LETTER

IF夜信( 사랑하다 밤편지 )20KW1

IF
IF
Jan 4 · 5 min read

本週中期嘅《隨想》經已轉咗年份重新reboot,而家到《夜信》轉年份。因為開始時冇好好考慮清楚,所以《夜信》嘅calendar week(KW)之前,冇加上年份。為免真係有咁長命loop 返到最初嘅KW35引起混亂,所以由2020年開始,加返「20」喺前面以資識別。

係咪好奇怪,點解又見到我部MBP嘅keyboard呢個「御用畫面」(我真係好鍾意用佢嚟做backdrop),再加部過期手機做model呢?

大家仲記唔記得,我曾經喺《夜信》講過,我趁Black Friday同Cyber Monday期間,幫襯法國皮革店Hadoro買咗個iphone殼?經過四個星期嘅漫長等待,我今日(2 Jan)終於收到貨。

其實我買嗰陣,明明係寫明in-stock,點知俾咗錢後就冇Q晒影。Send email去問CS,發現係全球最垃撚圾(沒有之一)嘅「罐頭CS」Zendesk代辦,乜都唔識答淨係識copy and paste T&C,話甚麼旺季lead time要四個星期,嗌回水又已讀不回。結果喺冇計又唔想㩒掣搵ECODR(大時大節唔想咁勞氣),唯有焗等。滿以為過埋Dreikönigstag就同佢嚟場大龍鳳之際,佢又竟然有貨交喎!法國佬嘅膠力,果然係歐洲之冠。

撇除呢啲咁不快嘅CS經歷,我想講,Hadoro嘅皮具,係值得等嘅。老老實實,佢嘅皮殼並唔係好似Mous或者Gear4 D3O之類、可以俾你喺十幾廿呎飛落地唔爆嘅保護。Hadoro嘅機殼,如果冇嗰條手帶,可能心口高度落地,個電話就收得皮。

「既然咁流,你仲俾咁多錢買?錢多到冇埞使呀?」

因為四個字:Hand made in France。

喺一個全球發達國家都將中國、越南、孟加拉、印度呢啲國家當係世界工廠嘅時代,仲有廠家抵受得住提高profit margin、廉價大量生產呢啲誘惑、堅持逐隻手機殼人手製造;講真,其實同英國Savile Row嘅bespoke tailoring冇乜分別,只會買少見少。

我幫襯佢,其實同你哋幫襯黃店一樣,想用錢嚟「懲罰」佢哋呢種寧願賺少啲都維持本土製作嘅戇鳩決心。錢係搵嚟使嘅,與其幫襯一啲賺到盡然後喺大陸設廠嘅「奢侈品牌」、間接幫人哋籌維穩費,點解唔俾啲真係有heart嘅人去賺多啲?

(BTW,「奢侈品牌」係好撚柒嘅大陸用語。叫「名牌」,或者叫Deluxe Brand、Designer Label咪幾好,兩個簡單英文都嫌深就返去好好讀書,學乜撚嘢人買名牌吖。名牌手袋就係名牌手袋,乜撚嘢係「奢侈品牌包包」?香港人嚟㗎,有返少少格調好唔好?「奢侈」喺我讀書嘅年代,係貶義詞,ok?)

所以,我諗住下次再幫襯Hadoro買鱷魚皮機殼,唔好喺旺季買就得喇。

除咗Hadoro,自從某早上Freudian Slip、結果要買隻Alexandre de Paris髮夾去𠱁老婆補鑊之後,我哋亦都愛上幫襯呢隻同樣係法國本土hand made嘅品牌,最近我仲打算幫襯佢哋買梳。

有時候我覺得,如果能力許可的話,俾多少少幫襯一啲有heart嘅本土經濟(唔一定係貴嘢,總之EU之內皆本土),其實都係一種民主嘅價值觀 — 用錢去話俾某啲賺到盡嘅企業知,如果你繼續協助大陸賺維穩費的話,你或者仍然可以賺到盤滿缽滿,但當中唔會有我嘅nickel and dime。

Alexandre de Paris Les Camelias髮夾;Model: Frau Winnie

本週文章:

……唔好以為我喺外國住就可以倖免於難,信我,我2019年嘅計劃就因為咁而變咗好多。除非我決心同所有有關香港嘅人事物完全割蓆,否則就算我搬去火星都會受影響。講「住喺外國乜都唔關事」嘅人,其實只不過係自己未試過長居外國嘅一廂情願諗法……

……其實我並唔係未同姐姐合作過,喺我坐上市公司corp comm嗰陣,我就經常以客嘅身份,同姐姐開會傾嘢。喺最繁忙嘅日子,例如某啲外省嘅巡迴lanuch event,我哋可以朝見口晚見面成個星期。咁多年嚟,我對住Christine個「見客look」嘅時間,其實唔會少得過平時相處嘅時間……


《中環遊戲》係我第一輯完全放喺Medium收費牆之外嘅小說,供讀者文友免費閱讀。作為一個全職作者,我喺寫作上面嘅收入,就只靠LikeCoin嚟支持。所以,希望各位「讚賞公民」能夠喺上面嘅LikeCoin widget拍滿五拍,等我可以維持收入。未加入成為「讚賞公民」嘅朋友,可以喺呢度加入:https://liker.land/Civic?from=herrfung另外,如果你加入得夠早夠快的話,我仲會私人回返第一個月嘅月費、港幣卅八蚊俾你。只要你喺加入之後,去呢度:https://civicliker.typeform.com/to/YjFjqT 填返啲資料俾「讚賞公民基金會」幫我過數俾你就得。名額有限,先到先得,送完即止。P.S.: 最近有文友反映,用「IF」呢個名,好難search到我嘅文章。所以,建議大家使用我嘅domain name 「@herrfung」 去search,比較容易搵到我嘅文章。

널 위해 노력해 볼게 널 위해 살아갈게

IF

Written by

小說、散文、廣東話/粵文寫作。長篇小說 《當首爾仍是叫漢城的那些年》、《北角演義》、《初雪》、《中環遊戲》作者。 │ 中文 / English / 한국어 / Deutsch.

사랑하다

널 위해 노력해 볼게 널 위해 살아갈게

Welcome to a place where words matter. On Medium, smart voices and original ideas take center stage - with no ads in sight. Watch
Follow all the topics you care about, and we’ll deliver the best stories for you to your homepage and inbox. Explore
Get unlimited access to the best stories on Medium — and support writers while you’re at it. Just $5/month. Upgrade