十年眼鏡問答之1:
“點樣推銷一個無近視嘅人買眼鏡?”
Sep 1, 2018 · 2 min read
呢個就係我收到嘅第一個問題。或者我可以答「叫佢買太陽眼鏡囉」,不過諗深少少,將條題目改一改,「點樣推銷一個本身無需要嘅人買眼鏡?」,可能比較有意義。老實講,作為消費者,相信大家一定試過買咗返屋企先呻笨:「點解我會買咗呢D垃圾?」。大家可能會賴個Sales油腔滑調,但講到尾,都係自己內心深處嘅魔鬼被喚醒了。而呢個就係我作為前線嘅責任(請我唔係返來呼吸咖!)
回想返起我曾經做過嘅一間公司(算係比較高級同玩Fashion少少嘅公司),Interview嘅時候個HR Manager同我講:「我地公司比較特別,會有視力正常嘅客幫襯,你要諗辦法sell」。當時嘅生態同依家不同,眼鏡喺香港尚未係公認嘅潮流飾品,大家都鍾意戴Con,所以嗰時要賣眼鏡比D客,就一定要由面客修飾著手,e.g. 戴咗塊面睇落瘦咗、紅潤咗、精神咗、遮黑眼圈、易襯衫等等都係一D魔術字眼,令客人買返個平光鏡戴。而修飾面部輪廓,同衣飾配襯亦慢慢成為矯正視力及保護眼睛之外兩個主要推銷點。加上對眼鏡嘅印象轉型,文青風嘅崛起,眼鏡嘅功用亦續漸多樣化。
講起呢個客人選擇上嘅轉型,又可以拉開少少講吓近來喺香港火熱「速食眼鏡店」。其實套裝眼鏡(即係鏡架連指定鏡片一套定價發售)不是新鮮事。千禧年成行成市的旺角樓上舖,到後來的Alook (已撤出香港)一路都做緊。不過近兩三年香港人鍾意去日本配眼鏡,貪其平靚正同快,加上款同質素,於是就有商家將個概念,甚至直接將日本嘅品牌引入香港。以前嘅客覺得因為有度數所以要戴眼鏡,爛咗先再換,或者淨換鏡片唔換鏡架;到依家當買衫一樣,打開櫃桶隨手執一副襯衫,平有平玩貴有貴玩,要追潮追款,隨時未爛都換過副。如此種種,連帶整個行業都熱鬧起來了。