UNPOPULAR OPINION: 利物浦唔買人，一樣攞到冠軍
「唔買人點攞英超冠軍？」
呢個可能係好多利迷，甚至高普迷，都開始懷疑。
懷疑？我都有，但係咪好灰，覺得利物浦冇機會攞英超冠軍呢？又唔係。所以決定寫呢一篇，探討一下今季利物浦嘅前途，睇吓有冇大家想象咁灰。因為，我覺得仲有幾大原因：支持利物浦奪冠。
利申：本文章以利迷角度撰寫，不喜勿入
原因1：今季、上季比較，球隊冇削弱
喂，上一季呢個陣容，攞到 97 分喎！同今季比，基本陣容變動不大，只係冇咗史杜歷治、摩蘭奴、米奴列，仲要上季頭 3/4 仲未 chok 出軒達臣踢 8 號位呢個 option 喎！雖然，上季真係有好多場係响失分邊緣搶番分數番嚟，但始終，今時今日嘅利物浦，我敢講已經係 Elite team，即係未開季你都已經肯定可以成為爭標分子＋歐聯坐底八強嗰啲球隊（如皇馬巴塞拜仁曼城嗰批）即使今季預計响整體英超實力更強下，預計實有 regression，好難再拎 97 分，但，爛船都有三斤釘啦，更何況係歐聯冠軍隊？
你可能話，唔係喎，2009 同 2014 兩年，都係拎完第二之後 PK 喎。要記住 呢兩年，拎完第二之後都有主力離隊：2009 係沙比阿朗素，2014 係蘇亞雷斯。今年？摩蘭奴咋喎！
原因2：後防不變
上屆利物浦嘅後防有幾好，唔需要再多講，仲要考慮埋其中有半季祖・高美斯係受傷嘅。上季只係失咗 22 球，對於利物浦球迷嚟講，係好唔慣。
門將：艾利臣上季表現當然係好，sorry 冇 fact-check，但我都幾肯定佢係一個 consistently out-perform xGA (預計失球數字) 嘅門將，踢羅馬最後一屆佢嘅 xGA outperform 咗 9.46 球，即係話畀一個「正常」龍門守，隊波差唔多會失多 9 球（分番逐場計仲驚人，係 11 球）。上季特別在，有 3 球係佢 errors leading to goal，由佢失誤導致失波。斷估今季唔會咁多？
左右閘：正選兩個唔駛多講，只會更成熟更強。羅拔臣如果有埋入波呢瓣，會更得人驚。後備當然擔心，睇嚟米拿同 Ki-Jana Hoever 將會係兩邊二閘替補。高美斯？希望唔好用太多，用波能力以中堅嚟講佢夠洗有突，但係二閘就仲爭好遠。
中堅：最強一環。VvD 同高美斯上屆季初嘅組合好到得人驚，季尾亦打起咗祖・馬迪嘅信心。呢三個是但出兩個都放心嘅。
另外，經過上屆，路夫蘭肯定變成高普心中第四號中堅。One of the best defenders in the world? 唔敢講。但佢肯定係 The best fourth-choice center half in the world.
後防小結：今季要應付多咗賽事，艾利臣踢咗成個美洲盃，應該會比上屆有少少退步。同埋，求神拜佛雲迪克唔好傷。
原因3：中場更強
高普嘅 4–3–3，3 個中場入面，有一個「6 號」，兩個「8 號」，而家一隊中場有 7 人 （L20/F3/W5/H14/AOC15/M7/K8），6 號位有三個球員可以踢（法賓奴、軒達臣、韋拿杜姆。嗱，拉蘭拿唔算，正式賽事冇踢過），至於 8 號位，除咗法賓奴外，全部都可以。
人腳呢？就肯定夠。加上上季基達傷多過踢，有大半季軒達臣仲係以 6 號仔身份出戰，今季執番正呢兩個「8 號位」，中場，只會更強。唔好忘記，上屆利物浦响聯賽，由中場貢獻嘅生波入球，只得 9 個，我預計呢季會有進步。
拉蘭拿有冇用？上季對般尼一場，證明咗佢始終係咁多個球員中最明白 gegenpressing 嘅球員。做替補、有邊個有傷，或者一啲要畀正選抖抖嘅時候落場，係有用嘅。
至於張伯倫？我就抱觀望態度，事實上佢究竟踢唔踢得番之前個水準都係仲一個問號。睇季前嘅片段，似乎佢要多啲時間。
原因4：前鋒師兄弟返來喇
沙拉上季聯賽「只係」入咗 22 球，大家都 feel 到佢唔係最 sharp，亦令到佢有一段時間太想入波變得獨食。2018 年歐聯／世界盃對佢影響好大，亦令佢上季表現失色。但有睇社區盾的話，都知道最強嘅沙拉應該番晒嚟。
奧歷治而响上屆證明咗自己，18/19 年聯賽佢嘅場均 xG 係接近 0.5，响隊中係僅次沙拉！
利物浦前線中最難替補嘅，始終係費明奴嘅 false-9 位，最得意係陣中除咗明奴，其他球員好明顯堅係唔識踢呢個位。除咗 Alisson 同 VvD，費明奴係最唔唔唔唔傷得嗰個。
至於 Brewster，我個人就相當期待。以往睇佢响分齡賽事嘅表現，如果以 CM/FM 能力值去計的話，佢 finishing 冇 20 都有 19，真係嗰種 old school 埋門力極強嘅射手。但現代足球，淨係有 finishing ability 係唔夠！不過高普季初講過佢可能响兩個 wide forward 位置試吓，都未必唔得。
原因5：曼城 regression
曼城响上屆做咗本土三冠、聯賽又贏咗兩次，哥迪奧拿又要證明攞歐聯，會唔會有影響？前季 100 分，上一季 98 分，係絕對嘅 outlier，今季會否再 regress 少少？睇踢法、曼城似乎真係唔多似會 regress 得太多，中前場更加冇減弱到，仲多番個 fit 番嘅迪布尼。不過响後防冇咗 Kompany，Otamendi 又老一年嘅情況下，退步，唔係冇可能。
總結：點先贏到英超？
好簡單：曼城失多啲分咪得囉！我知講就簡單，但唔係冇可能。今年，熱刺實力再增強，相信可以加入爭標分子，只會鬥得更緊。利物浦、熱刺同曼城三隊嘅「小聯賽」，可能會係爭冠軍嘅關鍵。睇番上屆呢個小聯賽得分就知咩事— 曼城：10 分，利物浦 7 分，熱刺 0 分。 一隊更強嘅熱刺，絕對有能力令曼城失多幾分。
你可以話，熱刺勁咗都會令利物浦失更多分架喎。冇錯！which brings me to my next point：利物浦要贏聯賽，就一定要：雙・殺．曼．城！上屆利物浦對曼城 1 和 1 負，今屆如果可以雙殺，係一個 nine-point-swing。純個人推測，曼城今季攞唔到 98 分咁多（同樣，利物浦都幾肯定攞唔番 97），但直接對碰嘅一來一回，絕對有決定性影響。
利物浦要贏英超？唔係冇可能。但依小弟愚見，一定要做到以下幾樣嘢：
- VvD、Alisson、費明奴整季大致保持健康（唔係咁易㗎葉師傅）
- 雙殺曼城
- 其他球隊（熱刺）生性少少，响曼城身上搶番幾分
其實，小弟（盲目）覺得利物浦贏到英超，仲有一個原因，純綷個人情感，係極度不理性嘅，叫做…
「In Klopp I Trust」
波，我未必識好多。高普，一定識得多過我。一個歐聯冠軍級領隊，唔信佢，信邊個？如果你見到球隊冇買過人心存懷疑的話，我絕對明白。但，如果剛剛的一個球季都未能令你從 doubters 變成 believers 的話，我只可以講一句，我幫唔到你。
2019–20 球季，我有預感會係一個特別嘅球季…
