Interview 同追女仔有咩唔同？
點解有啲人永遠都攞唔到 Offer？明明早已 Google 哂啲 Interview 貼士，但去到最後有 Offer 嘅都唔係佢。
Interview 除咗 Skills，仲需要講「你知唔知自己想點」。
咩叫「知唔知自己想點」？簡單嚟講，就係要答到「點解想見呢份工」。
我都 In 過不少人，好多人都會答「想 Explore 下」、「試下份工啱唔啱自己」、「擴闊下眼界」之類嘅答案。
咁諗唔係唔得，但收翻埋係個心度，可以唔使咁赤裸。
老細唔會想請個人翻黎「比佢試」，試啱咗尤旨可，試唔啱又係遞信走。就算你叻過其他 Candidate，但老細通常都唔會想 Take 呢個 Risk，做咗幾個月就走，幾叻都唔關佢事。
同埋你講得「Explore 下」，某程度上暗示咗你唔會做得長。好似你追女仔咁，你都唔會講我想「Explore 下」先同你一齊；就算係騎牛搵馬，都要講到山盟海誓、非卿不娶咁。
Interview 同追女仔其實唔係咁大分別，真得嚟又帶點虛情假意，用啲甜言蜜語去修飾；提及到有啲唔係好光彩嘅過去，但又唔想呃佢，唯有避重就輕咁輕輕帶過。
係呢段爾虞我詐嘅時間裡面，大家都將自己最好個面展露出嚟，男嘅著西裝，女嘅化好妝；至於到真係得手嗰陣，Hea 少少都得啦，只要唔好太走樣就得。
不過 Interview 就唔使講到山盟海誓嘅，講下份工有幾啱你、你有咩可以比到佢、讚下公司文化之類。太誇張只會令人反感，每日係到唱《月亮代表我的心》，聽得多都唔信啦。
比起一味讚個女仔，有互動嘅關係更易令大家走在一齊。同樣道理，一味讚公司有幾好都未必係最明智嘅做法，反而應該諗下問咩問題去了解份工、點樣同對方互動，顯出自己對呢份工嘅興趣。
「點解想見呢份工」同「你點解鐘意我」其實係異曲同工，誠意緊要過技巧；誠意得嚟加啲修飾；修飾得嚟唔好太浮誇，咁就啱啱好。
好似好難？咁梗係，邊個同你講過追女仔好易。
