滿目嘅glittering橫幅開版圖、marquee走字、midi甚至mp3直接播放，彷彿瞬間進入咗一個coding世界；裏面仲有好多html教學blog，教你點樣hack Xanga個settings去整上述嘅coding effect。
除此之外，我喺Xanga，基本上係自己寫嘢俾自己睇；喺一堆寫緊火星文同「誰在悼念快將接近成年 誰告戒我課室不要睡眠」嘅𡃁仔𡃁妹當中，又邊會有人有興趣睇一個三十出頭嘅失婚麻甩佬寫嘢？「卅歲仲學人失戀？乜卅歲仲未更年期咩？」
