溫泉小鎮Harrogate 2023
記得上年復活節已經鬼死咁熱，走咗去Trafalgar Square 睇The Passion of Jesus表演，估唔到個演出係咁大陣仗而且咁長，又要面向太陽睇show，最後曬到燶咗。
今年比上年凍，無留喺倫敦，而係向北走咗去Leeds再上小小一個叫Harrogate嘅鎮仔，更凍。Harrogate出名係叫溫泉小鎮，唔好幻想係好似日本風呂咁，其實佢只係一個歷史上搵到好多泉水嘅地方，不過可能已經係最接近日本溫泉嘅地方。舊時會飲用啲礦物硫磺水，有晒routine一日飲幾多杯幾點飲，又會用黎做各種水療，覺得能醫百病全家都會好健康。而家只剩低一間Turkish Bath，今次亦都無去，只係去咗Double Tree by Hilton酒店嘅half day spa （spa個網站係 https://theharrogatespa.com/），有泳池仔、按摩池、桑拿房同蒸氣房 （不過兩樣都唔係好夠熱），其實只要入住就可以免費使用，不過我哋book咗間B&B住，只係再畀錢去酒店，個上午plan包一個50分鐘或者2個25分鐘treatment，同埋完成之後一餐午飯或者high tea，個酒店high tea味道上我覺得好食過鎮入要一間超出名嘅cafe，間cafe個high tea完全唔好食，好失望。
個鎮其實好細，半日到一日行晒，加上舖頭5點就閂門，復活節星期日又唔開，所以成個trip 4日3夜都幾hea。今次book間B&B叫Frankin Mount Guesthouse，有tripadvisor獎，最平嘅房間好細，但裝修好靚，而且早餐超好食。因為間B&B飯廳環境真係靚，有一晚無出去餐廳食，而係去Tarbett’s Fishmongers訂咗個seafood platter番去食。
因為政府補貼而所有巴士都係£2一程或者£5全日任搭，所以除咗個鎮仔，仲可以好平去埋附近境點，包括Knaresborough同埋遠少少嘅Harewood House，所謂遠少少都只係唔洗半個鐘車程，只係架巴士唔係區內巴士而係去Leeds，但£2優惠最遠就只係去到Harewood House。政府嘅巴士優惠應該去到6月30號，有興趣嘅朋友可以上網check吓 。
36號去Leeds巴士，Harrogate Bus Station站上車，20分鐘左右去到Harewood, Harewood Arms站落車
https://www.transdevbus.co.uk/harrogate/services/HDT/36
Harewood House主要係參觀間大宅，有幾個位都好靚，不過就唔似啲宮廷咁全棟統一風格，其中我覺得中式睡房、一個大廳天花板同埋地底個廚房特別吸引。另外仲有個call工人系統都好特別，每間房有一個鐘，咁你諗吓一間咁嘅大宅會有幾多間房。大宅以外成個園區大到傻，有教堂、cafe、一個細細嘅動物園 （有企鵝同草泥馬 ！）、有花園、有湖、有船搭 （當日無開）等，就咁行一圈都要好耐。而本身大宅離入口都一段路，入口有主題樂園嗰啲車仔接送往返，但都唔知幾耐先有一架所以我就無都係行入去算。
Knaresborough主要就係睇個城堡遺址、河景同埋條橋、河仲有得扒艇，不過想扒都要留意吓天氣，可能呢一分鐘有陽光，轉個頭就落狗屎，轉得真係好快，當日就係咁，快手影完轉個頭就開始落雨。
再行遠少少去番搭巴士過橋經過嘅地方，另外仲有一個景點叫Mother Shipton’s Cave，話係一個好出名嘅女巫預言家出世嘅山洞，入面仲有一個許願池同埋泉水井，泉水井嘅滴水會令到所有嘢石化，因為水有好多礦物。啲人會掛曬啲嘢喺滴水下面等佢石化，望落其實都幾詭異 。雖然入場費都要成£12磅，如果只係睇舊石同個山洞就真係比較無聊，個但個景點其實做得幾好，裏面擺咗好多復活節嘅擺設，整得好靚，對象主要係畀小朋友玩，但大人打吓卡都唔錯。
最後想講多間Harrogate內嘅餐廳，係The Royal Baths Chinese Restaurant，因為復活節正日得亞洲嘢同意大利嘢開門，而早兩日都食咗意大利菜，所以就揀中餐。並唔係話所有嘢都好食，個梅子醬烤鴨我覺得係伏嘅，味道唔差，但係係一塊雞扒咁，完全係西化，同預期差好遠。而雀巢同港式酒樓食到嘅粵菜好唔同，上網search我估計係台灣做法？粵菜係春捲皮或者炸麵做，而今次食到係炸薯仔絲做。
呢兩樣都唔係我最想講嘅菜式，最想講係個甜品，食完嘢之後竟然問佢先畀個甜品menu而唔係主動地畀，而且個menu網上係冇嘅。網上圖片見到有個懷疑係拔絲香蕉嘅嘢，問個waiter 佢話廚師已經冇做拔絲，因為太難做，唔係個個廚師做得到，難控制質素，但係個甜品就仲有賣，都係脆嘅糖面炸蕉或者蘋果。呢個不得了咁好食，佢地應該要認真宣傳吓，最低限度要畀人知道有呢味甜品，當然更好就係要啲廚師練習吓做番個拔絲。如果有機會食呢間餐廳一定要試。
